Uzou avọ 2

“Edhere na, gbe Uzẹme, gbe Uzuazọ”

1, 2. Fikieme mai ọvo ma gbẹ sai ro bru Jihova ha, kọ eme Jesu Kristi o ru lọhọ kẹ omai?

KỌ WHO vru no ẹdẹjọ? Ẹsejọhọ whọ kareghẹhọ ẹdẹjọ nọ who je kpohọ erẹ nyae ruẹ ogbẹnyusu hayo omoni ra jọ, rekọ edhere na o tẹ bada owhẹ aro. Kọ whọ nọ ohwo jọ re o dhesẹ edhere na kẹ owhẹ? Dai roro epanọ eva e rẹ were owhẹ te nọ ohwo jọ ọ tẹ ta kẹ owhẹ nọ: “Lele omẹ re me su owhẹ te etẹe,” orọnikọ ọ rọ unu dhesẹ oria na kẹ owhẹ ọvo ho. Ababọ avro, udu u re te owhẹ otọ!

² Oware utioye Jesu Kristi o ru kẹ omai. Ababọ riẹ, ma rẹ sai wo usu kugbe Ọghẹnẹ hẹ. Fiki izieraha gbe sebaẹgba, ahwo-akpọ kpobi a “vru [no] uzuazọ nọ Ọghẹnẹ ọ kẹ rae.” (Ahwo Ẹfẹsọs 4:17, 18) Re ma sae riẹ edhere nọ ma rẹ nya, ma gwọlọ obufihọ. Orọnikọ Jesu ọ kẹ omai ehrẹ gbe ekpọvio ọvo ho; o ru viere. Wọhọ epanọ ma ruẹ evaọ Uzoẹme ọsosuọ na, Jesu ọ kẹ uzizie na inọ: ‘Nyaze whọ jọ olele mẹ.’ (Mak 10:21) Ọ tẹ jẹ kẹ omai ẹjiroro nọ ma rẹ rọ jẹ uzizie riẹ na rehọ. Okejọ Jesu ọ ta nọ: “Mẹ họ edhere na, gbe uzẹme, gbe uzuazọ; ohwo ọvo o bru Ọsẹ na ze he, rekọ fiki mẹ.” (Jọn 14:6) Joma ta kpahe eware jọ nọ e soriẹ ze nọ ma sae rọ rehọ ẹkwoma Ọmọ na ọvo wo usu kugbe Ọsẹ na. Eware nana i ve ti fi obọ họ kẹ omai riẹ oghẹrẹ nọ Jesu ọ rọ ginẹ rrọ “edhere na, gbe uzẹme, gbe uzuazọ.”

Obọdẹ Ọkwa Evaọ Ẹjiroro Jihova

3. Fikieme o jẹ rọnọ ẹkwoma Jesu ma re ro bru Ọghẹnẹ?

³ Orọ ọsosuọ kpobi, ẹkwoma Jesu ma sai ro bru Ọghẹnẹ keme Jihova ọ rehọ Ọmọ riẹ mu ọkwa nọ ọ mae rro.a Ọsẹ na ọ rehọ e riẹ mu ugogo ohwo nọ o bi ro ru ẹjiroro Riẹ kpobi gba. (2 Ahwo Kọrint 1:20; Ahwo Kọlọsi 1:18-20) Re ma riẹ epanọ ọkwa Ọmọ na ọ r’oja te, u fo re ma wo otoriẹ oware nọ o via evaọ ọgbọ Idẹn, oria nọ ọzae gbe aye ọsosuọ na a jo kuomagbe Setan wọso Jihova.—Emuhọ 2:16, 17; 3:1-6.

