Wuhrẹ No Ehri-uzi “Uzẹme” Na Ze

‘Wha wo eriariẹ kpahe uzẹme na eva uzi na.’​—ROM 2:20.

4, 5. (a) Eme Uzi Mosis na o kareghẹhọ idibo Ọghẹnẹ? (b) Eme idheidhe nọ a jọ uzi Ọghẹnẹ fodẹ na i dikihẹ kẹ?

⁴ Abọ buobu erọ Uzi Mosis na e rẹ kareghẹhọ emọ Izrẹl inọ ae yọ irumuomu. Wọhọ oriruo, ohwo ọ tẹ r’obọ te ori, Uzi na o ta nọ a re ru ei fo. A re kpe eruẹ ọwawae nọ ọ rrọ poriẹ poriẹ, a vẹ mahe iẹe. A ve fi enwo eruẹ na họ ame, ame na o ve zihe ruọ “ame orufuọ,” kẹsena a vẹ frẹ ame na ku ohwo nọ a gwọlọ ru fo na evaọ ẹdẹ avọ esa gbe ẹdẹ avọ ihrẹ. (Ik. 19:1-13) Ofariẹ, re emọ Izrẹl a hae kareghẹhọ nọ emọ-iyẹ u re kpeze sebaẹgba gbe uzioraha se amọfa, Uzi na o ta nọ aye nọ o yẹ ọmọ ọ rẹ jọ gbegbe evaọ omoke jọ, kẹsena o ve dhe idhe omavoro.—Izerẹ 12:1-8.

⁵ Iyero efa buobu e jariẹ nọ o jọ gwọlọ nọ emọ Izrẹl a re dhe idhe re a rọ izieraha rai vrẹ rai. O tẹ make rọnọ emọ Izrẹl a riẹ hayo a riẹ hẹ, idhe nana, gbe enọ a je dhe uwhremu na evaọ etẹmpol Jihova, e jọ “uwoho” idhe egbagba erọ Jesu.—Hib. 10:1-10.

OWARE NỌ O RẸ WỌ OHWO DHE IDHE

6, 7. (a) Ẹvẹ u fo nọ idhe nọ emọ Izrẹl a re dhe kẹ Ọghẹnẹ e rẹ jọ, kọ eme onana u dhesẹ? (b) Enọ vẹ u fo nọ ma rẹ nọ oma mai?

⁶ Uzi nọ a fihọ kpahe arao nọ a re ro dhe idhe kẹ Jihova họ, ọ rẹ jọ sasasa evaọ kabọ kabọ, koyehọ ọ rẹ jọ arao nọ o tuaro ho, nọ ọ nwoma ha, nọ ọ ko ho, hayo nọ ọ be mọ họ. (Izerẹ 22:20-22) Nọ emọ Izrẹl a tẹ gwọlọ rọ ibi-ire hayo eka dhe idhe kẹ Jihova, e rẹ jọ “ibi ọsosuọ,” “enọ e mae jarae woma.” (Ik. 18:12, 29) E gbẹ rrọ enọ e mai woma ha, Jihova ọ rẹ jẹ ae rehọ họ. Uzi nọ a je kpahe oghẹrẹ erao nọ a re ro dhe idhe na u dhesẹ nọ idhe Jesu o te kare epe gbe nnọ re Jihova ọ sae ta omai no igbo, o ti dhe idhe nọ e mai woma kpaobọ, onọ o mae ghare kẹe.—1 Pita 1:18, 19.