• Epanọ Ma re ro Dhesẹ nọ Ma Wo Obọ Kugbe Akpọ na Ha
    Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
    • Uwuhrẹ avọ 45. Oniọvo-ọmọtẹ ọmaha jọ nọ o dikihẹ evaọ okenọ a be so ole orẹwho, rekọ o bi lele ai so ho, yọ o fi obọ họ udu hu wọhọ ibe emọ-isukulu riẹ.

      UWUHRẸ AVỌ 45

      Epanọ Ma re ro Dhesẹ nọ Ma Wo Obọ Kugbe Akpọ na Ha

      Jesu ọ ta nọ ilele riẹ a re “wo obọ kugbe akpọ na” ha. (Jọn 15:19) Onana u dhesẹ nọ a re dhomahọ abọ ọvuọvo ho evaọ ẹme isuẹsu akpọ na gbe ẹmo. Uzẹme riẹ họ, onana o sae jọ bẹbẹ ẹsejọ. Ahwo a sai se omai ẹkoko fiki onana. Eme ma re ru re ma gbe wo obọ kugbe akpọ na ha, ma vẹ sae jọ abọ Jihova Ọghẹnẹ ọvo?

      1. Ẹvẹ Ileleikristi uzẹme a re rri egọmeti ahwo-akpọ?

      Ileleikristi a rẹ kẹ egọmeti adhẹẹ. Ma re ru oware nọ Jesu ọ ta inọ “wha hwa eware Siza zihe kẹ Siza,” koyehọ ma re koko izi orẹwho nọ ma rrọ, wọhọ osa-uzou nọ ma rẹ hwa. (Mak 12:17) Ebaibol na ọ ta nọ isu ahwo-akpọ a bi su fikinọ Jihova ọ kẹ rai uvẹ re a su. (Ahwo Rom 13:1) Fikiere umutho udu-esuo egọmeti a wo, udu-esuo rai u wo umuo nọ o ba. Ọghẹnẹ ọvo ma rẹroso nọ ọ te rọ Uvie riẹ nọ o rrọ obọ odhiwu ku ebẹbẹ ahwo-akpọ họ.

      2. Ẹvẹ ma sai ro dhesẹ nọ ma wo obọ kugbe akpọ na ha?

      Wọhọ Jesu, ma re dhomahọ isuẹsu akpọ na ha. Okenọ ahwo a ruẹ iruo igbunu jọ nọ Jesu o ru, a tẹ jẹ gwọlọ rehọ iẹe mu ovie evaọ otọakpọ, rekọ ọ rọwo ho. (Jọn 6:15) Fikieme? Ọ ta uwhremu na nọ, “Uvie mẹ u wo obọ kugbe akpọ nana ha.” (Jọn 18:36) Nọ ma rrọ ilele Jesu na, u wo idhere sa-sa nọ ma re ro dhesẹ nọ ma wo obọ kugbe akpọ na ha. Wọhọ oriruo, ma re kpohọ ẹmo ho. (Se Maeka 4:3.) Ma rẹ rọ adhẹẹ kẹ iwoho orẹwho, wọhọ obiala, rekọ ma rẹ gọ ae he. (1 Jọn 5:21) Ma rẹ jọ abọ utu esuo ọvo hayo ohwo ọvuọvo nọ ọ gwọlọ ruọ esuo ho, yọ ma rẹ wọso ae gbe he. Ma te ru eware nana gbe efa, yọ ma bi dhesẹ nọ abọ egọmeti Ọghẹnẹ ọvo ma rrọ.

      GBE WUHRẸ EWARE EFA

      Wuhrẹ kpahe eware sa-sa nọ e rẹ sai ru ei jọ bẹbẹ re ma siomano akpọ na, gbe oware nọ o rẹ sai fiobọhọ kẹ owhẹ jiroro nọ e rẹ were Jihova.

      Ọzae nọ o dhomahọ abọ ọvo ho evaọ akpọ na. Ọ be gaviezọ kẹ ahwo nọ a be gwọlọ ruọ esuo nọ a be ta ẹme kẹ ogbotu ahwo ho.

