Kọ Eme O Mae R’oja Evaọ Uzuazọ Ra?

“Wuhrẹ omẹ edhere nọ mẹ rẹ nya.”—OLEZI 143:8.

ẸSEJỌ t’owhẹ t’amọfa a riẹ ziezi inọ uzuazọ o vọ avọ iruẹru gbe awa. Nọ who te roro kpahiẹe, whọ rẹ sae vuhu ejọ rai wọhọ enọ i wuzou. Iruẹru gbe awa efa i wuzou tere he, hayo e tubẹ rọ ifofe dede. Uzẹme na nọ who vuhu onana u dhesẹ nọ whọ rọwo kugbe omọvo ezae nọ ọ mae wo areghẹ kpobi, Solomọn Ovie na. Nọ ọ kiẹ iruẹru uzuazọ kpobi riwi no, o te ku ei họ nọ: “Dhẹozọ Ọghẹnẹ, who koko izi riẹ; keme onana họ iruo kpobi nọ i te ohwo e ruo.” (Ọtausiuwoma Na 2:4-9, 11; 12:13) Eme onana u dhesẹ k’omai nẹnẹ?

² Whọ tẹ gwọlọ nọ whọ rẹ “dhẹozọ Ọghẹnẹ, [re] who koko izi riẹ,” nọ oma ra onọ idhọvẹ onana, ‘Kọ eme o mae r’oja evaọ uzuazọ mẹ?’ Uzẹme, o sae jọ nọ who bi roro kpahe onọ oyena kẹdẹ kẹdẹ hẹ, rekọ k’ẹvẹ who gbe roro kpahe iẹe enẹna ha? Uzẹme, o kareghẹhọ omai enọ efa nọ e kẹle riẹ, wọhọ, ‘Kọ o sae jọ nọ mẹ be ruawa hrọ kpahe iruo gbe okọ mẹ hayo kpahe eware iwo? Ẹvẹ uwou mẹ, uviuwou mẹ, gbe iyoyou mẹ e r’omẹ oja te?’ Uzoge ọ rẹ sae nọ inọ, ‘Ẹvẹ isukulu o be rehọ oke mẹ te? Evaọ uzẹme, kọ oware nọ o rẹ were omẹ gaga na, arozaha-ọjaja, hayo oghẹrẹ oma-sasa jọ hayo ewuhrẹ eware-kuo jọ e rọ isiuru ọsosuọ mẹ?’ Yọ epanọ ikpe hayo uyerakpọ mai o rọ, ma rẹ sae nọ gbagba inọ, ‘Diodẹ oria ẹgọ Ọghẹnẹ u re wo evaọ uzuazọ mẹ?’ Ababọ avro, whọ rẹ rọwo kpahe ẹgwọlọ eware nọ e mae rọ oja. Rekọ ẹvẹ gbe diẹse ma je wo obufihọ re ma rọ areghẹ salọ eware nọ e mae r’oja?

³ “Oware nọ o r’oja” u wo otofa oware nọ a rẹ rọ kobaro eware efa kpobi hayo ẹgwọlọ nọ a rẹ kake rẹriẹ ova ku. Sọ whẹ yọ omọvo Isẹri Jihova hayo whọ rọ usu ahwo ima emọ-iwuhrẹ oruọzewọ Ẹme Ọghẹnẹ nọ e be nyusu kugbe ai, roro kpahe uzẹme ẹme ọnana: “Koware koware kpobi ọvuọ ezi riẹ, jegbe koware koware kpobi eva otọ akpọ na ọvuọ oke riẹ.” (Ọtausiuwoma Na 3:1) Gbagba, oyena u kugbe edhesẹ ọdawẹ uyoyou kẹ ahwo uviuwou ra. (Ahwo Kọlọsi 3:18-21) U kugbe iruo nọ who re ru re whọ rehọ ẹgwọlọ uviuwou ra kẹ ai avọ oruọzewọ. (2 Ahwo Tẹsalonika 3:10-12; 1 Timoti 5:8) Yọ whọ tẹ dina gwọlọ s’oma họ, whọ sae rehọ oke kẹ oware nọ o rẹ were owhẹ gaga hayo oma-sasa hayo arozaha. (Wawo Mak 6:31.) Rekọ who te ghine roro kpahe ai didi ziezi, whọ gbẹ ruẹ nọ eware enana ọvuọvo e r’oja kẹ uzuazọ họ? Oware ofa jọ o riẹ nọ o mae r’oja.