4. Didi avro ọwọsuọ obọ Idẹn o wha ze, kọ eme Jihova ọ jiroro nọ o re ru re ọ sai si avro na no?

⁴ Ọwọsuọ obọ Idẹn na o kpare avro ologbo jọ ze: Kọ Jihova Ọghẹnẹ o bi su emama riẹ ziezi? Re o si avro nana no, Jihova ọ tẹ jiroro inọ o re vi ukọ-odhiwu riẹ jọ nọ ọ rrọ gbagba ziọ otọakpọ. Uwou nọ Ọghẹnẹ o ti vi ukọ-odhiwu na o rro thesiwa: o ti whu re ọ ruẹse kpare esuo Jihova kpehru, ọ vẹ jẹ rọ uwhu riẹ ta ahwo-akpọ no igbo. Ukọ-odhiwu nọ o ti vi ze na o te kru ẹrọwọ riẹ rite uwhu, o ti si ebẹbẹ kpobi nọ ọwọsuọ Setan ọ wha ze no. (Ahwo Hibru 2:14, 15; 1 Jọn 3:8) Rekọ ikọ-odhiwu nọ Jihova o wo e rrọ buobu gbidi gbidi. (Daniẹl 7:9, 10) Ọvẹ ọ salọ re o ru oware nana nọ u wuzou gaga na? Jihova ọ jọ usu emama ẹzi nana salọ “Ọmọvo riẹ,” ọnọ a te riẹ uwhremu na wọhọ Jesu Kristi.—Jọn 3:16.

5, 6. Ẹvẹ Jihova o ro dhesẹ inọ o fievahọ Ọmọ riẹ, kọ fikieme o ro wo evaifihọ itieye?

⁵ Kọ u gbe omai unu inọ Jesu họ ọnọ Jihova ọ salọ? Vievie! Ọsẹ na o fi eva kpobi họ Ọmọ ọvo riẹ na. Ikpe buobu taure Ọmọ riẹ ọ tẹ te ziọ otọakpọ, Jihova ọ ta inọ Ọmọ nana o ti kru ẹrọwọ riẹ ghelọ uye-oruẹ kpobi. (Aizaya 53:3-7, 10-12; Iruẹru Ikọ Na 8:32-35) Dai roro oware nọ eme yena i dhesẹ. Wọhọ ijẹle gbe ahwo-akpọ, Ọmọ na ọ rẹ sae salọ onọ u je rie. Ghele na, Jihova o fievahọ Ọmọ na te epanọ ọ rọ ta inọ o ti kru ẹrọwọ riẹ te urere. Eme ọ lẹliẹ Jihova fievahọ Ọmọ na te ere? Ọ riẹ Ọmọ riẹ totọ, ọ tẹ jẹ riẹ epanọ Ọmọ na ọ gwọlọ ru ei eva were te. (Jọn 8:29; 14:31) Ọmọ na o you Ọsẹ riẹ, Jihova omariẹ o you Ọmọ Riẹ re. (Jọn 3:35) Uyoyou nọ Ọsẹ gbe Ọmọ na a wo kẹ ohwohwo o ga te epanọ uvumọ oware o gbẹ sae rọ hẹriẹ ae he.—Ahwo Kọlọsi 3:14.

⁶ Ma te rri epanọ ọkwa Ọmọ na o wuzou te, epanọ Ọsẹ na o fievahọ iẹe te, gbe uyoyou nọ o rrọ udevie Ọsẹ na gbe Ọmọ na, kọ whọ gbẹ ruẹ oware nọ Jesu ọ rọ ta nnọ ẹkwoma riẹ ọvo ma sai ro bru Ọghẹnẹ? Ghele na, ẹjiroro ọfa jọ ọ riẹ nọ Ọmọ na ọvo ọ sai ro su omai bru Ọsẹ na.

Ọmọ na Ọvo Ọ Riẹ Ọsẹ na Totọ

7, 8. Fikieme Jesu ọ rọ ta gbagba inọ u te no “Ọmọ na” no omọfa ọ riẹ Ọsẹ na totọ họ?

⁷ Ohwo ọ tẹ gwọlọ si kẹle Jihova, u wo eware jọ nọ o re rugba tao. (Olezi 15:1-5) Kọ ogbẹrọnọ Ọmọ na ọ mae riẹ oware nọ a re ru re a sae nyate itee Ọghẹnẹ je wo ọjẹrehọ Riẹ? Jesu ọ ta nọ: “Ọsẹ mẹ ọ rehọ eware kpobi kẹ omẹ, ohwo ọvuọvo ọ riẹ Ọmọ na ha Ọsẹ ọvo, ohwo ọvuọvo ọ riẹ Ọsẹ na gbe he, Ọmọ ọvo, jegbọ ọnọ Ọmọ na ọ rẹ rehọ iẹ via kẹ.” (Matiu 11:27) Joma ruẹ oware nọ o lẹliẹ Jesu ta ududu inọ u te no “Ọmọ na” no, omọfa ọ riẹ Ọsẹ na totọ họ.