      3. Ileleikristi uzẹme a re wo obọ ọvo kugbe akpọ na ha

      Jesu avọ ilele riẹ a fi oriruo hotọ kẹ omai. Se Ahwo Rom 13:1, 5-7 gbe 1 Pita 2:13, 14. Kẹsena wha ve kporo IVIDIO na jẹ ta ẹme kpahe enọ nọ e rrọ obotọ na.

      IVIDIO: Ileleikristi Uzẹme A re Wobọ Kugbe Akpọ na Ha—Abọ 1 (4:28)

      • Fikieme ma jẹ rọ adhẹẹ kẹ egọmeti ahwo-akpọ?

      • Idhere jọ vẹ ma re ro dhesẹ nọ ma be romakpotọ kẹ ae?

      Nọ a te bi fi ẹmo, erẹwho jọ nọ e rẹ ta nọ a wo obọ kugbe ẹmo na ha a re fiobọhọ kẹ itu ahwo ivẹ nọ i bi fi ẹmo na. Rekọ ẹvẹ ohwo o re ro gine dhesẹ nọ o wo obọ kugbe oware he? Se Jọn 17:16. Kẹsena wha ve kporo IVIDIO na jẹ ta ẹme kpahe onọ nọ ọ rrọ obotọ na.

      IVIDIO: Ileleikristi Uzẹme A re Wobọ Kugbe Akpọ na Ha—Abọ avọ 2 (3:11)

      • Eme u dhesẹ re a ta nọ ohwo o wo obọ kugbe akpọ na ha?

      Eme ma re ru otẹrọnọ egọmeti ahwo-akpọ a vuẹ omai nọ ma ru oware jọ nọ o wọso uzi Ọghẹnẹ? Se Iruẹru Ikọ 5:28, 29. Kẹsena wha ve kporo IVIDIO na jẹ ta ẹme kpahe enọ nọ e rrọ obotọ na.

      IVIDIO: Ileleikristi Uzẹme A re Wobọ Kugbe Akpọ na Ha—Abọ avọ 3 (1:18)

      • Otẹrọnọ uzi nọ ohwo-akpọ o fihọ o wọso uzi Ọghẹnẹ, uzi ono ma re koko?

      • Kọ whọ sai roro kpahe eware jọ nọ Ileleikristi a rẹ jọ yoẹme kẹ egọmeti ahwo-akpọ họ?

      4. Who du wo obọ kugbe akpọ na evaọ iroro gbe iruẹru ra ha

      Se 1 Jọn 5:21. Kẹsena wha ve kporo IVIDIO na jẹ ta ẹme kpahe enọ nọ e rrọ obotọ na.

      IVIDIO: Oware nọ O jẹ Gwọlọ nọ Ileleikristi Uzẹme A re Wo Udu—Re A Siọ Oma Ba Edhehọ Akpọ Na (2:49)

      • Evaọ ividio na, fikieme Ayenge ọ rọ jiroro nọ o re kuomagbe utu esuo ohrowo ọvo ho hayo yere obiala orẹwho na ha?

      • Kọ who roro nọ emamọ iroro ọ jẹ na?

      Eware efa vẹ e rẹ sai ru ei jọ bẹbẹ re ma siọ oma ba edhehọ akpọ na? Kporo IVIDIO na, kẹsena wha vẹ ta ẹme kpahe enọ nọ e rrọ obotọ na.

      IVIDIO: Eware nọ Ma Wuhrẹ no Uwou-Eroro Ze—Whọ Jọ Abọ Ọvo Ho Evaọ Akpọ Omohẹriẹ Nana (5:16)

      • Eme ma re ru re ma gbẹ jọ abọ ọvo ho nọ erẹwho sa-sa a tẹ be zaharo kugbe, wọhọ okenọ a tẹ be fa ebọro?

      • Eme ma re ru re ma gbẹ jọ abọ ọvo ho nọ iroro nọ ahwo egọmeti a jẹ e tẹ wha uye se omai hayo wha erere se omai?

      • Ẹvẹ eware nọ ma bi yo evaọ iredio hayo etẹlẹvisiọno gbe egbẹnyusu mai e sai ro ru omai dhomahọ akpọ na?