⁴ Ẹsejọhọ who vuhumu no inọ izi ekpakpọ Ebaibol na e rọ obufihọ ologbo evaọ eruẹrẹhọ eware nọ e mae r’oja gbe ẹjẹ iroro areghẹ. Wọhọ oriruo, eva Ahwo Filipai 1:9, 10, a ta kẹ Ileleikristi re “uyoyou rai u hedhe ẹruẹruọ, eva ẹriẹ gbe areghẹ kpobi.” Fikieme? Pọl ukọ na o fibae nọ: ‘Re eware nọ e mae r’oja i mu owhai ẹro.’ Kọ oyena o gbẹ rọ oware areghẹ? Fiki eriariẹ egbagba, Oleleikristi orimuo ọ rẹ sae vuhu isiuru ọsosuọ riẹ mu—enọ e r’oja—evaọ uzuazọ.

Oriruo Kpahe Oware nọ O r’Oja

⁵ Ma ruẹ abọ ọghaghae eriariẹ evaọ eme Pita ukọ na: “Keme nwanọ onana a se owhai ze, keme na Kristi ọ ruẹ uye kẹ owhai no re, o te fi oriruo họ-otọ kẹ owhai re wha rọ kpahe ithihi riẹ.” (1 Pita 2:21) Ẹhẹ, rọ kpahe obufihọ re ma riẹ oware nọ o mae r’oja evaọ uzuazọ, ma rẹ sae kiẹ oware nọ Jesu Kristi o wuhrẹ kpahe iẹe riwi. Olezi 40:8 ọ ta evaọ eruẹaruẹ kpahe iẹe nọ: “Mẹ gwọlọ ru orọeva ra, O Ọghẹnẹ mẹ; uzi ra o rọ udu mẹ.” Enẹ ọ ta oghẹrẹ ẹme ọvo na: “Emu mẹ họ oreva Ọnọ O vi omẹ ze, jegbe re me ru iruo riẹ.”—Jọn 4:34; Ahwo Hibru 12:2.

⁶ Muẹrohọ usiavẹ oyena—eruo oreva Ọghẹnẹ. Oriruo Jesu u dhesẹ oware nọ o rẹ j’oja evaọ izuazọ ilele riẹ, keme ọ ta nọ “ohwo kpobi nọ a wuhrẹ ziezi ọ rẹ jọ wọhọ o wuhrẹ riẹ.” (Luk 6:40) Yọ nọ Jesu ọ jẹ nya evaọ edhere nọ Ọsẹ riẹ ọ gwọlọ na, o dhesẹ nọ ‘oghọghọ nọ o gba unu’ orọ oreva Ọghẹnẹ o fihọ obaro. (Olezi 16:11; Iruẹru 2:28) Kọ whọ ruẹ oware nọ oyena u dhesẹ? Nọ ilele Jesu a salọ eruo oreva Ọghẹnẹ wọhọ oware ọsosuọ evaọ izuazọ rai na, a rẹ te reawere ‘oghọghọ nọ o gba unu’ gbe uvi uzuazọ. (1 Timoti 6:19) Fikiere oware nọ o soriẹ nọ ma je fi eruo oreva Ọghẹnẹ haro evaọ izuazọ mai e rọ buobu.