⁸ Ọmọ na, “ọnọ ọ rọ ọtuyẹ evaọ emama kpobi” na, ọye họ ọnọ ọ mae kẹle Jihova kpobi. (Ahwo Kọlọsi 1:15) Roro epanọ Ọsẹ gbe Ọmọ na a kẹle te evaọ ikpe nọ a rẹ sai kele mu hu nọ aimava ọvo a jọ kugbe taure a tẹ te ma emama ẹzi efa. (Jọn 1:3; Ahwo Kọlọsi 1:16, 17) Dai roro uvẹ-ọghọ nọ Ọmọ na o wo okenọ ọ jọ kugbe Ọsẹ riẹ, nọ o je wuhrẹ kpahe eriwo, oreva, itee, gbe idhere Ọsẹ na. Fikiere, orọnikọ ma bi bru okpa họ ẹme na ha inọ Jesu ọ riẹ Ọsẹ riẹ vi omọfa jọ kpobi. Jesu ọ kẹle Ọsẹ riẹ te epanọ ọ sai ro dhesẹ Ọsẹ na evaọ oghẹrẹ nọ omọfa ọ sai dhesẹ iẹe he.

9, 10. (a) Idhere vẹ Jesu o ro dhesẹ Ọsẹ riẹ via? (b) Re ma sai wo ọjẹrehọ Jihova, eme ma re ru hrọ?

⁹ A rẹ jọ iwuhrẹ Jesu ruẹ inọ ọ ginẹ riẹ oghẹrẹ nọ Jihova o re roro gbe oware nọ Ọ gwọlọ mi idibo Riẹ.b Jesu o dhesẹ Ọsẹ riẹ via evaọ obọdẹ edhere ọfa jọ. Ọ ta nọ: ‘Ọnọ ọ ruẹ omẹ ọ ruẹ Ọsẹ na no re.’ (Jọn 14:9) Evaọ eme nọ Jesu ọ ta gbe eware nọ o ru kpobi, ọ raro kele Ọsẹ riẹ gbagba. Fikiere, nọ ma tẹ jọ Ebaibol se kpahe Jesu, eme ọ ezi nọ ọ ta evaọ okenọ o je wuhrẹ ahwo, ohrọ nọ o wọ riẹ siwi amọfa, gbe ọdawẹ nọ o lẹliẹ irui-oviẹ su noi aro ze, nwanọ eme gbe iruemu itieye Jihova ọ hai dhesẹ. (Matiu 7:28, 29; Mak 1:40-42; Jọn 11:32-36) A rẹ jọ eme gbe uruemu Ọmọ na ruẹ idhere gbe oreva Ọsẹ na. (Jọn 5:19; 8:28; 12:49, 50) Fikiere, re ma wo ọjẹrehọ Jihova, ma rẹ kezọ kẹ iwuhrẹ Jesu ma ve je lele oriruo riẹ.—Jọn 14:23.

¹⁰ Fikinọ Jesu ọ riẹ Jihova totọ ọ tẹ jẹ rọ aro kele iei, oyejabọ nọ Jihova ọ rọ jiroro inọ ẹkwoma Ọmọ na a re ro tei oma. Nọ ma riẹ oware nọ ma sae rọ rehọ ẹkwoma Jesu ọvo bru Jihova no na, joma ta kpahe otofa eme ọ Jesu na inọ: “Mẹ họ edhere na, gbe uzẹme, gbe uzuazọ; ohwo ọvo o bru Ọsẹ na ze he, rekọ fiki mẹ.”—Jọn 14:6.

“Mẹ Họ Edhere Na”

11. (a) Fikieme o rọ rrọ inọ ẹkwoma Jesu ọvo ma sai ro wo emamọ usu kugbe Ọghẹnẹ? (b) Ẹvẹ eme nọ e rrọ Jọn 14:6 i ro dhesẹ obọdẹ ọkwa Jesu? (Rri oruvẹ-obotọ na.)

