-
Ono Họ Jesu?Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
-
-
4. Jesu họ Ọghẹnẹ Erumeru na ha
Ebaibol na ọ vuẹ omai nọ dede nọ Jesu yọ omama ẹzi nọ o wo ogaga evaọ obọ odhiwu, ọ rrọ otọ Jihova nọ ọ rrọ Ọghẹnẹ gbe Ọsẹ riẹ na. Fikieme ma sae rọ ta ere? Kporo IVIDIO na re whọ ruẹ oware nọ Ebaibol na o wuhrẹ kpahe ohẹriẹ nọ o rrọ Jesu avọ Ọghẹnẹ erumeru na.
Eria Ebaibol nọ whọ be te ruẹ na i fiobọhọ kẹ omai riẹ ohẹriẹ nọ o rrọ Jihova avọ Jesu. Se eria Ebaibol na ọvuọvo, kẹsena wha vẹ ta ẹme kpahe enọ nọ i lele i rai na:
Se Luk 1:30-32.
Eme ukọ-odhiwu na ọ ta nọ u dhesẹ nọ Jesu o wo ohẹriẹ no Jihova Ọghẹnẹ “Ọnọ Ọ Mai Kpehru na”?
Se Matiu 3:16, 17.
Okenọ a họ Jesu ame, eme urru nọ u do no obọ odhiwu ze na o ta?
Kọ ono who roro nọ ọ ta ẹme na?
Se Jọn 14:28.
Te ọsẹ te ọmọ, ono ọ mae kpako jẹ mai wo udu-esuo?
Nọ orọnọ Jesu o se Jihova Ọsẹ riẹ na, eme oyena u dhesẹ?
Se Jọn 12:49.
Kọ who roro nọ Jesu ọ rehọ omobọ riẹ avọ Ọsẹ riẹ fihọ omọvo na?
-
-
Eme Họ Uvie Ọghẹnẹ?Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
-
-
UWUHRẸ AVỌ 31
Eme Họ Uvie Ọghẹnẹ?
Ovuẹ nọ o mai wuzou evaọ Ebaibol na họ ovuẹ kpahe Uvie Ọghẹnẹ. Jihova ọ te rọ Uvie yena ru otọakpọ na fihọ epanọ ọ gwọlọ nọ ọ jọ evaọ oke ọsosuọ nọ ọ rọ mae. Eme họ Uvie na? Ẹvẹ ma rọ riẹ nọ u bi su enẹna? Eme Uvie na u ru no? Kọ eme u ti ru evaọ obaro? Ma te jọ uwuhrẹ nana avọ iwuhrẹ ivẹ nọ e rrọ aro na kẹ uyo enọ nana.
1. Eme họ Uvie Ọghẹnẹ, kọ ono họ Ovie nọ o bi su ei?
Uvie na yọ egọmeti nọ Jihova Ọghẹnẹ o ro mu. Jesu Kristi nọ ọ rrọ Ovie riẹ o bi su evaọ obọ odhiwu. (Matiu 4:17; Jọn 18:36) Ebaibol na ọ ta kpahe Jesu nọ: “Ọ te jọ Ovie nọ o ti su . . . bẹdẹ bẹdẹ.” (Luk 1:32, 33) Nọ orọnọ Jesu họ Ovie Uvie Ọghẹnẹ na, o ti su ohwo kpobi evaọ otọakpọ na.
2. Amono a ti lele Jesu su?
Jesu ọvo o ti su evaọ Uvie na ha. Ahwo nọ a no “orua kpobi, ẹrọunu kpobi, utu ahwo gbe orẹwho kpobi ze . . . a te jọ ivie nọ i ti su otọakpọ na.” (Eviavia 5:9, 10) Bro ahwo a ti lele Kristi su? Anwẹnọ Jesu ọ rọ ziọ otọakpọ je zihe kpobọ odhiwu no na, ima ahwo buobu a zihe ruọ ilele riẹ no. Rekọ ahwo idu udhuhrẹ-gbene (144,000) ọvo a ti kpobọ odhiwu nyai lele Jesu su. (Se Eviavia 14:1-4.) Ileleikristi efa kpobi a te jọ otọ Uvie na evaọ otọakpọ.—Olezi 37:29.
3. Oghẹrẹ vẹ Uvie Ọghẹnẹ u ro woma vi egọmeti ahwo-akpọ?
Nọ isu ahwo-akpọ a tẹ make gwọlọ ru eware iwoma, a wo ogaga nọ a sai ro ru oware kpobi nọ a gwọlọ ru hu. A te su te oria amọfa a ve nwene ai, yọ ẹsejọ, ahwo yena yọ ahwo nọ a wo oriobọ nọ a gwọlọ fiobọhọ kẹ ahwo ho. Rekọ uvumọ ohwo o ti nwene Jesu nọ ọ rrọ Ovie Uvie Ọghẹnẹ na vievie he. Ebaibol na ọ ta nọ Ọghẹnẹ ọ “rehọ uvie jọ mu, onọ a te raha vievie he.” (Daniẹl 2:44) Jesu o ti su otọakpọ na soso, yọ o ti dhesẹ ọriẹwẹ vievie he. Ọ rrọ yoyou, wowou, yọ o re bru uvioziẹ. O ti wuhrẹ ahwo kpobi re a ru epọvo na, re a dhesẹ uyoyou gbe uwowou je bru uvioziẹ.—Se Aizaya 11:9.
GBE WUHRẸ EWARE EFA
Wuhrẹ kpahe oware nọ Uvie Ọghẹnẹ u ro woma vi egọmeti ohwo-akpọ.
