Ẹwọ Owha na Evaọ Uzoge

EVAỌ “oke ẹbẹbẹ” nana, emoha e rẹriẹ ova dhe otunyẹ ologbo. (2 Timoti 3:1) Kẹdẹ kẹdẹ a rẹriẹ ova dhe eware nọ e be tuduhọ ọfariẹ-ogbe, ivovavovo, gbe oghẹrẹ iruemu ọraha efa. A rẹ sai se ahwo nọ a bi lele ute Ebaibol ẹkoko fikinọ a se nọ a re lele otu oyoma ha, yọ Ileleikristi jọ a re roro nọ o te mae lọhọ re a fioma h’otọ.

Evaọ ubrobọ ekuhọ ikpe-udhusoi avọ ihrẹ B.C.E., Jerimaya o kere nọ: “Uwoma re ohwo ọ ruẹ uye eva oke emaha riẹ.” (Enuobruo 3:27) Eme họ otofa eme riẹ? Inọ re ohwo o wuhrẹ re o thihakọ edawọ nọ ọ gbẹ rọ ọmaha u re fiobọhọ k’ohwo rẹriẹ ova ku use-abọ ọkpako. Okpẹtu, dede nọ ọ rẹ were he, o rọ oware nọ izoge gbe ekpako Ileleikristi a sae whaha ha. (2 Timoti 3:12) Rekọ irere ẹrọwọ e rro vi ufuoma jọ nọ oma-fihọ-otọ o rẹ whaze.

Whọ tẹ rọ uzoge, rẹriẹ ova dhe edawọ ẹrọwọ ra ziezi. Nọ a tẹ dawo owhẹ re who dhomahọ uruemu othọthọ jọ, se nọ who re fi oma họ otọ họ. Dede nọ o rẹ jọ bẹbẹ re a ru ere evaọ obọnana, evaọ obaro awa-ọruọ ra e te kawo. Jesu ọ y’eyaa nọ: “Rehọ owhowha mẹ wha, . . . wha rẹ te ruẹ udhedhẹ kẹ izi rai. Keme owhowha mẹ o rẹ lọlọhọ, owha mẹ u re vovovo.”—Matiu 11:29, 30.

Dede use-abọ ẹria lele izi Ebaibol na rehọ. Ere oruo o rẹ k’owhẹ edhere uzuazọ nọ o mai woma kpobi enẹna gbe uvi ẹruore kẹ obaro. Wọhọ epanọ Ebaibol na ọ ta, “akpọ na avọ urusio riẹ e rẹ te vrẹ, rekọ ohwo nọ o re ru oreva Ọghẹnẹ ọ rẹ jọ bẹdẹ.”—1 Jọn 2:17.