¹¹ Ma wuhrẹ no inọ ababọ Jesu ma rẹ sai si kẹle Ọghẹnẹ hẹ. Joma ta kpahe epanọ onana u ro kpomahọ omai. Jesu họ “edhere na” keme ẹkwoma riẹ ọvo ma sai ro wo emamọ usu kugbe Ọghẹnẹ. Fikieme o rọ rrọ ere? Fikinọ Jesu o kru ẹrọwọ rite uwhu, ọ rọ uzuazọ riẹ ta omai no igbo. (Matiu 20:28) O gbẹ rrọ ẹtanigbo na ha, ma rẹ sai wo usu kugbe Ọghẹnẹ hẹ. Uzioraha u bru ahwo-akpọ dhe no Ọghẹnẹ, keme Jihova ọ rrọ ọrẹri, fikiere uzioraha o rẹ were iẹe he. (Aizaya 6:3; 59:2) Rekọ idheidhe Jesu u si obrudhe na no; u voro izieraha mai no. (Ahwo Hibru 10:12; 1 Jọn 1:7) Ma tẹ jẹ idhe ẹtanigbo na rehọ je fi ẹrọwọ họ iẹe, ma rẹ sai wo aruoriwo Jihova. U te no idhe ẹtanigbo na no, edhere ọfa ọ riẹ hẹ nọ ma sai ro ‘kuomagbe Ọghẹnẹ.’c—Ahwo Rom 5:6-11.

12. Oghẹrẹ vẹ Jesu ọ rọ rrọ “edhere na”?

¹² Ma tẹ ta ẹme kpahe olẹ, Jesu họ “edhere na.” Ẹkwoma Jesu ọvo ma sai ro bru Jihova evaọ olẹ avọ imuẹro inọ ọ te kezọ kẹ ayare mai. (1 Jọn 5:13, 14) Jesu omariẹ ọ ta nọ: “Oware nọ wha jọ obọ Ọsẹ na yare, ọ rẹ te rehọ fiki odẹ mẹ kẹ owhai. . . . Yare, wha re ti wo, re oghọghọ rai o gba.” (Jọn 16:23, 24) O nwani fo inọ ma rẹ sae rọ odẹ Jesu lẹ se Jihova, ma vẹ jẹ sai se Jihova “Ọsẹ mai.” (Matiu 6:9) Abọfa nọ Jesu ọ rọ rrọ “edhere na” họ ẹkwoma oriruo riẹ. Wọhọ epanọ ma ta no vẹre na, Jesu ọ raro kele Ọsẹ riẹ gbagba. Oriruo Jesu o dhesẹ kẹ omai oghẹrẹ nọ ma re yeri uzuazọ nọ o rẹ were Jihova. Fikiere, re elẹ mai e sai te obọ Jihova, ma re lele ithihi Jesu.—1 Pita 2:21.

‘Mẹ Họ Uzẹme Na’

13, 14. (a) Ẹvẹ uzẹme o rọ jọ Jesu unu? (b) Re Jesu ọ ruẹse jọ “uzẹme” na, eme o ru, kọ fikieme?

¹³ Jesu ọ jẹ hae rọ uzẹme nọ o yo mi Ọsẹ riẹ ro wuhrẹ ahwo. (Jọn 8:40, 45, 46) A jọ unu Jesu ruẹ ẹme ẹghẹ hẹ. (1 Pita 2:22) Makọ ewegrẹ riẹ dede e ta inọ o “bi wuhrẹ edhere Ọghẹnẹ ziezi.” (Mak 12:13, 14) Rekọ nọ Jesu ọ ta inọ ‘mẹ họ uzẹme na,’ orọnikọ uzẹme nọ o je ro wuhrẹ ahwo ọvo o wo họ iroro ho. Eware efa buobu e riẹ nọ o wo họ iroro.

¹⁴ Kareghẹhọ inọ ikpe buobu taure Jesu ọ tẹ te ziọ otọakpọ, Jihova ọ kẹ idibo riẹ ẹzi ọfuafo nọ a rọ ruẹaro kpahe Jesu. Eruẹaruẹ nana e ta kpahe eware nọ e te via evaọ etoke uzuazọ, odibọgba, gbe uwhu riẹ. Fiba onana, a rẹ jọ Uzi Mosis na ruẹ eme nọ i kiekpahe Mesaya na. (Ahwo Hibru 10:1) Kọ Jesu o ti kru ẹrọwọ rite uwhu, re ọ rrọ enẹ ru eruẹaruẹ nọ e ta kpahe iẹe na gba? Ere ọvo a sai ro dhesẹ Jihova fihọ Ọghẹnẹ eruẹaruẹ uzẹme. Onana yọ owha-iruo nọ o jọ Jesu uzou. Jesu ọ rọ ẹkwoma ẹmeunu gbe uruemu riẹ ru eruẹaruẹ nana kpobi gba. (2 Ahwo Kọrint 1:20) Fiki onana, Jesu họ “uzẹme” na. Jesu họ ọnọ o gine ru eruẹaruẹ nọ e rrọ ikere na kpobi gba.—Jọn 1:17; Ahwo Kọlọsi 2:16, 17.

