Eme Họ Uvie Ọghẹnẹ?

“Usiuwoma uvie na . . . ”—MATIU 24:14.

EVAỌ Ovuẹ obọ Ugbehru nọ o viodẹ gaga na, Jesu o wuhrẹ ahwo olẹ oriruo na, onọ u kugbe ayare nana: “Uvie ra oze.” Ima ahwo buobu a riẹ olẹ nana fihọ uzou jẹ wariẹe unuẹse buobu no. Obe-ofeme ulogbo jọ o ta nọ onana họ “ugogo olẹ nọ Ileleikristi kpobi a rẹ lẹ evaọ iruẹru egagọ rai.” Dede na, ibuobu nọ e rẹ lẹ olẹ nana a riẹ oware nọ Uvie na o rrọ hayo oware nọ u ti ru nọ o tẹ ze he.—Matiu 6:9, 10.

Oyena u re gbunu hu. Ilorida ichọche Kristẹndọm a be kẹ otofa sa-sa nọ i vẹ hẹ, nọ e wọso ohwohwo kpahe oware nọ Uvie na o rrọ. Osu ichọche jọ o kere nọ Uvie Ọghẹnẹ yọ “oware igbunu, . . . usu nọ ohwo ọ rẹ jọ udu riẹ wo kugbe Ọghẹnẹ uzuazọ na . . . , usu kugbe Ọghẹnẹ nọ ezae gbe eyae a re ro duku esiwo.” Ọfa ọ fotọ usiuwoma Uvie na inọ “ohrẹ kpahe ichọche na.” Yọ obe na Catechism of the Catholic Church o ta nọ: “Uvie Ọghẹnẹ [họ] ẹrẹreokie gbe udhedhẹ gbe oghọghọ evaọ Ẹzi Ọfuafo na.”

Whọ te jọ ẹwẹ-obe avọ 2 ọrọ emagazini nana ruẹ otofa uvevẹ orọ Uvie Ọghẹnẹ. O ta nọ: “Uvie Ọghẹnẹ, onọ o rrọ uvi egọmeti evaọ obọ odhiwu, u ti si emuemu kpobi no kẹle u ve ti nwene otọakpọ na zihe ruọ aparadase.” Joma ruẹ epanọ Ebaibol na ọ rọ tha otofa nana uke.

Otu nọ O ti Su Otọakpọ na Kpobi Evaọ Obaro

Uvie yọ egọmeti nọ ovie o bi jo su ahwo. Jesu Kristi nọ a kpare no uwhu ze no na họ Ovie ọrọ Uvie Ọghẹnẹ. A jọ eruẹaruẹ nọ a kẹ Daniẹl ọruẹaro na fodẹ eromuo Jesu evaọ obọ odhiwu. Daniẹl o kere nọ: “Mẹ tẹ ruẹ eruaruẹ evaọ aso na evaọ ẹgho evaọ ehru ọjọ nọ ọ be tha wọhọ ọmọ ohwo [Jesu], o te bru ọnọ ọ rọ nọ oke anwae ze [Jihova Ọghẹnẹ] o te dikihẹ aro riẹ. Kọ ọye a rehọ isuẹsu gbe oruaro gbe uvie rọ kẹ, re ahwo kpobi, erẹwho gbe evẹrẹ kpobi, re a ruẹse gọ e; isuẹsu riẹ e rẹ jọ bẹdẹ bẹdẹ, o nọ u re re he, uvie riẹ họ onọ o rẹ raha ha.”—Daniẹl 7:13, 14.

Obe Daniẹl na u dhesẹ re inọ Ọghẹnẹ o ti ru Uvie na dikihẹ, inọ Uvie na o te raha egọmeti ahwo-akpọ kpobi, gbe inọ ohwo ọvo o ti mi ei otọ họ. Uzou avọ 2 o ta kpahe ewezẹ jọ nọ Ọghẹnẹ o ru ovie Babilọn wezẹ, onọ ọ jọ ruẹ ẹmema ologbo jọ nọ u dikihẹ kẹ egaga-esuo akpọ unọjọ utọjọ. Daniẹl ọruẹaro na ọ fotọ ewezẹ na. O kere nọ evaọ etoke urere na, “Ọghẹnẹ obọ odhiwu na ọ rẹte rehọ uvie nọ a rẹ raha ha muẹ, hayo a rẹte se isuẹsu riẹ ba kẹ amọfa ha. Ọ rẹte whọlọ ivie na kpobi ọ vẹte rehọ ai ze oba, ọ vẹte jọ bẹdẹ.”—Daniẹl 2:28, 44.

