Wariẹ akpọ na soso họ, ahwo a rri udi nọ u re mu oghẹrẹ sa-sa. O rẹ were ahwo jọ re a da umudi ẹsejọ nọ a tẹ rrọ kugbe egbẹnyusu rai. Ahwo jọ a rẹ da vievie he. Yọ amọfa jọ a rẹ da bẹsenọ idi i re ro mu ai. Eme Ebaibol na ọ ta kpahe udi nọ u re mu?

1. Kọ o thọ re a da udi nọ u re mu?

Ebaibol na ọ ta nọ o thọ họ re a da udi nọ u re mu. Ukpoye, Ebaibol na ọ ta nọ “enwaene nọ o re ru udu ohwo-akpọ ghọghọ” yọ okẹ jọ evaọ usu ekẹ buobu nọ Ọghẹnẹ ọ kẹ omai na. (Olezi 104:14, 15) Ezae gbe eyae buobu nọ e gọ Ọghẹnẹ ziezi nọ a fodẹ evaọ Ebaibol na a da udi nọ u re mu.—1 Timoti 5:23.

2. Ohrẹ vẹ Ebaibol na ọ kẹ ahwo nọ a jiroro nọ a rẹ da udi nọ u re mu?

Jihova o mukpahe udi nọ a rẹ da buobu gbe udi nọ a rẹ da thomawa. (Ahwo Galesha 5:21) Ọ jọ Ẹme riẹ Ebaibol na ta nọ: “Whọ jọ usu enọ e rẹ da udi bu hrọ họ.” (Itẹ 23:20) Fikiere, otẹrọnọ ma jiroro nọ ma rẹ da udi, makọ evaọ okenọ mai ọvo ma rrọ oria, ma rẹ da bu hrọ họ, te epanọ iroro mai e gbẹ rọ gba ha, nọ ma gbẹ rọ riẹ eme nọ ma be ta hayo eware nọ ma bi ru hu, hayo tubẹ nwoma dede. Otẹrọnọ ma rẹ sae da umutho ho, ma vẹ dhugbẹ seba ẹda riẹriẹriẹ.

3. Ẹvẹ ma sae rọ rehọ adhẹẹ kẹ amọfa evaọ iroro nọ a jẹ kpahe udi nọ u re mu?

Ohwo kpobi ọ rẹ jiroro kẹ omobọ riẹ sọ ọ rẹ da udi nọ u re mu. Ma re gu omọfa ẹdhọ họ nọ ọ tẹ jiroro nọ ọ rẹ da umutho udi. Yọ ma rẹ gba ohwo họ hayo tẹzẹ iẹe he nọ ọ tẹ ta nọ ọ be da vievie he. (Ahwo Rom 14:10) Ma rẹ siọ udi ba ẹda nọ ma tẹ ruẹ nọ o te wha ebẹbẹ se amọfa. (Se Ahwo Rom 14:21.) Ma re “ru oware nọ o rẹ kẹ omọfa erere orọnikọ [omobọ mai hi].”—Se 1 Ahwo Kọrint 10:23, 24.

GBE WUHRẸ EWARE EFA

4. Whọ rẹ jiroro sọ whọ rẹ da udi nọ u re mu

Ẹvẹ Jesu o rri udi nọ u re mu nọ a rẹ da? Re whọ riẹ uyo na, se kpahe iruo igbunu ọsosuọ nọ o ru. Se Jọn 2:1-11, kẹsena wha vẹ ta ẹme kpahe enọ nana:

• Ẹvẹ iruo igbunu nana nọ Jesu o ru na u ro fiobọhọ kẹ omai riẹ oghẹrẹ nọ o rri udi nọ u re mu gbe ahwo nọ a rẹ dae?

• Nọ orọnọ Jesu ọ ta ha inọ o thọ re a da udi nọ u re mu na, ẹvẹ u fo nọ Oleleikristi o re rri ohwo nọ ọ jiroro nọ ọ rẹ da udi?

