9. Eme họ otofa ẹme Jesu, onọ a kere eva Matiu 24:36 na?

⁹ Iruo usiuwoma ota Uvie nọ a ruaro riẹ na gbe abọ ọfa oka ọzino Jesu i bi rugba obọnana. Fikiere, urere eyero-akpọ omuemu ọnana ọ kẹlino. Uzẹme, Jesu ọ ta nọ: “Rekọ ẹdẹ ọyena gbe oke oyena ohwo ọvo ọ riẹ hẹ, makọ ikọ nọ e rọ obọ odhiwu, hayo Ọmọ dede, rekọ Ọsẹ na ọvo.” (Matiu 24:4-14, 36) Rekọ eruaruẹ Jesu e rẹ sai fiobọhọ k’omai ruẹrẹ oma kpahe kẹ “ẹdẹ ọyena gbe oke oyena.”

14. Eme Jihova ọ ta kẹ Noa uwhremu na, kọ fikieme?

¹⁴ Nọ okọ na o kẹle ere no, ẹsejọhọ Noa o roro nọ Ẹvo na ọ kẹlino, dede nọ ọ riẹ uzedhe ẹdẹ nọ ọ te rọ via ha. Uwhremu na Jihova ọ tẹ ghinẹ ta kẹe nọ: “Keme eva edẹ ihrẹ nọ e be tha na, me re ti vi oso tha otọ akpọ na udhẹdẹ-uvẹ gbe udheaso-uvẹ.” (Emuhọ 7:4) Oyena o tẹ nwane kẹ Noa avọ uviuwou riẹ oke lelele re a rehọ oghẹrẹ erao nọ a gwọlọ kpobi rueva gbe ae oma rai taure Ẹvo na o te ti muhọ. U du fo re ma riẹ ẹdẹ gbe auwa nọ araha eyero ọnana o ti ro muhọ họ; a k’omai iruo esiwo erao ho, yọ ahwo nọ a bi rẹro azọ a be ruọ okọ uwoho na enẹna, aparadase ẹzi ọrọ ahwo Ọghẹnẹ.