1, 2. Eme ọ wọ Jesu kpohọ udhude Judia evaọ obọ emuhọ okiewhru ọrọ ukpe 29 C.E., kọ eme ọ jọ etẹe via kẹe? (Rri uwoho nọ o rrọ emuhọ uzou nana.)

O JỌ obọ emuhọ okiewhru evaọ ukpe 29 C.E., Jesu ọ rrọ udhude Judia, onọ o rrọ ofẹ ẹkpẹlobọ ovatha-ọre Abade Owhuowhu na. Nọ a họe ame jẹ rehọ iẹe mu no, ẹzi ọfuafo ọ tẹ kpọe ziọ oria nana. Jesu ọ rrọ oria nana nọ itho gbe ikiekpotọ e vọ na te edẹ udhuvẹ no, re ọ siọ emuọriọ ba, lẹ, je roro didi. O sae jọ nọ evaọ oke nana, Jihova o lele Ọmọ riẹ ta ẹme no, re ọ ruẹrẹ iẹe kpahe kẹ oware nọ o rrọ obaro tha.

3, 4. (a) Eme vẹ Setan ọ ta ro mu edawọ ivẹ ọsosuọ na họ, kọ avro kpahe eme ọ jẹ gwọlọ fihọ Jesu udu? (b) Oghẹrẹ vẹ Setan o bi ro ru epọvo na nẹnẹ?

³ Se Matiu 4:1-7. Setan ọ ta eme ẹghẹ jọ ro mu edawọ ivẹ ọsosuọ na họ inọ, “Otẹrọnọ whẹ yọ ọmọ Ọghẹnẹ.” Kọ Setan ọ be vro nọ Jesu yọ Ọmọ Ọghẹnẹ? Ijo. Ukọ-odhiwu Ọghẹnẹ yena nọ o kie no na ọ riẹ vevẹ nọ Jesu họ Ọmọ ọsosuọ Ọghẹnẹ. (Kọl. 1:15) Ababọ avro, Setan ọ tẹ jẹ riẹ nọ Jihova ọ ta ẹme no odhiwu ze evaọ okenọ Jesu ọ họ-ame, inọ: “Ọnana họ Ọmọzae mẹ, oyoyou mẹ na, ọnọ mẹ jẹrehọ.” (Mat. 3:17) Ẹsejọhọ Setan ọ gwọlọ ru Jesu wo avro sọ Ọsẹ riẹ ọ be ginẹ daezọ riẹ hayo o te ohwo nọ a re fievahọ. Evaọ odawọ ọsosuọ nọ Setan ọ dawo Jesu inọ o zihe itho ruọ ebrẹdi na, o wọhọ ẹsenọ ọ be nọe nọ: ‘Nọ orọnọ whẹ yọ Ọmọ Ọghẹnẹ na, fikieme Ọsẹ ra ọ gbẹ be kẹ owhẹ emu hu evaọ udhude nana nọ oware ovo o rrọ họ na?’ Evaọ odawọ avivẹ na, onọ ọ jọ ta kẹ Jesu nọ ọ la no ehru ugbẹhẹ nọ o wariẹ etẹmpol na họ ze na, o wọhọ ẹsenọ Setan ọ be nọe nọ: ‘Nọ orọnọ whẹ yọ Ọmọ Ọghẹnẹ na, kọ who gine fievahọ Ọsẹ ra nọ ọ te thọ owhẹ?’