O make rọnọ o thọ họ re Oleleikristi ọ da udi nọ u re mu na, orọnikọ ẹsikpobi u kiehọ re ọ da udi hi. Se Itẹ 22:3, kẹsena wha vẹ ta kpahe epanọ eware nọ e rrọ obotọ na e sai ro dhesẹ sọ whọ rẹ da udi:

• Whọ be te dhẹ omoto hayo imotosaikoro, hayo ru iruo evaọ ẹjini.

• Who dihọ.

• Edọkita ọ ta nọ whọ gbẹ da udi nọ u re mu hu.

• Whọ rẹ sai su omara ha nọ udi o tẹ rrọ otọ.

• Uzi egọmeti o kuvẹ hẹ inọ whọ da udi nọ u re mu.

• Whọ rrọ kugbe ohwo nọ ọ jiroro nọ ọ rẹ da udi vievie he fikinọ evaọ okenọ u kpemu ọ jẹ da vroma.

Kọ u fo re idi nọ i re mu e jọ ehaa-orọo ra hayo omakugbe ọfa jọ nọ who bi ru? Re whọ riẹ oware nọ o sai fiobọhọ kẹ owhẹ jiroro na, kporo IVIDIO na.

IVIDIO: Kọ U Fo nọ Me re Fi Idi Egaga Hotọ? (2:41)

Se Ahwo Rom 13:13 gbe 1 Ahwo Kọrint 10:31, 32. Nọ wha te se oria ikere ọvuọvo no, wha vẹ ta ẹme kpahe onọ nana:

• Ẹvẹ ohrẹ Ebaibol nana o sai ro fiobọhọ kẹ owhẹ jiroro nọ i re ru eva were Jihova?

5. Fi umuo nọ whọ rẹ da ba họ

Otẹrọnọ whọ jiroro nọ whọ rẹ da idi nọ i re mu, kareghẹhọ onana: O make rọnọ Jihova o mukpahe idi nọ i re mu nọ a rẹ da ha na, o mukpahe idi nọ a rẹ da vroma. Fikieme? Se Hosia 4:11, 18, kẹsena wha vẹ ta ẹme kpahe onọ nana:

• Eme ọ rẹ sae via nọ ohwo ọ tẹ be da udi bu hrọ?

Eme ọ rẹ sai fiobọhọ kẹ omai nọ ma gbẹ rọ da udi bu hrọ họ? O gwọlọ nọ ma rẹ riẹ utho nọ ma sae da. Se Itẹ 11:2, kẹsena wha vẹ ta ẹme kpahe onọ nana:

• Fikieme u ro woma re who fi umuo nọ whọ rẹ da ba họ?

6. Oware nọ o sai fiobọhọ kẹ ohwo nọ ọ gbẹ da idi vroma ha

IVIDIO: ‘Uzuazọ Mẹ O tẹ Vẹso Omẹ’ (6:32)

• Evaọ ividio na, eme idi nọ Dmitry ọ jẹ da vroma e jẹ lẹliẹe ru?

• Kọ ọ sae siọ idi ba ẹda ẹsiẹsiẹe?

• Ẹvẹ ọ sae rọ siọ idi ba ẹda vroma uwhremu na?

Se 1 Ahwo Kọrint 6:10, 11, kẹsena wha vẹ ta ẹme kpahe enọ nana:

• Ẹvẹ idi nọ a rẹ da vroma i yoma te?

• Eme o dhesẹ nọ ohwo nọ ọ rẹ da idi vroma ọ sai nwene?

Se Matiu 5:30, kẹsena wha vẹ ta ẹme kpahe onọ nana:

• Nọ Jesu ọ ta nọ ohwo o bru obọ riẹ no, u dhesẹ nọ ma re siobọno eware jọ re ma sai ru eva were Jihova. Eme whọ rẹ sai ru otẹrọnọ o be bẹ owhẹ re whọ siọ idi ba ẹda vroma?a

Se 1 Ahwo Kọrint 15:33, kẹsena wha vẹ ta ẹme kpahe onọ nana:

• Otẹrọnọ egbẹnyusu ra a rẹ da idi, eme onana o rẹ sae lẹliẹ owhẹ ru?