⁷ Nọ Jesu ọ nwane rehọ oma riẹ kẹ no re o ru oreva Ọghẹnẹ, Ẹdhọ ọ tẹ daoma re o ku iroro riẹ rẹriẹ. Evaọ edhere vẹ? Evaọ edawọ esa. Ẹsikpobi Jesu ọ jẹ hẹ kuyo no Ikereakere na ze, avọ ẹgba kpobi. (Matiu 4:1-10) Rekọ edawọ efa e gbẹ jọ obaro kẹe—ukpokpoma, ẹkoko, evivie Judas, ota, jegbe uwhu evaọ ehru ure oja. Ghele, edawọ enana ọvuọvo o ru Ọmọ omarokpotọ Ọghẹnẹ reghe no edhere riẹ hẹ. Okenọ eware e ga thesiwa no, Jesu ọ tẹ lẹ nọ: “O rọ eva mẹ hẹ, rekọ o rọ eva ra. . . . Jọ a ru o rọ eva ra.” (Matiu 26:39, 42) Kọ oriruo ọnana nọ a nya seba k’omai na u gbe duobọ te omai omomọvo udu, re u ru omai “hẹ lẹ kẹse kẹse”?—Ahwo Rom 12:12.

⁸ Ẹhẹ, ma tẹ m’oma eware nọ e mae r’oja evaọ uzuazọ, ọkpọvio Ọghẹnẹ u re fiobọhọ gaga, maero nọ ma tẹ rẹriẹ ova ku ewegrẹ uzẹme gbe enọ e rẹ wọso oreva Ọghẹnẹ. Kareghẹhọ olẹ Devidi Ovie ẹrọwọ na kẹ ọkpọvio nọ ọ nyaku ọwọsuọ ewegrẹ. Ma te ruẹ onana nọ ma be te kiẹ abọjọ Olezi 143 riwi na. Onana u ti fiobọhọ k’omai riẹ epanọ ma re ro ru usu mai kugbe Jihova ga viere je wo ogaga nọ ma re ro fi eruo oreva Ọghẹnẹ haro evaọ izuazọ mai.

Jihova O re Yo jẹ k’Iyo kẹ Elẹ Mai

⁹ Dede nọ ọ rọ ọrahauzi nọ o re whuẹ, Devidi o wo ẹrọwọ inọ Jihova ọ te k’uyo kẹ olẹ riẹ. Ọ rọ omarokpotọ lẹ nọ: “O ỌNOWO, yo olẹ mẹ; gaviezọ kẹ ayare mẹ! Eva ọtẹruo ra gbe eva ẹrẹreokie ra yo kẹ omẹ! ỌNOWO who se odibo ra ẹdhọ họ; keme ohwo ọvo nọ o kiẹrẹe ọrọ obaro ra ha.” (Olezi 143:1, 2) Devidi ọ riẹ kpahe sebaẹgba riẹ, ghele udu riẹ o jọ gbagba kpahe Ọghẹnẹ. Fikiere, o te wo udu inọ o ti wo uyo evaọ ẹrẹreokie. Kọ onana o gbẹ k’omai uduotahawọ? Dede nọ ma be sae nya te ẹrẹreokie Ọghẹnẹ hẹ, o rẹ sai mu omai ẹro inọ o re yo k’omai otẹrọnọ ma rehọ eva mai kpobi kẹe. (Ọtausiuwoma Na 7:20; 1 Jọn 5:14) Nọ ma be ruabọhọ olẹ na, ma rẹ gbaudu re ma ‘rehọ ewoma fi eyoma kparobọ’ evaọ edẹ iyoma enana.—Ahwo Rom 12:20, 21; Jemis 4:7.

¹⁰ Devidi o wo ewegrẹ, wọhọ epanọ ma wo na. Makọ okenọ o je ghoro fiki Sọl, nọ o jọ ọgbahọ kẹe re ọ dhẹ dhere, kpohọ oria nọ o ko dhere, hayo wọhọ ovie nọ ewegrẹ i je kpokpo, Devidi o wo etoke awa riẹ. O dhesẹ epanọ onana u kpomahọ iẹe te: “Ọwegrẹ ọrọ suọ omẹ; . . . o te ru omẹ keria udevie ebi . . . Fikiere oma o tẹ rọ [ẹwẹ] mẹ no; iroro udu mẹ e tẹ raha no.” (Olezi 143:3, 4) Kọ oma u ru owhẹ enẹ no ẹdẹjọ?