4. Egọmeti nọ o wo ogaga o ti su otọakpọ na soso
Jesu Kristi o wo ogaga vi osu ọfa kpobi nọ o su no. Se Matiu 28:18, kẹsena wha vẹ ta ẹme kpahe onọ nana:
Ẹvẹ udu-esuo nọ Jesu o wo u ro woma vi orọ osu ohwo-akpọ jọ kpobi?
A re dhe egọmeti ohwo-akpọ enwenwene, yọ omoria jọ ọvo o re su evaọ akpọ na. Kọ ẹvẹ kpahe Uvie Ọghẹnẹ? Se Daniẹl 7:14, kẹsena wha vẹ ta ẹme kpahe enọ nana:
Fikieme u ro woma nọ “a te raha” Uvie Ọghẹnẹ hẹ?
Fikieme u ro woma nọ uvie na u ti su otọakpọ na soso?
5. O gba họ nọ a re nwene egọmeti ohwo-akpọ
Fikieme o rọ gba họ nọ Uvie Ọghẹnẹ u re nwene egọmeti ohwo-akpọ? Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.
Eme o no esuo ohwo-akpọ ze no?
Se Ọtausiuwoma Na 8:9, kẹsena wha vẹ ta ẹme kpahe enọ nana:
Kọ who roro nọ u fo re Uvie Ọghẹnẹ u nwene egọmeti ohwo-akpọ? Fikieme?
6. Isu Uvie Ọghẹnẹ a riẹ oghẹrẹ nọ ma rrọ
Fikinọ Jesu nọ ọ rrọ Ovie mai ọ jọ ohwo-akpọ no vẹre na, ọ sai “roro kẹ omai . . . evaọ oria nọ ma jọ ga ha.” (Ahwo Hibru 4:15) Te ezae te eyae nọ i bu te idu udhuhrẹ-gbene (144,000) nọ i ti lele Jesu su na yọ ahwo nọ Jihova ọ salọ “no orua kpobi, ẹrọunu kpobi, utu ahwo gbe orẹwho kpobi ze.”—Eviavia 5:9.
Kọ o were owhẹ inọ Jesu avọ ahwo kpobi nọ a ti lele iei su na a jọ ahwo-akpọ wọhọ owhẹ? Fikieme o rọ were owhẹ?
Jihova ọ salọ ezae gbe eyae no eria sa-sa ze re a lele Jesu su
7. Izi Uvie Ọghẹnẹ i woma vi izi egọmeti ahwo-akpọ
Egọmeti a re fi izi họ nọ e rẹ kpọ jẹ thọ ahwo nọ a rrọ otọ esuo rai. Ere ọvona Uvie Ọghẹnẹ u wo izi nọ ahwo nọ a rrọ otọ riẹ a re lele. Se 1 Ahwo Kọrint 6:9-11, kẹsena wha vẹ ta ẹme kpahe enọ nana:
Ẹvẹ who roro nọ akpọ na ọ te jọ evaọ okenọ ohwo kpobi o ti koko izi Ọghẹnẹ?a
Kọ who roro nọ u kiehọ nọ Jihova ọ rọ ta nọ ohwo kpobi nọ ọ te jọ otọ Uvie na o koko izi nana? Fikieme?
Eme u dhesẹ nọ ahwo nọ a bi koko izi nana ha a rẹ sai nwene? (Rri owọ avọ 11.)
Egọmeti o re fi izi họ nọ e rẹ thọ je fiobọhọ kẹ ahwo nọ a rrọ otọ rai. Izi Uvie Ọghẹnẹ i woma vi izi yena, yọ e rẹ thọ je fiobọhọ kẹ ahwo nọ a rrọ otọ riẹ
OHWO JỌ Ọ TẸ NỌ OWHẸ NỌ: “Eme họ Uvie Ọghẹnẹ?”
Didi uyo whọ te kẹ?
EME WHO WUHRẸ NO?
Uvie Ọghẹnẹ yọ egọmeti nọ ọ rrọ obọ odhiwu nọ o ti su otọakpọ na soso.
Ọkiẹkpemu
Amono a ti su Uvie Ọghẹnẹ?
Oghẹrẹ vẹ Uvie Ọghẹnẹ u ro woma vi egọmeti ohwo-akpọ jọ kpobi?
Izi jọ vẹ Jihova ọ gwọlọ nọ ahwo nọ a rrọ otọ Uvie na a re koko?
KIẸ KPAHE EFA
Se oware nọ Jesu o wuhrẹ ahwo kpahe oria nọ Uvie na o rrọ.
“Kọ Uvie Ọghẹnẹ Yọ Oware nọ O Rrọ Udu Ohwo?” (Uzoẹme nọ o rrọ itanẹte)
Fikieme Isẹri Jihova a rọ salọ nọ a rẹ romakpotọ kẹ esuo Uvie Ọghẹnẹ vi esuo ohwo-akpọ?
Se kpahe oware nọ Ebaibol na ọ ta kpahe ahwo idu udhuhrẹ-gbene (144,000) nọ Jihova ọ salọ nọ a ti lele Jesu su.
Eme ọ kẹ aye jọ nọ ọ jọ uwou-odi imuẹro inọ Ọghẹnẹ ọvo o rẹ sai si okienyẹ no akpọ na?
“Oghẹrẹ nọ Mẹ rọ Riẹ Epanọ Okienyẹ O ti ro Notọ” (Awake!, Akpegbọvo 2011)
-