Ovie ọrọ Uvie Ọghẹnẹ o ti su goli hi. Evaọ etoke odibọgba riẹ evaọ otọakpọ, Jesu ọ kẹ ikọ riẹ nọ i wo ẹrọwọ imuẹro inọ a te kpare ae gbe ilele riẹ efa kpohọ odhiwu jẹ rehọ ae keria egbara-uvie. (Luk 22:28-30) Orọnikọ otiọ egbara-uvie ahwo-akpọ Jesu o wo họ iroro ho, keme wọhọ epanọ ọ ta, obọ odhiwu Uvie na o te jọ. Ebaibol ọ ta nọ ibe isu nana a no “k’oria k’oria gbe evẹrẹ gbe ahwo gbe orẹwho ze.” A te jọ “uvie gbe izerẹ kẹ Ọghẹnẹ mai, a vẹ te re uvie evaọ akpọ na.”—Eviavia 5:9, 10.

Oware nọ Usi Uvie na O jẹ Rrọ Emamọ Usi

Muẹrohọ inọ a kẹ Kristi Jesu udu-esuo re o su “ahwo kpobi, erẹwho gbe evẹrẹ kpobi” gbe inọ ibe-isu riẹ a te “re uvie evaọ akpọ na.” Kọ amono a te jọ otọ Uvie na? Enọ e be jẹ emamọ owọ kpahe usi uwoma nọ a bi whowho nẹnẹ na. Amọfa nọ e te jọ otọ Uvie na họ enọ a te kpare no iwhuowhu ziọ uzuazọ evaọ otọakpọ na, nọ i ti wo uvẹ uzuazọ ebẹdẹ bẹdẹ.

Ebaibol na o dhesẹ eghale nọ ahwo yena a te reawere rai evaọ otọ Uvie na. Umutho rai jọ ena:

“O ru akpọ na kpobi nọ ẹmo o je [ti] serihọ ri te oka akpọ; o te wiri uzei na, o te bru ehi na ibribro, ọ tẹ rehọ erae mahe ekẹkẹ na!”—Olezi 46:9.

“A rẹ te bọ iwou a vẹ ria ae tọ, a rẹ te kọ ọgbọ-evaene a vẹ re ibi riẹ. A gbẹ te bọ iwou no re omọfa ọ ria e he, a gbẹ te kọ no re omọfa ọ re he.”—Aizaya 65:21, 22.

“Ọghẹnẹ o ve ti ririe irui kpobi no aro rai; uwhu o gbẹte jọ ofa ha, hayo kọ uweri hi, hayo oviẹ hẹ, hayo edada ọvuọvo ho, keme eware anwae evrẹ no.”—Eviavia 21:3, 4.

“Kẹsena aro enọ itu i veti rovie, ezọ enọ i di i veti rovie; Kẹsena ọmo o veti duola wọhọ uyo, ẹrọo ọnọ o dienu ọ rẹte so ole oghọghọ.”—Aizaya 35:5, 6.

“Oke o be tha nọ enọ e rọ eva [uki] kpobi i je ti yo uru riẹ [Jesu], a vẹ te nya via, enọ i ru uwoma, e vẹ kparoma ruọ uzuazọ.”—Jọn 5:28, 29.

“Enọ e rọ oma kpotọ, e rẹ te rọ otọ na reuku; oma o rẹ te were ae evaọ omofọwẹ.”—Olezi 37:11.

Oyena ginọ emamọ usi! Ofariẹ, eruẹaruẹ Ebaibol nọ i rugba no i dhesẹ nọ oke nọ Uvie na u ti ro su otọakpọ na soso evaọ ẹrẹreokie o kẹle no.

Eme Họ Usi Uwoma Na?

“Usiuwoma . . . na . . . ”—MATIU 24:14.

ILELEIKRISTI a re whowho “usiuwoma uvie na” ẹkwoma amọfa nọ a rẹ vuẹ kpahe iẹe, dhesẹ kẹ ai inọ Uvie na họ egọmeti nọ ọ be tha nọ u ti su otọakpọ na evaọ ẹrẹreokie. Dede na, Ebaibol ọ rehọ ẹme na “usiuwoma” ta ẹme evaọ idhere efa sa-sa. Wọhọ oriruo, ma rẹ jọ Ebaibol na ruẹ eme wọhọ “usiuwoma esiwo na” (Olezi 96:2, NW); “usiuwoma Ọghẹnẹ” (Ahwo Rom 15:16); gbe “usiuwoma Jesu Kristi.”—Mak 1:1.

