Ezae jọ i no obọ Ovatha-Ọre ze. Ezae nana ebuẹva-isi, ebuẹva-isi yọ ahwo nọ a ta nọ a rẹ sai rri isi obehru na a vẹ rehọ ae vuẹ ohwo oghẹrẹ nọ uzuazọ riẹ o te jọ. (Aizaya 47:13) A ruẹ “esi” jọ evaọ obonọ a be rria evaọ obọ Ovatha-Ọre, a te lele esi nana emaele buobu kpobọ Jerusalẹm, orọnikọ obọ Bẹtlẹhẹm ho.

Nọ ezae nana a te Jerusalẹm, a tẹ nọ inọ: “Diẹse ovie ahwo Ju nọ a yẹ na ọ rrọ? Keme ma ruẹ esi riẹ evaọ obọ Ovatha-Ọre, yọ ma nyaze re ma rọ uzou kpotọ kẹe.”—Matiu 2:1, 2.

Ono who roro nọ ọ jẹ rọ “esi” na su ebuẹva-isi na? Kareghẹhọ nọ esi na o su rai bru Jesu evaọ obọ Bẹtlẹhẹm ovavo ho. Obọ Jerusalẹm esi na ọ kaki su ai kpohọ, obonọ Herọd ovie nọ ọ gwọlọ kpe Jesu na ọ be rria. Yọ ọ hai ti gine kpe Jesu, Ọghẹnẹ ọ gbẹ vẹvẹ ebuẹva-isi na unu nọ a nya bru Herọd vievie he. O rrọ vevẹ nọ Setan ọwegrẹ Ọghẹnẹ nọ ọ gwọlọ Jesu kpe na, ọye ọ be gwọlọ rọ edhere nana ru ẹjiroro riẹ gba na.