‘Mẹ Họ Uzuazọ Na’

15. Eme u dhesẹ re a fi ẹrọwọ họ Ọmọ na, kọ eme oyena u re su kpohọ?

¹⁵ Jesu họ “uzuazọ” na keme ẹkwoma riẹ ọvo ma sai ro wo uzuazọ, koyehọ “uvi uzuazọ” na. (1 Timoti 6:19) Ebaibol e ta nọ: “Ọnọ ọ rọwo Ọmọ na o wo uzuazọ ebẹdẹ bẹdẹ; rekọ ọnọ o yo ẹme Ọmọ na ha ọ rẹ sae ruẹ uzuazọ họ, rekọ ofu Ọghẹnẹ ọ riẹ uzou.” (Jọn 3:36) Eme u dhesẹ re a fi ẹrọwọ họ Ọmọ Ọghẹnẹ? U dhesẹ inọ u mu omai ẹro nnọ ababọ riẹ ma rẹ sai wo uzuazọ họ. Ofariẹ, u dhesẹ inọ ma be rọ iruo dhesẹ ẹrọwọ mai via, wuhrẹ mi Jesu ẹsikpobi, jẹ daoma lele iwuhrẹ gbe oriruo riẹ. (Jemis 2:26) Fikiere, ẹrọwọ nọ a re fihọ Ọmọ Ọghẹnẹ u re su ohwo kpohọ uzuazọ ebẹdẹ bẹdẹ—uzuazọ sebaewhu evaọ obọ odhiwu kẹ enọ a rọ ẹzi wholo na, “uthuru okakao” na, gbe uzuazọ ogbagba evaọ aparadase otọakpọ rọkẹ “otu obuobu” ọrọ “igodẹ efa” na.—Luk 12:32; 23:43; Eviavia 7:9-17; Jọn 10:16.

16, 17. (a) Ẹvẹ Jesu ọ te rọ jọ “uzuazọ” rọ kẹ makọ enọ i whu no? (b) Imuẹro vẹ ma wo?

¹⁶ Kọ ẹvẹ kpahe enọ i whu no? Jesu họ “uzuazọ” rọ kẹ ai re. Taure Jesu ọ tẹ te kpare Lazarọs ogbẹnyusu riẹ no uwhu ze, ọ ta kẹ Mata, oniọvo Lazarọs nọ: “Mẹ họ ẹkparomatha gbe uzuazọ: ọ nọ ọ rọwo omẹ makọ o whu no, ọ rẹ te zọ.” (Jọn 11:25) Jihova o mu “isiavẹ Uwhu gbe Ẹri” họ Ọmọ riẹ obọ, onọ u dhesẹ inọ ọ kẹ riẹ udu nọ ọ rẹ rọ kpare enọ i whu no. (Eviavia 1:17, 18) Jesu ọ te rehọ isiavẹ nana rovie ethẹ Uki, enọ e rrọ uki a vẹ te kparoma.—Jọn 5:28, 29.

¹⁷ “Mẹ họ edhere na, gbe uzẹme, gbe uzuazọ”—Jesu ọ rehọ umutho eme nana fodẹ oware nọ o lẹliẹ e riẹ ziọ otọakpọ. Eme yena e vọ avọ otofa kẹ omai nẹnẹ. Kareghẹhọ inọ, nọ Jesu ọ ta ẹme yena no, ọ tẹ ta nọ: “Ohwo ọvo o bru Ọsẹ na ze he, rekọ fiki mẹ.” (Jọn 14:6) Eme ọ Jesu i wuzou nẹnẹ wọhọ epanọ e jọ evaọ okenọ ọ gbẹ jọ otọakpọ. Fikiere, u re mu omai ẹro inọ ma te lele Jesu, ma te nya thọ họ. Ẹhẹ, ọye ọvo ọ rẹ sai su omai bru “Ọsẹ na.”