“Me Wo Ahwo Buobu Evaọ Okpẹwho Nana” (Iruẹru 18:9-17)

12. Eme Jesu ọ ta kẹ Pọl evaọ eruẹaruẹ?

¹² Ẹsejọhọ Pọl o je roro nọ u te epanọ o re ro no Kọrint kpohọ oria ọfa nyae ta usi uwoma no. Rekọ evaọ aso ẹdẹ jọ, Jesu Kristi ọ tẹ romavia kẹe evaọ eruẹaruẹ, ọ tẹ ta kẹe nọ: “Jọ ozọ u mu owhẹ hẹ, rekọ gbẹ hai whowho ẹme na, who fibo ho, keme mẹ rrọ kugbe owhẹ yọ ohwo ọvo ọ te họre owhẹ jẹ nwa owhẹ oma ha; keme me wo ahwo buobu evaọ okpẹwho nana.” (Iruẹru 18:9, 10) Ẹme nọ Jesu ọ ta kẹ Pọl na ọ te lẹliẹ udu jariẹ awọ. Jesu ọ vuẹ riẹ nọ ọ te kuvẹ re oware uyoma o via kẹe evaọ ẹwho yena ha. Yọ ahwo buobu a vọ ẹwho na nọ a gwọlọ yo usi uwoma na. Kọ eme Pọl o ru? Ebaibol ọ ta nọ Pọl “ọ tẹ jọ etẹe ẹgbukpe gbe emerae ezeza, bi wuhrẹ ae ẹme Ọghẹnẹ.”—Iruẹru 18:11.

16. Ẹvẹ ẹme nọ Jesu ọ vuẹ Pọl evaọ obe Iruẹru Ikọ 18:9, 10, u bi ro fiobọhọ kẹ omai ta usi uwoma na?

¹⁶ Kọ whọ kareghẹhọ ẹme nọ Jesu ọ vuẹ Pọl okenọ ahwo Ju a jẹ rọ wọso ẹe? Ọ ta kẹe nọ: “Jọ ozọ u mu owhẹ hẹ, rekọ gbẹ hai whowho ẹme na, who fibo ho, keme mẹ rrọ kugbe owhẹ.” (Iruẹru 18:9, 10) Nẹnẹ, u fo re ma hae kareghẹhọ ẹme Jesu yena maero nọ ahwo a gbẹ be gaviezọ kẹ usi uwoma na ha. Joma hae kareghẹhọ nọ Jihova ọ riẹ udu ohwo kpobi yọ o ti ru nọ ahwo nọ a ginẹ gwọlọ gọe a ti ro kurẹriẹ. (1 Sam. 16:7; Jọn 6:44) Ma tẹ be hae kareghẹhọ oyena ẹsikpobi, ma te ruabọhọ iruo usi uwoma ota na. Kukpe kukpe, ahwo buobu gbidi gbidi a bi kurẹriẹ ruọ ukoko Jihova. Iruo nọ Jesu ọ kẹ omai ma bi ru na. Ọ vuẹ omai nọ ma “ru ahwo zihe ruọ ilele evaọ udevie ahwo erẹwho na kpobi.” Yọ ọ ya eyaa kẹ omai nọ ma tẹ nya uwou nọ o vi omai na, ọ te jọ “kugbe [omai] edẹ na kpobi rite oke urere uyero-akpọ na.”—Mat. 28:19, 20.