2. Didi eghale Jihova ọ rẹ kẹ Isẹri riẹ nọ e họ-ame no?

Nọ whọ tẹ họ-ame no, whọ te jọ uviuwou Jihova nọ evawere e dafia. O ti dhesẹ uyoyou kẹ owhẹ evaọ idhere buobu, yọ whọ te kẹle iẹe vi epanọ whọ kẹle riẹ enẹna. (Se Malakae 3:16-18.) U te no Ọsẹ nọ Jihova ọ te jọ kẹ owhẹ no, whọ te jọ akpọ na soso wo inievo-emezae gbe erọ emetẹ nọ i you Jihova je you owhẹ. (Se Mak 10:29, 30.) Rekọ u wo eware jọ nọ who re ru taure whọ tẹ te họ-ame. O gwọlọ nọ who re wuhrẹ kpahe Jihova, who re you rie, who ve je fi ẹrọwọ họ Ọmọ riẹ. Ukuhọ riẹ, whọ vẹ rehọ uzuazọ ra mudhe kẹ Jihova. Who te ru eware nana jẹ họ-ame, kiyọ uvẹ nọ whọ te rọ reawere uzuazọ bẹdẹ bẹdẹ u rovie fihọ kẹ owhẹ no. Ẹme Ọghẹnẹ ọ ta nọ: “Ame-ọhọ, u bi siwi owhai enẹna re.”—1 Pita 3:21.

Jesu ọ ta vevẹ nọ ahwo uviuwou mai jọ a te gwọlọ nọ ma gọ Jihova ha. Se Matiu 10:34-36, kẹsena wha vẹ ta ẹme kpahe onọ nana:

• Nọ ohwo ọ tẹ jiroro nọ ọ be gọ Jihova, eme ahwo uviuwou riẹ a rẹ sai ru ei?

IVIDIO: Jihova O Kru Omai Rehọ (5:13)

• Eme who ti ru otẹrọnọ omoni ra hayo ogbẹnyusu ra jọ ọ be gwọlọ ru owhẹ re whọ siọ Jihova ba ẹgọ?

Se Olezi 27:10 gbe Mak 10:29, 30. Nọ wha te se oria ikere ọvuọvo no, wha vẹ ta ẹme kpahe onọ nana:

• Nọ ahwo uviuwou ra hayo egbẹnyusu ra a tẹ be wọso owhẹ, ẹvẹ eyaa nana e sai ro fiobọhọ kẹ owhẹ?