Nọ Jesu, Pita, Jemis, gbe Jọn a nwrotọ no ehru ugbehru na ze, a te zere ogbotu ahwo. Oware jọ o be thọ. Otu ikere-obe na a wariẹ ikọ na họ bi lele ai vravro. Nọ ahwo na a ruẹ Jesu u gbe rai unu, a tẹ dhẹ bru rie re a yere iei. Ọ tẹ nọ ae nọ: “Eme wha bi lele ae vravro kpahe?”—Mak 9:16.

Ẹsejọhọ otu ikere-obe na a jẹ fo ilele Jesu fikinọ a sai siwi ọmọzae na ha, yọ o sae jọnọ a je se ai ẹkoko dede. Fikiere, ukpenọ Jesu ọ kpahe fihọ ẹme nọ ọzae na ọ ta kẹe na, ọ tẹ ta kẹ ogbotu na nọ: “O oge nọ ọ kare ẹrọwọ jẹ vọ avọ uzioraha, ẹvẹ mẹ rẹ jọ kugbe owhai kri te? Ẹvẹ me re thihakọ kẹ owhai kri te?” Ababọ avro, otu ikere-obe na họ enọ ọ ta eme egaga nana kẹ na, enọ i je lele ikọ riẹ vravro evaọ emu riẹ na. Kẹsena Jesu ọ tẹ rẹriẹ ovao ku ọsẹ ọmọ na, ọ tẹ ta kẹe nọ: “Rehọ ọmọ na se omẹ.”—Matiu 17:17.