¹¹ Ọyawọ ọwegrẹ, edawọ fiki ọbẹwẹ okọ, ẹyao ọgaga, hayo ebẹbẹ awaọruọ efa e lẹliẹ ahwo Ọghẹnẹ jọ kie ruọ ọkora no. Ẹsejọ o vẹ wọhọ nọ udu rai u mu irirẹ no. O tẹ wọhọ nọ omomọvo rai a bo via no inọ: “[Fikinọ] who ru omẹ ruẹ iye ilogbo buobu, who je ti dhidhi omẹ aro viẹ . . . jẹ sasa omẹ oma.” (Olezi 71:20, 21) Ẹvẹ a ro wo obufihọ no?

Epanọ A rẹ rọ Dadamu kẹ Omodawọ Ọwegrẹ

¹² Olezi 143:5 o dhesẹ oware nọ Devidi o ru nọ ọza gbe edawọ ilogbo e rẹriẹ ova ku ei: “Mẹ tẹ kareghẹhọ oke anwae, me te roro eware no who ru no; me te wo awere kẹ iruo nọ abọ ra o ru no.” Devidi ọ kareghẹhọ epanọ Ọghẹnẹ o ro yeri kugbe idibo Riẹ no gbe epanọ ọye omariẹ ọ rọ ruẹ esiwo. O roro kpahe oware nọ Jihova o ru no fiki odẹ ulogbo Riẹ. Ẹhẹ, iruo Ọghẹnẹ họ enọ e jọ Devidi oja.

¹³ Kọ ma gbẹ re kareghẹhọ epanọ Ọghẹnẹ o ro yeri kugbe ahwo riẹ no? Uzẹme! Onana u kugbe iruẹru “isisẹri [nọ] ewariẹ omai họ wọhọ ẹgho” na taure oke Ileleikristi u te zi te. (Ahwo Hibru 11:32-38; 12:1) A tẹ jẹ tudu họ Ileleikristi nọ a kẹ ẹzi evaọ ikpe-udhusoi ọsosuọ na awọ re a “kareghẹ họ edẹ nọ e vrẹ no” gbe eware nọ a thihakọ rai no. (Ahwo Hibru 10:32-34) Kọ ẹvẹ kpahe eware nọ idibo Ọghẹnẹ a ruẹ no evaọ oke nana, wọhọ itienọ a fodẹ evaọ obe ọ Jehovah’s Witnesses—Proclaimers of God’s Kingdom?a Iku nọ a kere fihọ etẹe gbe eria efa i fiobọhọ k’omai kareghẹhọ epanọ Jihova o ro fiobọhọ kẹ ahwo riẹ no re a thihakọ awhaha iruo rai, iwou-odi, ukpe, gbe ega uye gbe oja. Edawọ buobu e riẹ evaọ ekuotọ nọ ẹmuofio ọ raha no, wọhọ Burundi, Liberia, Rwanda, gbe oria Yugoslavia vẹre. Nọ ọwọsuọ ọ tẹ r’oma via, idibo Ọghẹnẹ a re thihakọ fiki ekru usu ogaga kugbe Jihova. Obọ riẹ u re siwi ahwo enọ i ru eruo oreva riẹ fihọ oware nọ o r’oja evaọ izuazọ rai.

¹⁴ Ghele, whọ rẹ sae k’uyo inọ olahiẹ itieye na i ri t’owhẹ oma ha, yọ whọ sai roro nọ e sai ti t’owhẹ oma ha. Rekọ Ọghẹnẹ ọ be thọ ahwo riẹ orọnikọ evaọ idhere ọ ikpregede ọvo ho. Ọ thọ ahwo “gheghe” buobu no evaọ eyero “aruro.” Ma gwọlọ fodẹ oriruo ọvo jọ: Who vuhu ifoto nọ ọ rọ obehru na, kọ u fiobọhọ k’owhẹ kareghẹhọ epanọ Ọghẹnẹ o bi ro yeri kugbe ahwo riẹ? O r’oma via evaọ Uwou Eroro Na ọrọ December 1, 1996 (ọrọ Oyibo). Kọ who se ikuigbe ọ Penelope Makris no? Ẹvẹ onana o rọ obọdẹ oriruo te ọrọ ẹgbakiete Ileleikristi! Kọ whọ kareghẹhọ eware nọ o thihakọ rai no eva obọ erivẹ riẹ, epanọ ọ rọ họre fiki ẹyao, gbe omodawọ nọ o ru re ọ ruẹse jọ ọkobaro? Kọ ẹvẹ kpahe eware evawere nọ ọ nyaku evaọ Mytilene? Ẹme na họ, Kọ whọ be ruẹ iriruo itieye na wọhọ obufihọ rọ k’omai kpobi re ma fi eware nọ e mae r’oja haro, ẹkaki ru oreva Ọghẹnẹ evaọ izuazọ mai?

