OMAUROKPOTỌ yọ uruemu nọ o rẹ were ahwo. Oma o rẹ wọ omai re ma si kẹle ahwo nọ a wo omaurokpotọ. Rekọ u yoma gaga inọ, re a ruẹ ahwo nọ a gine wo uvi omaurokpotọ nẹnẹ o rrọ bẹbẹ, maero evaọ udevie ahwo nọ amọfa a rrọ otọ rai. Rekọ ẹvẹ kpahe Jihova Ọghẹnẹ, ọnọ ọ mae rro evaọ ehrugbakpọ na? Kọ o wo omaurokpotọ? Joma kiẹ eme nọ Jerimaya ọruẹaro na o kere riwi, enọ e rrọ obe Enuobro 3:20, 21, NW: “Ababọ avro, whọ te kareghẹhọ who ve ti ruwẹ bru omẹ ze. Onana me ti wo họ iroro ẹsikpobi. Oyejabọ nọ me ti ro thihakọ hẹrẹ.”

U mu Jerimaya ẹro inọ Jihova o “ti ruwẹ bru” ahwo nọ a gine kurẹriẹ no eva ze. Eme yena i fi obọ họ kẹ omai riẹ inọ Jihova ọ vọ avọ ẹwo. Jihova, ọnọ ọ “mai kpehru” evaọ akpọ na kpobi o ti ruwẹ ze otọ, wọhọ odẹme, kpare ahwo riẹ nọ e be ruẹ uye, jẹ rọ vrẹ ae. (Olezi 83:18) Ẹruore nana nọ Jerimaya o wo na, o lẹle riẹ wo omosasọ ghele ọkora nọ ọ vọ riẹ oma. Jerimaya ọruẹaro na ọ gba riẹ mu inọ o re thihakọ hẹrẹ oke nọ Jihova o fihọ nọ o ti ro siwi idibo riẹ nọ i kurẹriẹ no uye.—Owọ avọ 21.