“OHWO ọ rẹ rehọ obọ ogaga su ọrivẹ riẹ nwa oma riẹ.” (Ọtausiuwoma Na 8:9) Eme yena nọ a kere anwọ ikpe idu esa (3,000) nọ i kpemu na, i dhesẹ oghẹrẹ akpọ nọ ma be rria nẹnẹ. Ahwo-akpọ a rẹ rehọ ọkwa rai ru iruo thọthọ, makọ oghẹrẹ ahwo nọ a rrọ hayo oria nọ a be rria. Ẹsikpobi a re kienyẹ iyogbere na gbe ahwo nọ a wo ahwo ho. Ẹvẹ Jihova o re rri okienyẹ otiọye na? Ma rẹ ruẹ uyo na evaọ obe Izikiẹl 22:6, 7, 31.—Sei.

Nọ Izikiẹl ọ ta ẹme nana no, ọ tẹ fere isu na via gbe enọ e jẹ thọ ae uke re a thọ Uzi Jihova. Izikiẹl ọ ta nọ: “A be rehọ ọsẹ gbe oni zaharo.” (Owọ avọ 7) Fikinọ isu na a je dhesẹ ababọ adhẹẹ kẹ esẹ gbe ini, a tẹ rọ ere raha iviuwou sa-sa kuotọ evaọ orẹwho na.—Ọnyano 20:12.

Ahwo ogbekuo nọ e jọ orẹwho na, a jẹ rọ ogaga mi iyogbere eware. Ẹsikpobi nọ a ru oware uyoma, yọ a bi gbabọkẹ Uzi nọ Ọghẹnẹ ọ kẹ emọ Izrẹl na. Wọhọ oriruo, Uzi Ọghẹnẹ o ta nọ emọ Izrẹl a re dhesẹ ororokẹ kẹ erara nọ e be rria orẹwho Izrẹl. (Ọnyano 22:21; 23:9; Iruo-Izerẹ 19:33, 34) Rekọ ahwo na a jẹ ‘tabọ mi erara eware evaọ udevie rai.’—Owọ avọ 7.

Isu na a je gboja kẹ ahwo nọ i wo ahwo ho, koyehọ “enọ i wo esẹ hẹ gbe eyaeuku.” (Owọ avọ 7) Jihova o wo ọdawẹ kẹ emọ nọ i wo esẹgbini hi gbe enọ erivẹ-orọo rai i whu no, yọ o bi ru ẹgwọlọ rai kẹ ae. Ọghẹnẹ ọ ya eyaa inọ ọ te kiẹ-oja emọ-iwhrori gbe eyae-uku nọ a bi kienyẹ.—Ọnyano 22:22-24.