¹⁵ Ma re wo ogaga otẹrọnọ ma re roro kpahe iruẹru Jihova, wọhọ epanọ Devidi o ru. Evaọ erugba ẹjiroro riẹ, Jihova o te ru ọruẹrẹfihotọ kẹ esiwo ẹkwoma uwhu Ọmọ riẹ, ẹkparomatha riẹ, gbe oruaro nọ ọ kẹ riẹ. (1 Timoti 3:16) Ọ rehọ Uvie obọ odhiwu riẹ mu no, hwere Setan gbe idhivẹri riẹ no odhiwu no, je zihe egagọ uzẹme ziọ otọakpọ obonẹ no. (Eviavia 12:7-12) Ọ bọ aparadase ẹzi no ọ tẹ jẹ rehọ ẹvi ghale ahwo riẹ no. (Aizaya 35:1-10; 60:22) Ahwo riẹ a be kẹ isẹri urere taure uye ulogbo na o tẹ bẹre lahwe. (Eviavia 14:6, 7) Ẹhẹ, eware buobu e riẹ nọ ma re roro kpahe.

¹⁶ Re ma ruawa kpahe iruo abọ Ọghẹnẹ ukpenọ ilale ohwo-akpọ e rẹ vọ omai iroro o rẹ lẹliẹ omai riẹ kpahe ogaga Jihova nọ a rẹ sae zadhe he. Dede, iruo eyena e jọ iruo igbunu emama evaọ obọ odhiwu gbe otọakpọ na t’oba ha. (Job 37:14; Olezi 19:1; 104:24) Iruo igbunu riẹ i kugbe iruẹru esiwo kẹ ahwo riẹ no obọ ewegrẹ ewọsuọ, nọ u dhesẹ oma via evaọ oware nọ o via kẹ ahwo anwae riẹ nọ ọ salọ.—Ọnyano 14:31; 15:6.

Riẹ Edhere nọ Whọ Rẹ Nya

¹⁷ Devidi ọ lẹ kẹ obufihọ re awere uzuazọ o siẹe oma ba eno: “Mẹ riẹ abọ mẹ kẹ owhẹ; uru ra u bi si ẹzi mẹ wọhọ otọ oyaya. O ỌNOWO, ovẹrẹ yo kẹ omẹ! Oma o rọ ẹzi mẹ no! Who si ovao ra no dhere omẹ hẹ, ogbẹrọ ere he mẹ [vẹ] te wọhọ ahwo nọ a bi kie ruọ ọgọdọ.” (Olezi 143:6, 7) Devidi, ọrahauzi, ọ riẹ nọ Ọghẹnẹ ọ riẹ kpahe eyero riẹ. (Olezi 31:7) Ẹsejọ ma re roro nọ edikihẹ ẹzi mai u whrehe gaga no. Rekọ eyero na ọ rọ ababọ ẹruore he. Jihova, ọnọ o re yo elẹ mai, ọ rẹ sai ru ezihetha mai vẹrẹ ẹkwoma omosasọ nọ ọ rẹ rehọ ekpako iyoyou na k’omai, izoeme evaọ Uwou Eroro Na, hayo abọ iwuhrẹ nọ e wọhọ nọ a nwane ruẹrẹhọ k’omai.—Aizaya 32:1, 2.