Re a tae kpẹkpẹe, usi uwoma na o kẹre te uzẹme nọ Jesu o wuhrẹ ahwo kpahe na, onọ ilele riẹ a kere fihotọ na. Taure Jesu o te ti muvrẹ kpohọ odhiwu, ọ vuẹ ilele riẹ nọ: “Fikiere wha wuhrẹ ahwo erẹwho kpobi, wha họ ae ame evaọ odẹ Ọsẹ, gbe Ọmọ gbe Ẹzi Ẹri, wha wuhrẹ ai, re a ru eware kpobi nọ mẹ vuẹ owhai.” (Matiu 28:19, 20) Fikiere, orọnikọ Ileleikristi uzẹme a rẹ vuẹ amọfa kpahe Uvie na ọvo ho; o gwọlọ nọ a re je ru ilele.

Ẹvẹ ichọche na i bi ru te evaọ abọ nana? Ahwo nọ a wo otoriẹ oware nọ Uvie na o rrọ họ a sai wuhrẹ amọfa kpahe iẹe gbagba ha. Ukpoye, a bi whowho ovuẹ nọ o rẹ were ahwo ezọ kpahe erọvrẹ izieraha avọ ẹrọwọ nọ a re fihọ Jesu. A be jẹ gwọlọ wo ilele tobọ ẹkwoma eware iwoma nọ a re ru kẹ ahwo hayo esipito, isukulu gbe iwou nọ a rẹ bọ kẹ iyogbere. Dede nọ iruẹru itieye na e rẹ sai se ahwo ziọ ichọche, e rẹ sai ru ahwo jọ uvi Ileleikristi nọ e ginẹ gwọlọ rọ udu kpobi rria lele eware nọ Jesu o wuhrẹ hẹ.

Owuhrẹ-egagọ jọ o kere nọ: “Isu egagọ Ileleikristi buobu a rọwo inọ o rrọ iruo nọ u te omai re ma ru ilele kẹ Jesu je wuhrẹ ae re a ru eware kpobi nọ Jesu ọ ta. . . . Iruo nana nọ Jesu ọ kẹ ilele riẹ na o rrọ vevẹ. Ma bi ru oware nọ ọ ta ha. Ma be rọ osegboja kpama re ma ru ei hi. Yọ o wọhọ nọ ma tubẹ riẹ epanọ ma re ro ru ei hi.”

Epọvo na re, evaọ ọkiẹriwo jọ nọ a jọ kiẹ ahwo ichọche Kathọlik evaọ obọ America riwi, ahwo udhone gbe ikpegbisoi evaọ udhusoi kpobi a rọwo nọ usiuwoma nọ a rẹ ta yọ abọjọ orọwọ rai. Dede na, enwenọ aikpobi a wo eriwo inọ edhere nọ ọ mai fo nọ a re ro ru onana họ, uruemu rai nọ a re ro fi oriruo hotọ kẹ amọfa orọnikọ unu rai nọ a rẹ rọ ta usiuwoma ha. Omọvo rai jọ nọ a kiẹriwi ọ ta nọ: “Orọnikọ eme, eme, eme nọ a rẹ ta họ Usiuwoma na ha. O gwọlọ nọ ma rẹ rehọ oma mai dhesẹ Usi Uwoma na via.” Obe-usi na, U.S. Catholic, nọ a jọ dhesẹ ọkiẹriwo na via o ta nọ ibuobu rai a be gwọlọ ta orọwọ rai via ha fiki “ekpehre odẹ nọ uruemu ọgbaduo nọ o roma via no evaọ ichọche na o wha se ai no gbe ebẹbẹ nọ iwuhrẹ ichọche rai e be wha ze.”

Evaọ oria ofa, ibishọpo ọrọ ichọche Methodist nọ ọ be rẹrote ubrotọ jọ ọ vioja inọ ichọche riẹ e tahaku jẹ ghale no, ababọ ajọwha nọ a rẹ rọ wha iruẹru rai haro, yọ uruemu rai u wo ohẹriẹ hẹ no orọ amọfa gheghe. Ọ nọ avọ oma uweri inọ: “Amono a bi gine whowho usi uwoma Uvie na evaọ uvi edhere?”

Ibishọpo na ọ kuyo onọ riẹ na ha. Rekọ onọ na u wo uyo. Who ti duku uyo na evaọ uzoẹme nọ o rrọ aro na.

[Ẹme nọ a fi ẹgba họ nọ ọ rrọ ẹwẹ-obe avọ 6]

Usi uwoma na u wobọ kpahe Uvie Ọghẹnẹ gbe esiwo ẹkwoma ẹrọwọ nọ a re fihọ Jesu Kristi