9. Eriwo ọthọthọ vẹ ahwo jọ a wo kpahe ebrẹdi nọ Jesu o ro ru Emu Owọwọ na?

⁹ Ikpichọche jọ a rẹ ta nọ oware nọ Jesu ọ ta họ: ‘Onana họ oma mẹ,’ fikiere a rọwo nọ ebrẹdi na o rehọ edhere igbunu zihe ro ugboma Jesu. Rekọ oware utioye o via ha.a Jesu ọ jọ kugbe ikọ na avọ oma ọkọkọ evaọ okenọ ọ jẹ ta ẹme na, yọ ebrẹdi nọ ọ kare ẹvi nọ a be te re na ọ jọ aro rai evaọ oke ovona. O rrọ vevẹ, Jesu ọ ta ẹme na ro dhesẹ oware, yọ oghẹrẹ utioye ọ jẹ hae rọ ta ẹme ẹsibuobu.—Jọn 2:19-21; 4:13, 14; 10:7; 15:1.

10. Eme ebrẹdi nọ a re ro ru Emu Owọwọ Olori na o dikihẹ kẹ?

¹⁰ Ebrẹdi nọ ọ jọ aro ikọ na nọ a be te re na u dikihẹ kẹ ugboma Jesu. Oghẹrẹ ugboma vẹ? Okejọ idibo Ọghẹnẹ a je roro nọ ebrẹdi na o sai dikihẹ kẹ ugboma Jesu hu, ukpoye kọ Ileleikristi nọ a rọ ẹzi wholo na, enọ Ebaibol o se “oma Kristi.” Fikieme a je ro roro ere? Fikinọ Jesu ọ bẹre ebrẹdi na ehehẹhẹ rekọ a wiri ugbonwa riẹ ovuovo ho. (Ẹf. 4:12; Rom 12:4, 5; 1 Kọr. 10:16, 17; 12:27) Rekọ nọ oke o be nyaharo na, nọ Ileleikristi na a roro didi je ru ekiakiẹ, a te ti vuhumu nọ ebrẹdi na o dikihẹ kẹ ugboma Jesu okenọ ọ jọ otọakpọ. Ẹhẹ, ugboma yena Jesu ọ rọ “ruẹ uye,” ukuhọ riẹ a te kpei. Fikiere, ebrẹdi nọ a re ro ru Emu Owọwọ Olori na o dikihẹ kẹ ugboma Jesu nọ ọ rọ “wha izieraha mai.”—1 Pita 2:21-24; 4:1; Jọn 19:33-36; Hib. 10:5-7.

15, 16. Ẹvẹ a ti ru ebrẹdi na evaọ etoke Emu Owọwọ Olori na?

¹⁵ Nọ ẹme na o te bi te ekuhọ no, ọkpako nọ o bi ru ẹme na o ve ti dhesẹ nọ oke u te no nọ a ti ro ru oware nọ Jesu ọ vuẹ ikọ riẹ nọ a ru na. Wọhọ epanọ ma ta evaọ obehru na, ebrẹdi nọ e kare ẹvi gbe udi owawae a ti ro ru oware na. A ti fi ae họ ehru emẹjẹ kẹle oria nọ oruẹme na ọ rrọ ta ẹme na. O ti se oria Ebaibol nọ o ta kpahe oware nọ Jesu o ru evaọ okenọ ọ to Emu Owọwọ Olori na họ. Wọhọ oriruo, ikuigbe nọ e rrọ obe Matiu e ta nọ: “Jesu ọ tẹ rehọ ebrẹdi o te guọvunu họ iẹ, ọ jẹ bẹrẹ iẹ, ọ tẹ rehọ iẹ kẹ ilele na, a nọ, ‘Wha rehọ, wha re; onana họ oma mẹ.’” (Mat. 26:26) Jesu o te bru ebrẹdi nọ e kare ẹvi na ibribro re e sai te ikọ riẹ nọ e keria tabọ tabọ riẹ. Evaọ ẹdẹ avọ 14 ọrọ amara April nọ a ti ro ru Ekareghẹhọ na, whọ te ruẹ ebrẹdi nọ e kare ẹvi nọ a bru ibribro fihọ imidhe nọ a sai ro ghoro ae wariẹ.