1. Didi odẹ Ọghẹnẹ, kọ ẹvẹ ma rọ riẹ nọ ọ gwọlọ nọ ma riẹ odẹ na?

Ọghẹnẹ ọ jọ Ebaibol na dhesẹ omariẹ kẹ omai. Ọ ta nọ: “Mẹ họ Jihova. Odẹ mẹ oye.” (Se Aizaya 42:5, 8.) “Jihova” yọ oghẹrẹ nọ a fa odẹ Hibru jọ nọ o sae jọnọ otofa riẹ o rrọ “O re Ru Zihe Ro.” Jihova ọ gwọlọ nọ ma riẹ odẹ riẹ. (Ọnyano 3:15) Ẹvẹ ma rọ riẹ? O fi odẹ riẹ Jihova họ Ebaibol na bu vi isia idu ihrẹ (7,000).a Ọnọ ọ rrọ “Ọghẹnẹ uzẹme na evaọ obọ idhiwu gbe evaọ otọakpọ na” họ ọnọ o wo odẹ na Jihova.​—Iziewariẹ 4:39.

2. Ẹvẹ u fo nọ ma rẹ rọ gọ Jihova?

Nọ orọnọ Jihova ọ ma omai na, ọye ọvo ma rẹ gọ. (Eviavia 4:11) Onana u dhesẹ nọ ma re you rie, yọ ma rẹ rọ emema hayo iwoho evuevo rọ gọe he.​—Se Aizaya 42:8.

Ma rẹ gọ Jihova evaọ edhere nọ ọ rrọ “ọrẹri,” nọ “ọ rẹ jẹrehọ.” (Ahwo Rom 12:1) Koyehọ u fo nọ ma re koko izi riẹ. Wọhọ oriruo, izi nọ Jihova o fihọ kpahe orọo e rẹ were ahwo nọ a you rie, yọ a re koko ai. A re se utaba ha, a re vovo isigareti hayo ige he, a re mu lọ imu egaga ha, yọ a rẹ da idi vrẹ oma ha.a