      Iwoho na: 1. Ahwo nọ eva e be dha nọ a kru eware họ obọ bi ro dhesẹ nọ a rọwo fihọ oware jọ họ. 2. Ọzae nọ ọ kpare obiala kpehru be ghọghọ evaọ arozaha jọ, o sae jọ ebọro-efa. 3. Ọmọ-isukulu nọ ọ be so ole orẹwho. 4. Osoja nọ o kru ugbeke họ obọ. 5. Imava nọ e gwọlọ ruọ esuo nọ e be vro avro. 6. Aye nọ o bi fi obe nọ o bi ro votu họ etehe.

      Eware jọ vẹ Oleleikristi o re jo dhesẹ nọ o wo obọ kugbe akpọ na ha evaọ iroro gbe eware nọ o bi ru?

      OHWO JỌ Ọ TẸ NỌ OWHẸ NỌ: “Fikieme who gbe ro yere obiala hayo so ole orẹwho na ha?”

      • Didi uyo whọ te kẹe?

      EME WHO WUHRẸ NO?

      Ileleikristi a rẹ daoma gaga re a gbe wo obọ kugbe isuẹsu akpọ na evaọ iroro, ẹmeunu, gbe iruẹru rai hi.

      Ọkiẹkpemu

      • Ẹvẹ ma re rri egọmeti ahwo-akpọ?

      • Fikieme ma gbe ro wo obọ ọvo evaọ isuẹsu akpọ na ha?

      • Eware jọ vẹ e rẹ sai ru ei jọ bẹbẹ re ma siomano akpọ na?

      Utee nọ whọ rẹ sai fihọ

      KIẸ KPAHE EFA

      Eware jọ vẹ ma sai siobọno re ma siọ obọ ba ewo kugbe akpọ na?

      Jihova O ri Fi Omai Hotọ Ẹdẹvo Ho (3:14)

      Eme ahwo uviuwou a rẹ sai ru rọ ruẹrẹ oma kpahe kẹ eware nọ e sai ru ei jọ bẹbẹ re a siomano akpọ na?

      Ma re Wo Obọ Kugbe Akpọ na Evaọ Eria Erozaha Ẹgbede He (4:25)

      Orọnikọ orẹwho ohwo nọ ọ rẹ thọ họ ọghọ nọ ọ mae rro nọ ohwo o re wo ho, fikieme o rọ rrọ ere?

      “Ọghẹnẹ Ọ Rẹ Sai Ru Eware Kpobi” (5:19)

      Se kpahe epanọ who gbe ro wo obọ kugbe akpọ na ha nọ whọ tẹ be jiroro oghẹrẹ iruo nọ who re ru.

      “Kohwo Kohwo Ọvuọ Owha Riẹ Ọ rẹ Te Wha” (Uwou-Eroro Na, Ane 1, 2006)

  • Whọ Sai Thihakọ Ukpokpoma
    Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere

    • Uviemenẹ hayo evaọ obaro, Ileleikristi kpobi a te rẹriẹ ovao dhe ọwọsuọ, makọ ukpokpoma dede. Kọ onana o rẹ lẹliẹ ozọ mu omai?

      1. Fikieme ma re ro rẹro ukpokpoma?

      Ebaibol na ọ ta vevẹ nọ: “Ahwo kpobi nọ a gwọlọ yeri uzuazọ omarọkẹ Ọghẹnẹ evaọ usu kugbe Kristi Jesu a ti kpokpo ai re.” (2 Timoti 3:12) A kpokpo Jesu keme o wo obọ kugbe akpọ Setan he. Mai omamai ma wo obọ kugbe akpọ na gbe he, fikiere u re gbe omai unu hu nọ egọmeti akpọ nana avọ egagọ sa-sa nọ e rrọ akpọ na a te bi kpokpo omai.—Jọn 15:18, 19.

      2. Ẹvẹ ma sae rọ ruẹrẹ oma kpahe kẹ ukpokpoma?

      O gwọlọ nọ ma rẹ rẹroso Jihova gaga enẹna. Wo oke nọ whọ rẹ rọ lẹ se Jihova kẹdẹ kẹdẹ je se oria jọ evaọ Ebaibol na. Hai kpohọ iwuhrẹ ukoko kẹse kẹse. Who te bi ru eware nana who ti wo ẹgba nọ whọ sai ro thihakọ ukpokpoma kpobi ududu, o tẹ make rọnọ obọ ahwo uviuwou ra u bi no ze dede. Pọl ukọ na nọ a kpokpo gaga, o kere nọ: “Jihova họ ọnọ o bi fiobọhọ kẹ omẹ; ozọ u re mu omẹ hẹ.”—Ahwo Hibru 13:6.

