Uviemenẹ, Jihova ọ te rọ Uvie riẹ ku ebẹbẹ mai kpobi họ. Nọ emamọ usi nọ u fo nọ ahwo kpobi a re yo. Fikiere, Jesu ọ gwọlọ nọ ilele riẹ a rẹ vuẹ ahwo kpobi usi nana! (Matiu 28:19, 20) Ẹvẹ Isẹri Jihova a bi ro koko ujaje Jesu nana?

1. Ẹvẹ Matiu 24:14 o bi ro rugba nẹnẹ?

Jesu ọ ta nọ: “A te ta usi uwoma Uvie na evaọ akpọ na soso re o jọ isẹri kẹ erẹwho na kpobi.” (Matiu 24:14) Isẹri Jihova a be rọ evawere ru iruo nana nọ i wuzou gaga na. Ma be jọ akpọ na soso rọ evẹrẹ nọ i bu vi odu ọvo (1,000) ta usi uwoma na! Nọ iruo ilogbo nọ o gwọlọ nọ ma rẹ daoma fihọ gaga. Ababọ obufihọ Jihova, ma sai ru ei hi.

2. Ẹvẹ ma be daoma te re ma sae ta usi uwoma kẹ ahwo?

Ma rẹ ta usi uwoma na evaọ oria kpobi nọ ahwo a rrọ. Wọhọ Ileleikristi ikpe-udhusoi ọsosuọ, ma rẹ ta usi uwoma “no uwou ruọ uwou.” (Iruẹru Ikọ 5:42) Ma be sae rọ edhere nana ta usi uwoma na kẹ ima ahwo buobu kukpe kukpe. Nọ orọnọ ahwo a rẹ jọ uwou ẹsikpobi hi na, ma rẹ jẹ ta usi uwoma re evaọ ẹgbede. Ma rẹ gwọlọ uvẹ kpobi nọ ma rẹ rọ vuẹ amọfa kpahe Jihova gbe ẹjiroro riẹ.

3. Ono o fo nọ ọ rẹ ta usi uwoma na?

U fo nọ Ileleikristi uzẹme kpobi a rẹ ta usi uwoma na kẹ amọfa. Ma rẹ rọ iruo nana zaharo vievie he. Ma rẹ ta usi uwoma wọhọ epanọ uyero mai o kẹ omai uvẹ te keme ma riẹ nọ u re siwi uzuazọ ahwo. (Se 1 Timoti 4:16.) A be hwa omai osa fihọ iruo na ha keme Ebaibol na ọ ta nọ: “Ọvọvẹ a kẹ owhai, wha kẹ ọvọvẹ.” (Matiu 10:7, 8) Orọnikọ ohwo kpobi ọ rẹ rọwo gaviezọ kẹ omai hi. Ghele na ma rẹ gbẹ ta usi uwoma na keme ma be rọ enẹ yoẹme kẹ Jihova je ru eva were iẹe.

GBE WUHRẸ EWARE EFA

4. Ma be daoma gaga re ma sai te ahwo kpobi oma

IVIDIO: Isẹri Ise “Evaọ Oria Nọ O Mai Thabọ Evaọ Otọ-akpọ Na” (7:33)

5. Mai yọ ibe iruiruo Ọghẹnẹ

Eware buobu nọ e via no i dhesẹ nọ Jihova ọ be kpọ iruo mai na. Wọhọ oriruo, evaọ New Zealand, oniọvo-ọmọzae jọ nọ a re se Paul ọ nyaku aye jọ evaọ uvo ẹdẹ jọ nọ ọ jẹ ta usi uwoma no uwou ruọ uwou. Whaọ ohiohiẹ ẹdẹ yena, aye na o se odẹ Jihova okenọ ọ jẹ lẹ sei jẹ yare nọ ohwo jọ ọ nyabru ei ze. Paul ọ ta nọ, “nọ euwa esa e vrẹ no, me te kporo ẹthẹ aye na.”

Se 1 Ahwo Kọrint 3:9, kẹsena wha vẹ ta ẹme kpahe onọ nana:

• Ẹvẹ oware nọ o via evaọ obọ New Zealand na u ro dhesẹ nọ Jihova ọ be kpọ iruo na?

Se Iruẹru Ikọ 1:8, kẹsena wha vẹ ta ẹme kpahe onọ nana:

• Fikieme o rọ gwọlọ nọ Jihova o re fiobọhọ kẹ omai re ma sae ta usi uwoma na?

Kọ whọ riẹ?

Koka koka evaọ iwuhrẹ nọ ma re ru evaọ udevie oka na, a re wuhrẹ omai epanọ ma rẹ ta usi uwoma. Otẹrọnọ who kpohọ ewuhrẹ nana jọ no, ẹvẹ who rri eware nọ a be hai wuhrẹ na?

