Ọ be Kẹ Omai Oware Kpobi nọ Ma Gwọlọ”

Kọ Jihova ọ be ginẹ daezọ mai, manikọ ọ tehe ezọ di kẹ oja nọ ma be re? Uyo nọ Ebaibol na ọ kẹ kpahe onọ yena o rẹ lẹliẹ eva were omai. Ọghẹnẹ ọ be ginẹ daezọ mai, yọ ọ gwọlọ nọ ma reawere uzuazọ. Kẹdẹ kẹdẹ, ọ be kuvẹ re ahwo kpobi, makọ enọ i wo edẹro ho, a wo erere no ewoma riẹ ze. Dai roro kpahe ẹme nọ Pọl ukọ na ọ ta—Se Iruẹru Ikọ Na 14:16, 17.

Nọ Pọl ọ jẹ ta ẹme kẹ ahwo Listra nọ a jẹ gọ edhọ, ọ ta nọ: “Ọnọ ọ jọ ige nọ i kpemu vu erẹwho kpobi wa nọ ọ vuọ epanọ u je rie i ọ nya; dede yọ ọ siọ isẹi oma riẹ ba e se he, keme ọ riẹ ru, epanọ ọ kẹ owhai oso gbe ezi ivuẹvu, jẹ kẹ owhai emu avọ evawere.” Ẹvẹ ahwo Listra a rehọ eme yena?

Ahwo Listra a wo otoriẹ eme yena lọlọhọ, keme iruo ẹwọ a je ru, yọ otọ rai u re wou ekakọ, avọ ame nọ ọ wariẹ e rai họ nọ u je ru ekakọ na woma ziezi. Rekọ Pọl o ru rai riẹ nọ obọ Ọghẹnẹ oso gbe ezi ivuẹvu kpobi i bi no ze. Fikiere, oke kpobi nọ eware nọ a kọ i woma kẹ ae, jẹ be re emamọ emu, yọ a bi wo erere no ewoma Ọghẹnẹ ze.

Ma rẹ sai wuhrẹ eware buobu kpahe Jihova no ẹme Pọl na ze.

Jihova ọ gwọlọ nọ ma riẹ ọyomariẹ ziezi. Pọl ọ ta haro nọ, Ọghẹnẹ “ọ siọ isẹi oma riẹ ba e se he.” Obe nọ ma jọ obehru ta ẹme te na, o ta nọ, a rẹ sae fa ẹme nana nọ, “[Ọghẹnẹ] o dhesẹ oghẹrẹ ohwo nọ ọ rrọ kẹ ahwo kpobi vevẹ.” Eware nọ Ọghẹnẹ ọ ma i bi fi obọ họ kẹ omai vuhu ewoma, areghẹ, ogaga, gbe uyoyou riẹ mu. (Ahwo Rom 1:20) Jihova ọ jọ Ebaibol na dhesẹ oghẹrẹ Ọghẹnẹ nọ ọ rrọ vevẹ. (2 Timoti 3:16, 17) Kọ onana u gbe dhesẹ nọ ọ gwọlọ nọ ma riẹ ọyomariẹ?

Jihova ọ gwọlọ nọ ma were eva. Pọl ọ tẹ jẹ ta nọ, Ọghẹnẹ ọ be “kẹ [omai] emu avọ evawere.” Makọ ohwo nọ o bi koko izi Jihova ha, ọ be re eva vọ, je bi wo evawere evaọ uzuazọ. Rekọ Ọghẹnẹ ọ gwọlọ nọ ma were eva bẹdẹ. Onana o rẹ sae lọhọ otẹrọnọ ma riẹ uzẹme na kpahe Ọghẹnẹ jẹ be daoma fi eware nọ ma bi wuhrẹ họ iruo.—Olezi 144:15; Matiu 5:3.

Ma bi wo erere no ewoma Jihova ze kẹdẹ kẹdẹ. Kọ whọ gbẹ daoma wuhrẹ kpahe epanọ whọ sai ro dhesẹ edẹro kẹ Ọghẹnẹ nana nọ ọ be “kẹ [owhẹ] emu avọ evawere” na?