      Usi uwoma nọ ma rẹ ta kẹse kẹse u re je ru omai wo udu. U re ru omai fievahọ Jihova, je ru nọ ma gbẹ dhozọ ohwo-akpọ họ. (Itẹ 29:25) Who te wo udu nọ whọ be sae rọ ta usi uwoma enẹna, u ti fiobọhọ kẹ owhẹ ziezi nọ whọ te gbẹ sai ro ru ere o tẹ make rọnọ egọmeti ọ whaha iruo usi uwoma ota mai dede.—1 Ahwo Tẹsalonika 2:2.

      3. Irere vẹ i re te omai nọ ma te bi thihakọ ukpokpoma?

      Orọnikọ ukpokpoma o rẹ were omai oma ha, rekọ nọ ma te bi thihakọ ukpokpoma, o rẹ lẹliẹ ẹrọwọ mai ga vi epaọ anwẹdẹ. Ma re si kẹle Jihova vi epaọ anwẹdẹ, keme ma rẹ ruẹ nọ o bi fiobọhọ kẹ omai nọ o tẹ make be bẹ omai no. (Se Jemis 1:2-4.) Nọ ma tẹ be ruẹ uye, o rẹ da Jihova, rekọ nọ ma te bi thihakọ, o rẹ were iẹe. Ebaibol na ọ ta nọ: “Otẹrọnọ who bi thihakọ uye fikinọ who bi ru ewoma, onana yọ oware nọ u kiehọ evaọ aro Ọghẹnẹ.” (1 Pita 2:20) Ohwo kpobi nọ o thihakọ te urere, Jihova ọ te rehọ uzuazọ ebẹdẹ bẹdẹ hwosa kẹe evaọ akpọ nọ ohwo ọvo ọ te jọ wọso egagọ uzẹme he.—Matiu 24:13.

      GBE WUHRẸ EWARE EFA

      Wuhrẹ kpahe epanọ ohwo ọ sae rọ talamu Jihova ghelọ ukpokpoma, gbe eghale nọ i re tei.

      Ọmọtẹ nọ ọ be nyabru ohwo nọ o re wuhrẹ iẹe Ebaibol dede nọ ọsẹgboni riẹ a be wọso ẹe.

      4. Whọ sai thihakọ nọ ahwo uviuwou ra a tẹ be wọso owhẹ

      Jesu ọ ta vevẹ nọ ahwo uviuwou mai jọ a te gwọlọ nọ ma gọ Jihova ha. Se Matiu 10:34-36, kẹsena wha vẹ ta ẹme kpahe onọ nana:

      • Nọ ohwo ọ tẹ jiroro nọ ọ be gọ Jihova, eme ahwo uviuwou riẹ a rẹ sai ru ei?

      Re whọ ruẹ oriruo jọ, kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

      IVIDIO: Jihova O Kru Omai Rehọ (5:13)

      • Eme who ti ru otẹrọnọ omoni ra hayo ogbẹnyusu ra jọ ọ be gwọlọ ru owhẹ re whọ siọ Jihova ba ẹgọ?

      Se Olezi 27:10 gbe Mak 10:29, 30. Nọ wha te se oria ikere ọvuọvo no, wha vẹ ta ẹme kpahe onọ nana:

      • Nọ ahwo uviuwou ra hayo egbẹnyusu ra a tẹ be wọso owhẹ, ẹvẹ eyaa nana e sai ro fiobọhọ kẹ owhẹ?

      5. A tẹ maki bi kpokpọ owhẹ, gbẹ gọ Jihova

      Nọ amọfa a tẹ be gwọlọ ru omai re ma siọ Jihova ba ẹgọ, o gwọlọ nọ ma re wo udu re ma gbẹ sae gọ Jihova. Kporo IVIDIO na, kẹsena wha vẹ ta ẹme kpahe onọ nọ ọ rrọ obotọ na.

      IVIDIO: A Dhesẹ nọ A Wo Udu Ghelọ Ukpokpoma (6:27)

      • Eme whọ ruẹ evaọ iriruo nọ e rrọ ividio nana nọ e kẹ owhẹ udu?