6. Ma bi koko ujaje Ọghẹnẹ nọ o ta nọ ma ta usi uwoma na

Evaọ ikpe-udhusoi ọsosuọ, ewegrẹ a jẹ gwọlọ whaha ilele Jesu re a siọ usi uwoma na ba ẹta. Ileleikristi oke yena a ru epanọ udu nọ a rẹ rọ ta usi uwoma na u re ro “dikihẹ evaọ abọ egọmeti.” (Ahwo Filipai 1:7) Epọvo na Isẹri Jihova a bi ru nẹnẹ re.a

IVIDIO: A be Thọ Usi Uwoma na Evaọ Abọ Uzi Egọmeti (2:28)

EME WHO WUHRẸ NO?

Jesu o jie uzi kẹ ilele riẹ nọ a ta usi uwoma na kẹ ahwo erẹwho kpobi. Jihova o bi fiobọhọ kẹ ahwo riẹ ru iruo nana.

Ọkiẹkpemu

• Oghẹrẹ vẹ a be rọ ta usi uwoma na evaọ akpọ na soso?

• Ẹvẹ usi uwoma ota mai u bi ro dhesẹ nọ ma you erivẹ mai?

• Kọ who roro nọ usi uwoma ota o rẹ lẹliẹ eva were omai? Fikieme?

KIẸ KPAHE EFA

Rri oghẹrẹ nọ Isẹri Jihova a be rọ ta usi uwoma evaọ ikpewho ilogbo.

Usiuwoma Ota Ẹgbede orọ Obọdẹ nọ A Ru Evaọ Paris (5:11)

Eme Isẹri Jihova a ru no re a sae ta usi uwoma kẹ ahwo nọ ẹmo hayo okpẹtu o le no ẹwho rai?

A rọ Ẹme Ọghẹnẹ Kuọ Ahwo nọ Ẹmo O Le (5:59)

Rri epanọ eva e be were oniọvo jọ te fikinọ ọ rọ oke uzuazọ riẹ kpobi ta usi uwoma na.

Mẹ Ghọghọ nọ Mẹ Salọ Utee Nana (6:29

Gbe se kpahe obọdẹ edhọ ekọto jọ nọ a jọ bru kẹ omai nọ u bi fiobọhọ kẹ omai ta usi uwoma na ziezi.

“Etausiuwoma Uvie na A Wọ Ẹdhọ Rai Kpohọ Ekọto” (Uvie Ọghẹnẹ U Muhọ Esuo No!, uzou avọ 13)

Jesu ọ ta nọ o gba Ileleikristi họ nọ a rẹ họ-ame. (Se Matiu 28:19, 20.) Rekọ eme họ ame-ọhọ? Kọ eme o gwọlọ nọ ohwo o re ru re ọ sae họ-ame?

1. Eme họ ame-ọhọ?

A rehọ ẹme na “họ-ame” no ẹme Griki jọ ze nọ otofa riẹ o rrọ “re a duwu” kpobọ otọ ame. Evaọ okenọ Jesu ọ họ-ame, a duwu rie fihọ ame le no evaọ Ethẹ Jọdan, kẹsena ọ tẹ “va no ame na ze.” (Mak 1:9, 10) Epọvo na re, nọ Ileleikristi uzẹme a tẹ be họ-ame, a re duwu omarai kpobi fihọ ame le no.

2. Eme ohwo ọ rẹ rọ ame-ọhọ riẹ dhesẹ?

Nọ ohwo ọ tẹ họ-ame, u re dhesẹ nọ ọ rọ omariẹ mudhe kẹ Jihova Ọghẹnẹ no. Ẹvẹ ohwo ọ rẹ rọ roma mudhe? Taure ọ tẹ te họ-ame, ọye ọvo ọ rẹ lẹ se Jihova, yọ ọ rẹ jọ olẹ na vuẹe nọ ọ gwọlọ gọe bẹdẹ bẹdẹ. Ọ rẹ ya eyaa nọ Jihova ọvo ọ te gọ, yọ oreva Ọghẹnẹ nọ o re ru o te jọ oware nọ o mai wuzou evaọ uzuazọ riẹ. Ọ rẹ jiroro nọ ọ rẹ “vro omobọ riẹ . . . o ve [bi] lele” iwuhrẹ gbe oriruo Jesu. (Matiu 16:24) Omauromudhe gbe ame-ọhọ riẹ u re ru nọ ọ sai ro wo usu okpekpe kugbe Jihova gbe amọfa nọ a be gọe.

3. Eme ohwo o re ru re ọ sae họ-ame?

Re whọ tẹ te sae họ-ame, u wuzou gaga nọ who re wuhrẹ kpahe Jihova je fi ẹrọwọ họ iẹe. (Se Ahwo Hibru 11:6.) Nọ whọ be riẹ Jihova ziezi je fi ẹrọwọ họ iẹe na, uyoyou nọ who wo kẹe u ti dhe ẹgẹga. Yọ oyena o te lẹliẹ owhẹ gwọlọ ta usi uwoma kpahe iẹe je koko izi riẹ evaọ uzuazọ ra. (2 Timoti 4:2; 1 Jọn 5:3) Nọ ohwo o te bi “yeri uzuazọ nọ u fo evaọ aro Jihova [je] ru ei eva were ziezi,” o rẹ wọe rọ uzuazọ riẹ mudhe kẹ Ọghẹnẹ jẹ họ-ame.​—Ahwo Kọlọsi 1:9, 10.a

GBE WUHRẸ EWARE EFA

4. Ma rẹ sai wuhrẹ no ame-ọhọ Jesu ze

Se Matiu 3:13-17 re who wuhrẹ eware efa kpahe ame-ọhọ Jesu. Kẹsena wha vẹ ta ẹme kpahe enọ nana:

• Kọ ọmọfofa Jesu ọ jọ evaọ okenọ ọ họ-ame?

