OHỌRE URERE NA

20. Ẹvẹ ẹnjẹle na o dhesẹ ohọre urere ọrọ ovie obọ ẹkpẹlobọ-ọre na?

²⁰ Egrẹ nọ ọ rọ udevie ovie obọ ẹkpẹlobọ-ọre na gbe ovie obọ obọze-ọre na—te ọrọ ẹmo-ofio, okọ, hayo oghẹrẹ efa—o be kẹle ekuhọ no. Bi dhesẹ ohọre ofa nọ o gbẹ rọ obaro, ẹnjẹle Jihova ọ ta nọ: “Rekọ usi nọ u re ti no obọ ovatha-ọre gbe ẹkpẹlobọ-ọre tha u re ti mu ei [ovie obọ ẹkpẹlobọ-ọre na] ozọ, ọ rẹ te rehọ ofu ologbo nya ọ vẹ te raha je kpe ibuobu muotọ. Ọ rẹ te bọ iwou-idhu riẹ họ udevie abade avọ ugbehru oruaro ọrẹri; dede na yọ u re ti re, ohwo ọvuọvo o re ti fiobọhọ kẹ e he.”—Daniẹl 11:44, 45.

21. Eme u kiọkọ nọ ma ti wuhrẹ kpahe ovie obọ ẹkpẹlobọ-ọre na?

²¹ Avọ ekie Soviet Union evaọ December 1991, oma o tẹ lọhọ ovie obọ ẹkpẹlobọ-ọre na. Ono ọ te jọ ovie ọnana evaọ okenọ Daniẹl 11:44, 45 o ti rugba? Kọ o te jọ orẹwho jọ nọ o jọ otọ Soviet Union vẹre? Hayo kọ o ti nwene oma riẹriẹriẹ, wọhọ epanọ o ru no unuẹse buobu na? Kọ erẹwho efa nọ i ti ku egbọudu enua a te wha oma-uhrowo ekwakwa-ẹmo ikuo okpokpọ ze nọ u bi ti kpomahọ evuhumu ovie ọyena? Oke ọvo o te k’iyo enọ eyena. O rẹ jọ oware areghẹ re ma whaha ogbẹfodẹ. Okenọ ovie obọ ẹkpẹlobọ-ọre na ọ tẹ wọ ohọre urere riẹ ze, orugba eruẹaruẹ e te jọ vevẹ kẹ enọ i wo orimuo Ebaibol kpobi.—Rri “Ivie Evaọ Daniẹl Uzou avọ 11,” evaọ ẹwẹ-obe avọ 284.

22. Didi enọ e roma via kpahe ohọre urere ọrọ ovie obọ ẹkpẹlobọ-ọre na?

²² Rekọ, ma riẹ owọ nọ ovie obọ ẹkpẹlobọ-ọre na ọ te jẹ kẹle. Avọ oma nọ u ti tu ei fiki iyẹrẹ nọ i no “obọ ovatha-ọre gbe ẹkpẹlobọ-ọre tha,” ọ te w’owọ ẹmo re o “kpe ibuobu muotọ.” Ono a wọ ẹmo ọnana so? Kọ didi “usi” o wha ohọre onana ze?

EGUEGUE FIKI IYẸRẸ IMUOZỌ

23. (a) Didi ikpeware e te roma via taure Amagẹdọn o te te? (b) Amono họ ivie nọ i ti no “obọ ovatha-ọre gbe ẹkpẹlobọ-ọre tha” na?

²³ Roro kpahe oware nọ obe Eviavia o ta kpahe ekuhọ Babilọn Ologbo na, isuẹsu egagọ ọrue akpọ. Taure Amagẹdọn, “ẹmo ologbo Ọghẹnẹ Erumeru na” o te ti te, a te rehọ ‘erae mahe’ ọwegrẹ ologbo egagọ uzẹme ọnana. (Eviavia 16:14, 16; 18:2-8) A rehọ egebule avọ ezeza ọrọ ofu Ọghẹnẹ nọ a kuku ethẹ Yufretis ẹwoho na dhesẹ ọraha riẹ. Ethẹ na ọ tẹ ya re a ‘ruẹrẹ edhere họ kẹ ivie obọ ovatha-ọre na.’ (Eviavia 16:12) Amono họ ivie enana? Ivie na họ Jihova Ọghẹnẹ avọ Jesu Kristi!—Wawo Aizaya 41:2; 46:10, 11.

24. Didi iruẹru Jihova i ti guegue ovie obọ ẹkpẹlobọ-ọre na?

²⁴ A jọ obe Eviavia dhesẹ ọraha Babilọn Ologbo na vevẹ, onọ o ta nọ: “Izei ikpe nọ whọ ruẹrẹ na [ivie nọ i ti su evaọ oke urere na], ae gbe arao na [Okugbe Erẹwho na], a re ti mukpahe ogberẹ na; a re ti fi ei họ ababọ avọ ẹbẹba, a rẹ te raha oma riẹ no, a vẹ rehọ erae mahe iẹ.” (Eviavia 17:16) Fikieme isu na a jẹ te raha Babilọn Ologbo na? Keme “Ọghẹnẹ o fi ẹzi na họ ae eva re a ruẹse ru orọ eva riẹ.” (Eviavia 17:17) Udevie isu enana họ ovie obọ ẹkpẹlobọ-ọre na. Eme nọ o yo “no obọ ovatha-ọre” ze na o sae jọ iruẹru Jihova ọnana, okenọ o ti fi ei họ idu isu ahwo-akpọ re a raha ogberẹ egagọ ologbo na.

