“A Dhesẹ Uwowou kẹ Omai Evaọ Edhere Ologbo” (Iruẹru 28:1-10)

18-20. Oghẹrẹ vẹ ahwo Mọlta a ro “dhesẹ uwowou . . . evaọ edhere ologbo,” kọ oware igbunu vẹ Ọghẹnẹ o ru kẹ Pọl?

¹⁸ Ahwo nọ a zọ na a jọ ukoliko Mọlta evaọ ofẹ obọze ovatha-ọre Sicili. (Rri ẹkpẹti na “Diẹse Mọlta Ọ Rrọ?”) Luk o kere nọ ahwo ẹvẹrẹ ọfa nọ a jọ ukoliko na “a dhesẹ uwowou kẹ [ae] evaọ edhere ologbo.” (Iruẹru 28:2) A koko erae họ kẹ erara nọ e ya kpahe okpa na, keme oma rai kpobi o vo no yọ a je nuhu fiki ekpahe. Erae na e sasa e rai oma dede nọ oso ọ jẹ rrọ yọ ekpahe e jariẹ. U te je ru nọ oware igbunu jọ o rọ via.