⁹ Habakuk ọ tẹ gaviezọ ziezi kẹ eme efa Ọghẹnẹ, nọ a kere fihọ Habakuk 1:6-11. Onana họ ovuẹ Jihova—yọ uvumọ ọghẹnẹ ọrue hayo ẹmẹdhọ owhuowhu ọ rẹ sai bru orugba riẹ dhe he: “Mẹ lẹliẹ ahwo Kaldia họ, orẹwho oyayare avọ ọwhọ, nọ ọ nya okẹkẹe akpọ na duwu, re a rehọ etọ nọ e rọ erai hi. Enọ e vọ avọ ozọ gbe idudu, nọ oziẹ-obro avọ oma-oro i re no oma rai tha. Enyenya rai i siawọ vi ekpẹ, a muozọ vi erao-ijihẹ owọwọ; edhẹ-enyenya rai e rẹ nya avọ omovia, e, edhẹ-enyenya rai a no ugbo ze, a siawọ vi ugo nọ o be ra nya e re emu. Fiki ofu ọgaga a rọ nyaze; idudu rai e karo kẹ ae. Enọ a mu a bu wọhọ uwẹkpẹ. A se ivie ẹkoko, jẹ be rehọ isu rai zaharo. A be hwẹ oria adhẹzọ rai kpobi, keme a tọ ẹkpẹ kuku no a vẹ whẹ e. Kẹse na a re ti hwere otu nọ o ruthọ kufiẹ wọhọ ofou, enọ ogaga rai e rọ ọghẹnẹ rai!”

11. Ẹvẹ who re dhesẹ egbaẹmo Babilọn nọ e te wọ ohọre ziọ Juda?

¹¹ Enyenya Babilọn i siawọ vi ẹkpẹ ọgbohrẹ. Egbaẹmo riẹ i muozọ vi erao-ijihẹ nọ ohọo u bi kpe nọ e be gwọlọ emu evaọ aso. Avọ ọwhọ, ‘enyenya rai i bi zuawọ họ otọ na’ ababọ odiri. No ugbobọ Babilọn ze a rehọ ovao rri Juda. Avọ awọ nọ a bi si wọhọ ugo nọ u bi siawọ bru emamọ emuore, ahwo Kaldia a te vabọ tu ewegrẹ rai obọnana. Kọ onana o te jọ ọraha, ohọre ikpregede umutho isoja jọ ọvo? Kakaka! “Fiki ofu ọgaga a rọ nyaze,” wọhọ ogbaẹmo ulogbo nọ u bi zurie ze kẹ ọraha. Ovao rai o rọ avọ ọwhọ, a be dhẹ ruọ ofẹ ukiediwo-ọre kpohọ Juda avọ Jerusalẹm, be dhẹ vẹrẹ vẹrẹ wọhọ ofou ovatha-ọre. Egbaẹmo Babilọn a mu ahwo kpohọ igbo te epanọ a ro “bu wọhọ uwẹkpẹ.”