22, 23. Eme inievo obọ Antiọk a ru nọ u dhesẹ nọ a gine you inievo rai, kọ eme ma be hai ru nẹnẹ re?

²² Antiọk họ ẹwho nọ a jọ “kaki se ilele na Ileleikristi, yọ obọ Ọghẹnẹ onana u no ze.” (Iruẹru 11:26b) Odẹ yena u gine fo inievo na keme a je lele oriruo Jesu. Nọ ahwo erẹwho efa a je kurẹriẹ ziọ ukoko na, kọ te ae te Ileleikristi nọ e jọ ahwo Ju a je gine lele oriruo Jesu, a te je you ohwohwo? Oware jọ nọ o via o te lẹliẹ omai riẹ uyo onọ na. Evaọ oware wọhọ ukpe 46 C.E., ohọo ogaga u te je mu.e Evaọ oke yena, ohọo u te bi mu, uye o rẹ bẹ iyogbe gaga keme a wo ugho hayo emu evaọ oria ọvo nọ a rẹroso ho. Fikiere eware e jọ gaga kẹ Ileleikristi buobu nọ e jọ ahwo Ju nọ e jẹ rria Judia keme iyogbe a jọ. Nọ Ileleikristi nọ e jọ obọ Antiọk, te enọ e jọ ahwo Ju, te ahwo erẹwho efa a ti yo oware nọ o be via, a tẹ zọhọ eware ze inọ a rọ “dhogbo bru” inievo nọ e jọ Judia. (Iruẹru 11:29) Oware nọ a ru na u dhesẹ nọ a gine you inievo obọ Judia na.