Ahwo nọ Jihova o you ọ rẹ whọku. (Ahwo Hibru 12:5, 6) O you Miriam gaga oyejabọ nọ ọ rọ whọku ei na. Ọ kuvẹ re omorro riẹ o raha iẹe kuotọ họ. Ọwhọkuo na ọ kẹ Miriam uye, rekọ u fiobọhọ siwi uzuazọ riẹ. Fikinọ ọ romakpotọ je nwene, Ọghẹnẹ ọ rọvrẹ riẹ. Miriam o yeri uzuazọ riẹ vrẹ ri bọwo oke nọ ahwo Izrẹl a rọ joma te Ẹkwotọ Eyaa na no. O te whu evaọ Kedẹsh nọ o rrọ udhude Zin. U muẹro nọ oke yena yọ ọ joma kpako te ikpe udhozeza-gbikpe (130) no.b (Ikelakele 20:1) Nọ ikpe buobu e vrẹ no, Jihova o ru oware jọ ro bru ọghọ họ Miriam oma fiki ẹrọwọ riẹ. Ọ rehọ Maeka ọruẹaro riẹ kareghẹhọ ahwo riẹ nọ: “Obonọ wha jẹ jọ igbo mẹ ta owhai no ze; me vi Mosis, Erọn, gbe Miriam karo kẹ owhai.”—Maeka 6:4.