Jihova ọ ta nọ o ti ru re oso ọ seba ẹrrọ evaọ oke esuo Ehab, ovie ọgeva jọ nọ o je su Izrẹl. Nọ Elaeja o whowho nọ oso ọ te rrọ họ no, Ọghẹnẹ o te si ei no re Ehab ọ siẹe ba ẹruẹ, je ru re ekọlọbe a wọ emu sei evaọ oria nọ o dhere. Jihova ọ tẹ ta kẹe nọ: “Tovrẹ, who kpobọ Zarefat ọrọ obọ Saedon, re whọ jọ etẹe. Riri, mẹ ta kẹ ayeuku jọ re ọ kuọ owhẹ evaọ etẹe.”—1 Iv. 17:1-9.

Ayeuku na ọ riẹ nọ Elaeja yọ ohwo Izrẹl nọ ọ rrọ odibo Ọghẹnẹ. Ẹme nọ aye na ọ kpahe nọ, “epanọ ỌNOWO na Ọghẹnẹ ra ọ rọ na” o kẹ imuẹro onana. Dede nọ ọ riẹ kpahe Ọghẹnẹ ahwo Izrẹl, o wọhọ nọ ọ riẹ riẹe te epanọ o ro sei “ỌNOWO na Ọghẹnẹ mẹ” hẹ okenọ ọ jẹ ta kpahe Jihova. Aye na ọ jẹ rria Zarẹfat, ẹwho Fonisia ọrọ “obọ” Saedọn. U muẹro nọ ahwo nọ a jẹ gọ Ebale a jẹ rria Zarẹfat. O make jọ ere na, Jihova ọ jọ oma ayeuku nana ruẹ oware uwoma jọ.

Dede nọ ayeuku na ọ jẹ rria udevie egedhọ, o wo ẹrọwọ. Jihova o vi Elaeja bru aye na fiki oware nọ u ti fi obọ họ kẹ aye na gbe Elaeja omariẹ. Ma rẹ sai wuhrẹ obọdẹ oware jọ no onana ze.

Orọnikọ ahwo kpobi nọ a jẹ rria ẹwho Zarẹfat nọ a be jọ gọ Ebale a jọ ahwo oyoma ha. Ayeuku nana nọ Jihova o vi Elaeja bru na u dhesẹ nọ Jihova o re muẹro họ emamọ ahwo, o tẹ make rọnọ a ri ti mu ei họ ẹgọ họ. Ẹhẹ, “evaọ korẹwho korẹwho ọnọ ọ jarae [dhozọ Ọghẹnẹ] o je ru onọ ukiẹrẹe ọ rẹ rehọ iẹe.”—Iruẹru 10:35.