¹⁸ Evaifihọ Jihova mai o rẹ wọ omai lẹe inọ: “Ru re me yo eme uyoyou ulogbo ra eva irioke frifri, keme whẹ mẹ rehọ ẹro so. Wuhrẹ omẹ edhere nọ mẹ rẹ nya.” (Olezi 143:8) Kọ o ru oma vuọ Sista Makris, nọ ọ rọ ubiozọ jọ evaọ ukoliko Grisi na? Kọ o ti ru oma vo owhẹ nọ who bi ru eruo oreva riẹ họ oware nọ o r’oja evaọ uzuazọ ra na? Ẹdhọ avọ ahwo riẹ a rẹ sae daoma re a whaha hayo tube ru iruo ewhowho Uvie Ọghẹnẹ mai serihọ dede. Sọ ma be gọ evaọ ekuotọ nọ a jọ kẹ egagọ uzẹme uvẹ hayo ma be gọ evaọ oria nọ awhaha ọ rọ, elẹ okugbe mai e rọwo kugbe ayare Devidi: “Siwi omẹ, O ỌNOWO, no obọ ewegrẹ mẹ! Keme whẹ họ oria adhẹzọ mẹ!” (Olezi 143:9) Omofọwẹ mai kpahe okpẹtu ẹzi o roma hwa ẹria oria idhere ọrọ Oride na.—Olezi 91:1.

¹⁹ Imuẹro mai kpahe oware nọ o mae r’oja u wo otọhotọ ọgaga. (Ahwo Rom 12:1, 2) Fikiere, whaha omodawọ akpọ na nọ a be rọ gwọlọ gba owhẹ họ ru oware nọ a roro nọ o r’oja evaọ iroro ohwo-akpọ. Gbẹ hae ru abọ uzuazọ ra kpobi re u dhesẹ oware nọ whọ riẹ nọ o mae r’oja—eruo oreva Ọghẹnẹ.—Matiu 6:10; 7:21.

²⁰ Awọ izii ọsosuọ ọrọ Olezi 143 u dhesẹ usu okpekpe Devidi kugbe Jihova. Nọ ewegrẹ i koko iei họ, ọ tẹ lẹ se Ọghẹnẹ ovavo kẹ ọkpọvio. Ọ t’eva riẹ, be gwọlọ obufihọ evaọ edhere ọgbagba nọ ọ rẹ nya. Epọvo na o rọ re kugbe ikiọkotọ nọ a kẹ ẹzi evaọ otọakpọ na gbe egbẹnyusu rai. A roro kpahe usu rai kugbe Jihova wọhọ oware nọ o mae ghare nọ a be hẹ lẹe kẹ ọkpọvio na. A fi eruo oreva Ọghẹnẹ haro, ghelọ ọyawọ no obọ Ẹdhọ gbe akpọ na ze.

²¹ O gwọlọ nọ ima ahwo nọ i bi wuhrẹ Ebaibol na kugbe Isẹri Jihova a vuhumu inọ eruo oreva Ọghẹnẹ o r’oja. Ma rẹ sai fiobọhọ kẹ ai wo otoriẹ onana nọ ma te bi wuhrẹ uzou avọ 13 ọrọ obe Eriariẹ Nọ I Re Su Kpohọ Uzuazọ Ebẹdẹ Bẹdẹ na, nọ i fiẹgba họ izi nọ a re lele evaọ ẹmeoyo kẹ Ẹme na.b Dede, u fo re a jọ oma mai ruẹ oriruo oware nọ ma bi wuhrẹ ai na. U re kri hi re a tẹ riẹ edhere nọ u fo nọ a rẹ nya. Nọ ima ahwo enana a be riẹ oware nọ o rẹ mae wuzou evaọ izuazọ rai na, oma o rẹ te wọ ibuobu re a j’owọ omarọkẹ gbe ame-ọhọ. U je no ere no, ukoko na o rẹ sai fiobọhọ kẹ ai re a gbẹ hẹ nya evaọ edhere uzuazọ.

²² Ibuobu a ghine vuhumu inọ oreva Ọghẹnẹ o rẹ kobaro evaọ izuazọ rai. Kọ ẹvẹ Jihova o bi ro wuhrẹ idibo riẹ ẹrera re a ru oreva riẹ? Didi irere enana e be wha se ai? Ma ti duobọ te enọ enana jẹ t’ẹme kpahe owọ Ebaibol jọ nọ u wuzou, Olezi 143:10, evaọ uwuhrẹ n’otha.