• Oghẹrẹ vẹ a rọ họe ame? Kọ ame a frẹ ku ei?

Nọ Jesu ọ họ-ame no o ro mu obọdẹ iruo nọ Ọghẹnẹ ọ kẹ riẹ họ evaọ otọakpọ. Se Luk 3:21-23 gbe Jọn 6:38, kẹsena wha vẹ ta ẹme kpahe onọ nana:

• Nọ Jesu ọ họ-ame no, iruo vẹ ọ rọ karo evaọ uzuazọ riẹ?

5. Ame-ọhọ yọ utee nọ a rẹ sai le tobọ

Ozọ o sae dina mu owhẹ nọ who te roro kpahe omauromudhe gbe ame-ọhọ. Rekọ, jọ u mu owhẹ ẹro nọ whọ sai ru eware nọ e rẹ lẹliẹ owhẹ wo udu te epanọ whọ rẹ rọ roma mudhe jẹ họ-ame. Re whọ ruẹ iriruo ahwo jọ nọ a sai ru ere no, Kporo IVIDIO na.

IVIDIO: Epanọ Who re ro Mu Usu Kugbe Jihova (1:11)

Se Jọn 17:3 gbe Jemis 1:5, kẹsena wha vẹ ta ẹme kpahe onọ nana:

• Eme ọ rẹ sai fiobọhọ kẹ ohwo ruẹrẹ oma kpahe kẹ ame-ọhọ?

1. Oghẹrẹ nọ ma rẹ rọ roma mudhe họ, ma rẹ jọ olẹ ta kẹ Jihova nọ ma gwọlọ gọe bẹdẹ bẹdẹ

2. Ma rẹ rọ ame-ọhọ dhesẹ via kẹ amọfa nọ ma roma mudhe kẹ Ọghẹnẹ no

6. Whọ tẹ họ-ame, yọ who zihe ruọ omọvo uviuwou Jihova no

Nọ ma tẹ họ-ame no yọ ma kuomagbe uviuwou akpọ-soso nọ o rrọ okugbe ọvo no. Ghelọ oria nọ ma no ze hayo oghẹrẹ uzuazọ nọ ma yeri no otọ ze kẹhẹ, eware evona ma rọwo, ma te je bi koko izi evona evaọ uzuazọ mai. Se Olezi 25:14 gbe 1 Pita 2:17, kẹsena wha vẹ ta ẹme kpahe onọ nana:

• Nọ ohwo ọ tẹ họ-ame no, oghẹrẹ usu vẹ o re wo kugbe Jihova gbe amọfa nọ a be gọ Jihova?

EME WHO WUHRẸ NO?

Jesu ọ ta nọ o gba Ileleikristi họ nọ a rẹ họ-ame. Re ohwo ọ sae họ-ame, o gwọlọ nọ o re fi ẹrọwọ ọgaga họ Jihova, koko izi riẹ, jẹ rọ omariẹ mudhe kẹe.

Ọkiẹkpemu

• Eme họ ame-ọhọ, kọ fikieme u ro wuzou?

• Eme ohwo ọ rẹ rọ ame-ọhọ riẹ dhesẹ?

• Eme ohwo o re ru re ọ tẹ te sae họ-ame?

KIẸ KPAHE EFA

Wuhrẹ kpahe oware nọ ame-ọhọ ọ rrọ gbe oware nọ ọ rrọ họ.

“Eme Họ Ame-Ọhọ?” (Uzoẹme nọ o rrọ itanẹte)

Se kpahe eware nọ ohwo o re ru re ọ sae họ-ame.

“Uyoyou gbe Edẹro kẹ Jihova U re Ru Ohwo Họ-Ame” (Uwou-Eroro Na, Asa 2020)

Se kpahe oware nọ o lẹliẹ ọzae jọ họ-ame.

“A Gwọlọ nọ Mẹ Ọvo Mẹ Kiẹ Oware nọ Ebaibol na O Gine Wuhrẹ Via” (Uwou-Eroro Na, Asa 1, 2013)

Se kpahe oware nọ ame-ọhọ o jẹ rrọ utee nọ u fo ele gbe epanọ whọ sae rọ ruẹrẹ oma kpahe kẹe.

“Fikieme Mẹ Jẹ Họ-Ame?” (Questions Young People Ask ​—Answers That Work, Uko avọ 2, uzou avọ 37)