      Se Iruẹru Ikọ 5:27-29 gbe Ahwo Hibru 10:24, 25. Nọ wha te se oria ikere ọvuọvo no, wha vẹ ta ẹme kpahe onọ nana:

      • Nọ a tẹ make whaha omai nọ ma gbẹ ta usi uwoma hayo kpohọ iwuhrẹ hẹ, fikieme u ro wuzou gaga re ma ruabọhọ egagọ Jihova?

      6. Jihova o ti fiobọhọ kẹ owhẹ thihakọ

      Isẹri Jihova nọ e rrọ unuikpe sa-sa evaọ akpọ na soso a be ruabọhọ gọ Jihova makọ okenọ a bi kpokpo ai. Re whọ ruẹ oware nọ u bi fiobọhọ kẹ ae, kporo IVIDIO na. Kẹsena wha vẹ ta ẹme kpahe onọ nọ ọ rrọ obotọ na.

      IVIDIO: Jihova Ọ te Bọ Omẹ Ga (3:40)

      • Evaọ ividio na, eme o fiobọhọ kẹ Isẹri Jihova nana thihakọ?

      Se Ahwo Rom 8:35, 37-39 gbe Ahwo Filipai 4:13. Nọ wha te se oria ikere ọvuọvo no, wha vẹ ta ẹme kpahe onọ nana:

      • Ẹvẹ oria ikere nana o rọ kẹ owhẹ imuẹro nọ whọ sai thihakọ odawọ kpobi?

      Se Matiu 5:10-12, kẹsena wha vẹ ta ẹme kpahe onọ nana:

      • Fikieme eva e rẹ rọ were owhẹ nọ a tẹ maki bi kpokpo owhẹ?

      Modern-day Jehovah’s Witnesses who endured persecution and imprisonment because of their faith.

      Ima ahwo buobu nọ a rrọ Isẹri Jihova a gbẹ be gọ Jihova ghelọ ọwọsuọ. Whọ sai ru ei re!

      AHWO JỌ A RẸ TA NỌ: “Mẹ sai thihakọ ukpokpoma ha.”

      • Eria Ebaibol vẹ e rẹ sae kẹ ahwo otiọye na udu?

      EME WHO WUHRẸ NO?

      O rẹ were Jihova gaga nọ ma tẹ be daoma gọe ghelọ ukpokpoma. Ọ sai fiobọhọ kẹ omai thihakọ ukpokpoma.

      Ọkiẹkpemu

      • Fikieme Ileleikristi a re ro rẹro ukpokpoma?

      • Eme whọ rẹ sai ru enẹna rọ ruẹrẹ oma kpahe kẹ ukpokpoma?

      • Eme ọ sai fiobọhọ kẹ owhẹ wo udu inọ whọ te sae gọ Jihova ghelọ odawọ nọ u te owhẹ kẹhẹ?

      Utee nọ whọ rẹ sai fihọ

      KIẸ KPAHE EFA

      Rri jẹ gaviezọ kẹ eme nọ uzoge jọ ọ ta kpahe epanọ Jihova o ro fiobọhọ kẹe thihakọ evaọ okenọ a fi ei họ uwou-odi fikinọ ọ ta nọ o re wo obọ kugbe akpọ na ha.

      Thihakọ Ghelọ Ukpokpoma (2:34)

      Rri oware nọ u fiobọhọ kẹ ọzae-avọ-aye jọ gọ Jihova ziezi evaọ ikpe buobu ghelọ ọwọsuọ.

      A be Gọ Jihova Ghelọ Inwene Sa-Sa (7:11)

      Wuhrẹ epanọ whọ sai ro thihakọ ukpokpoma ududu.

      “Ruẹrẹ Oma Kpahe Enẹna kẹ Ukpokpoma” (Uwou-Eroro Na, Ahrẹ 2019)

      Nọ ahwo uviuwou mai a tẹ be wọso omai, ẹvẹ u fo nọ ma re rri rie? Eme ma re ru ma vẹ gbẹ be sae gọ Jihova?

      “Uzẹme na O rẹ Wha ‘Udhedhẹ Ze He, Rekọ Ọgbọdọ’” (Uwou-Eroro Na, Akpe 2017)