26. Wọhọ epanọ eruẹaruẹ Izikiẹl i dhesẹ, ẹvẹ usi nọ u ti no “ẹkpẹlobọ-ọre” tha na o te rọ ze?

²⁶ Izikiẹl, ọnọ ọ jẹ rria evaọ oke Daniẹl, ọ ruẹaro re kpahe ohọre nọ a te họre ahwo Ọghẹnẹ “eva ẹdẹ urere” na. Ọ ta nọ Gọg obọ Magọg, koyehọ, Setan Ẹdhọ na, họ ọnọ ọ te wha egrẹ na ze. (Izikiẹl 38:14, 16) Evaọ edhere ẹwoho, ofẹ vẹ Gọg o ti noze? Jihova ọ rehọ Izikiẹl ta nọ: “No ẹkpẹlobọ-ọre vievie” ze. (Izikiẹl 38:15) Epanọ ohọre onana o te ga te kpobi, o te raha ahwo Jihova ha. Oware nọ o te wha ohọre onana ze họ owọ nọ Jihova ọ jẹ no re ọ ruẹse raha egbaẹmo Gọg. Fikiere, Jihova ọ ta kẹ Setan nọ: “Mẹ vẹ te jẹ oghọlọ họ owhẹ agba, mẹ vẹ te rehọ owhẹ ze.” “Mẹ vẹ rehọ owhẹ ze oria uthabọ [ẹkpẹlobọ-ọre], me ve ti su owhẹ rọsuọ igbehru Izrẹl.” (Izikiẹl 38:4; 39:2) Fikiere, ma rẹ sae ta nọ Jihova họ ọnọ ọ wha usi nọ u no ‘ugbothabọ ẹkpẹlobọ-ọre’ ze nọ o dha ovie obọ ẹkpẹlobọ-ọre na eva na. Rekọ oware nọ usi nọ u ti “no obọ ovatha-ọre gbe ẹkpẹlobọ-ọre tha” na o te jọ, Ọghẹnẹ ọvo ọ rẹ sae ta, oke u ve je dhesẹ iẹe via.

27. (a) Fikieme Gọg o ti ro gele erẹwho na, kugbe ovie obọ ẹkpẹlobọ-ọre na, re a họre ahwo Jihova? (b) Eme ọ te jọ iyẹrẹ ohọre Gọg?

²⁷ Rọ kẹ Gọg, ọ te wọ ohọre riẹ ze fiki ẹvi ‘Izrẹl Ọghẹnẹ,’ ọnọ, kugbe “otu obuobu” ọrọ “igodẹ efa” na, a gbẹ rọ abọ akpọ riẹ hẹ. (Ahwo Galesha 6:16; Eviavia 7:9; Jọn 10:16; 17:15, 16; 1 Jọn 5:19) Gọg ọ be rọ oma ẹkoko rri “ahwo kpobi nọ a no erẹwho efa ze avọ ithuru gbe ekuakua [abọ-ẹzi] rai kpobi.” (Izikiẹl 38:12) Bi rri uyero abọ-ẹzi Ileleikristi na wọhọ “emewho ekakao nọ a bọ igbẹhẹ họ họ” nọ a rẹ vẹro kuẹku, Gọg ọ tẹ dawo uthoma riẹ kpobi re o si ọzadhe ọnana no ọnọ ọ be whaha iẹe esuo akpọ na kpobi na. Rekọ o kie. (Izikiẹl 38:11, 18; 39:4) Okenọ ivie otọakpọ na, kugbe ovie obọ ẹkpẹlobọ-ọre na, a te họre ahwo Jihova, a vẹ te ‘ziọ ekuhọ rai.’

‘OVIE NA Ọ TE ZIỌ EKUHỌ RIẸ’

28. Eme ma riẹ kpahe obaro ovie obọ ẹkpẹlobọ-ọre na gbe ovie obọ obọze-ọre na?

²⁸ Ohọre urere ọrọ ovie obọ ẹkpẹlobọ-ọre na o te rọ so ovie obọ obọze-ọre na ha. Fikiere, ovie obọ ẹkpẹlobọ-ọre na ọ ziọ ekuhọ riẹ evaọ obọ ọwegrẹ ologbo riẹ na ha. Epọvo na, orọnikọ ovie obọ obọze-ọre na họ ọnọ ọ te raha ovie obọ ẹkpẹlobọ-ọre na ha. Orọnikọ “obọ ohwo” o te raha ovie obọ obọze-ọre na ha, rekọ Uvie Ọghẹnẹ.a (Daniẹl 8:25) Evaọ uzẹme, Uvie Ọghẹnẹ o ti si ivie otọakpọ kpobi no, eva ohọre Amagẹdọn, yọ u muẹro nọ onana họ oware nọ o te via kẹ ovie obọ ẹkpẹlobọ-ọre na. (Daniẹl 2:44) Daniẹl 11:44, 45 o dhesẹ eware nọ i ti su kpohọ ohọre urere na. Agbẹta nọ “ohwo ọvuọvo o re ti fiobọhọ” họ na evaọ okenọ ovie obọ ẹkpẹlobọ-ọre ọ te ziọ ekuhọ riẹ na!