[Footnotes]

Didi Uyo Whọ te Kẹ?

◻ Ẹkwoma efihiruo ẹme obe Ahwo Filipai 1:9, 10, ẹvẹ ma sai ro vuhu eware nọ e mae r’oja?

◻ Ẹvẹ Jesu o ro dhesẹ oware nọ o mae r’oja evaọ uzuazọ riẹ?

◻ Eme ma rẹ sai wuhrẹ no owojẹ Devidi ze okenọ ọ jọ ẹdawọ?

◻ Evaọ edhere vẹ Olezi 143:1-9 u je fiobọhọ k’omai nẹnẹ?

◻ Eme o rẹ mae j’oja evaọ izuazọ mai?

[Study Questions]

1. Eme Solomọn Ovie na ọ ta kpahe ilale gbe ute ohwo-akpọ?

2. Didi enọ ahwo nọ e be dhozọ Ọghẹnẹ a rẹ nọ omarai, nọ u re su kpohọ enọ vẹ?

3. Eme efihọ eware nọ e r’oja u kugbe kẹ Ileleikristi?

4. Didi obọ obe Ahwo Filipai 1:9, 10 u wo kpahe ẹruẹrẹhọ eware nọ e r’oja?

5. Evaọ edhesẹ oriruo nọ a nya seba kẹ Ileleikristi, ẹvẹ Ikereakere na i ro dhesẹ oware nọ o mae j’oja evaọ uzuazọ Jesu?

6. Ẹvẹ ma sae ro wo oghẹrẹ irere Jesu na evaọ oreva Ọghẹnẹ o fihọ oware ọsosuọ?

7, 8. Didi edawọ Jesu ọ rẹriẹ ova ku, kọ eme ma re wuhrẹ no onana ze?

9. (a) Dede nọ Devidi ọ jọ ọrahauzi, eme iruẹru gbe eme riẹ i dhesẹ? (b) Fikieme eruo oware nọ u kiete o gbẹ bẹ omai hi?

10. Fikieme Devidi o je wo etoke awaọruọ?

11. Didi awaọruọ idibo Ọghẹnẹ oke nana a r’ova dhe no?

12. Ẹvẹ Devidi Ovie na o ro thihakọ ọza gbe edawọ?

13. Nọ ma tẹ rẹriẹ ova dhe edawọ, ẹvẹ eroro kpahe iriruo idibo ẹrọwọ anwae gbe oke onana i re ro fiobọhọ k’omai thihakọ?

14. (a) Didi oriruo Ọghẹnẹ o riẹ nọ ọ rọ thọ ohwo jọ nọ ọ jọ eyero wọhọ omai? (b) Eme who wuhrẹ no oriruo ọyena ze?

15. Eme họ iruẹru Jihova jọ nọ ma re roro kpahe?

16. Eme a tudu họ omai awọ nọ ma ruawa kpahe, kọ eme onana u re dhesẹ k’omai?

17. Ẹvẹ Jihova ọ kẹle Devidi te, kọ ẹvẹ a sae rọ k’omai omosasọ?

18, 19. (a) Eme ma rẹ lẹ gaga kpahe se Jihova? (b) Eme u re mu omai ẹro?

20. (a) Eme ma wuhrẹ no oma Devidi ze eva Olezi 143:1-9? (b) Ẹvẹ Ileleikristi nẹnẹ a re ro dhesẹ oghẹrẹ ẹzi Devidi na?

21. Fikieme u je wuzou k’omai re ma kẹ emamọ oriruo otẹrọnọ ma re wuhrẹ amọfa kpahe oware nọ o rẹ mae j’oja evaọ izuazọ rai?

22. Didi enọ ma ti duobọ te evaọ uwuhrẹ n’otha?

[Picture on page 4]

Owojẹ Devidi u dhesẹ ẹrorọsuọ Jihova riẹ

[Credit Line]

A si rie no Illustrirte Pracht - Bibel/Heilige Schrift des Alten und Neuen Testaments, nach der deutschen Uebersetzung D. Martin Luther ze