8, 9. Eme o gwọlọ nọ ahwo Ju buobu a re ru kpahe udu rai?

⁸ Oware nọ Ọghẹnẹ ọ ta kẹ ahwo Ju inọ a ru o sai fi obọ họ kẹ omai riẹ otofa ẹme na, a “yawo obọ eva ha.” Ọ ta kẹ ae nọ: ‘Wha si eware igbegbe no udu rai no, O whai ahwo Juda avọ enọ e be rria Jerusalẹm, ogbẹrọ erehe ofu mẹ ọ te nyaze . . . fiki umuomu rai.’ Rekọ, diẹse umuomu rai na u no ze? Obọ eva hayo udu rai u muhọ no ze. (Se Mak 7:20-23.) Ẹhẹ, Jihova ọ rehọ ẹkwoma Jerimaya dhesẹ oria nọ umuomu ahwo Ju na u muhọ no ze. A wo udu ogaga, a je ru eware nọ Jihova o mukpahe. (Se Jerimaya 5:23, 24; 7:24-26.) Ọghẹnẹ ọ ta kẹ ae nọ: “Wha ru oma rai fo kẹ ỌNOWO na, wha si eware igbegbe no udu rai no.”—Jeri. 4:4; 18:11, 12.

⁹ Fikiere, o gwọlọ nọ ahwo Ju evaọ oke Jerimaya a rẹ bẹre udu rai, wọhọ odẹme, hayo “yawo eva” rai wọhọ epanọ emọ Izrẹl a ru evaọ oke Mosis. (Izie. 10:16; 30:6) Re a “si eware igbegbe no udu rai no” u dhesẹ nọ a re si eware nọ e lẹliẹ udu rai rrọ gaga na no, koyehọ iroro gbe isiuru rai nọ e wọso oreva Ọghẹnẹ.—Iruẹru 7:51.

11, 12. (a) Fikieme u ro fo nọ mai omomọvo ọ kiẹ udu riẹ riwi? (b) Eme Ọghẹnẹ o ti ru hu?

¹¹ Jihova ọ gwọlọ nọ mai omomọvo, ma hai yoẹme kẹe re ma wo ọjẹrehọ riẹ n’oke t’oke. Jerimaya ọ ta kpahe ohwo okiẹrẹe nọ: “O ỌNOWO ogbaẹmo, ọnọ ọ rẹ dawo ikiẹrẹe na, ọnọ ọ rẹ ruẹ eva jẹ riẹ iroro.” (Jeri. 20:12) Nọ orọnọ Ọghẹnẹ Erumeru na ọ be kiẹ udu ikiẹrẹe riwi na, kọ u gbe fo nọ ma roma totọ kiẹ omamai riwi? (Se Olezi 11:5.) Ma te bi ru ere, ẹsejọhọ ma ti muẹrohọ uruemu, isiuru hayo oware jọ nọ ma bi le nọ u fo nọ ma re ru inwene kpahe. Ma rẹ sai je muẹrohọ oware nọ o be lẹliẹ udu mai jọ gbegbe nọ u fo nọ ma re si no. Oyena u dhesẹ nọ ohwo ọ bẹre udu riẹ, wọhọ odẹme. U te mu owhẹ ẹro nọ u gine fo nọ whọ rẹ kiẹ udu ra riwi, eme whọ te kiẹ gwọlọ? Kọ ẹvẹ whọ sai ro ru enwene nọ o fo?—Jeri. 4:4.