EME WHO WUHRẸ NO?

Jihova o ru udi re u ru oma were omai, rekọ o mukpahe udi nọ a rẹ da buobu gbe idi nọ a rẹ da vroma.

Ọkiẹkpemu

• Eme Ebaibol na ọ ta kpahe udi nọ u re mu?

• Ebẹbẹ vẹ i re noi ze nọ ma tẹ be da idi vroma?

• Ẹvẹ ma sae rọ rehọ adhẹẹ kẹ amọfa evaọ iroro nọ a jẹ kpahe udi?

KIẸ KPAHE EFA

Ẹvẹ izoge a sae rọ jẹ emamọ iroro evaọ ẹme udi nọ u re mu?

Udi O Viẹ Owhẹ Họ Họ (2:31)

Se kpahe eware nọ whọ rẹ sai ru re whọ siọ idi ba ẹda vroma.

“Eware nọ E rẹ Sai Fiobọhọ kẹ Owhẹ Da Umutho Udi” (Uwou-Eroro Na, Ọvo 1, 2010)

Kọ u fo re Oleleikristi o kuomagbe ahwo rehọ egalase udi kaehọ ohwohwo?

“Enọ Ahwo nọ A s’Ebe” (Uwou-Eroro Na, Ava 15, 2007)

Jọ iku nọ uzoẹme riẹ o ta nọ “Mẹ Jọ Othẹ nọ Ọ rẹ Kake Vọ Họ,” se kpahe epanọ ọzae jọ ọ sae rọ siọ idi ba ẹda.

“Ebaibol O re Nwene Uzuazọ Ohwo” (Uwou-Eroro Na, Asoi 1, 2012)

Ohwo kpobi o wo oghẹrẹ nọ ọ rẹ gwọlọ gọ ẹgọ jẹ sẹ osẹ. Rekọ nọ ma te bi lele ehrẹ Ebaibol na, ma te sae gọ ẹgọ nọ o kiehọ omai oma, o vẹ jẹ were Jihova. Joma ta ẹme kpahe ehrẹ nana jọ.

1. Ehrẹ Ebaibol vẹ ma re lele nọ ma tẹ be salọ iwu nọ ma re kuhọ gbe oghẹrẹ osẹ nọ ma rẹ sẹ?

U fo nọ ma rẹ “gọ ẹgọ nọ o kiehọ, nọ ọ rrọ owowa je dhesẹ nọ [ma] wo iroro nọ e gba.” Ẹgọ mai ọ rẹ jẹ jọ fuafo, nọ u re dhesẹ nọ ma be “gọ Ọghẹnẹ.” (1 Timoti 2:9, 10) Joma ta kpahe ehrẹ Ebaibol ene nana: (1) Iwu mai e rẹ jọ enọ i “kiehọ.” Wọhọ epanọ who muẹrohọ no evaọ iwuhrẹ ukoko, mai ahwo Jihova ma re ku oghẹrẹ iwu sa-sa họ. Rekọ ẹgọ mai gbe oghẹrẹ izou nọ ma re ru i re dhesẹ nọ ma wo adhẹẹ kẹ Ọghẹnẹ nọ ma be gọ na. (2) Re ma gọ ẹgọ nọ ọ “rrọ owowa” u dhesẹ nọ ma rẹ wha iwu nọ e rẹ lẹliẹ amọfa wo ekpehre isiuru hu, hayo enọ e rẹ lẹliẹ amọfa tẹrovi omai ọvo ho. (3) Re ma dhesẹ nọ ma wo “iroro nọ e gba,” orọnikọ oghẹrẹ osẹ gbe uzou kpobi nọ u kie ze ma re kielele he. (4) U fo nọ osẹ mai u re dhesẹ ẹsikpobi nọ ma be “gọ Ọghẹnẹ” uzẹme na.—1 Ahwo Kọrint 10:31.

2. Fikieme ma re ro roro kpahe ahwo nọ ma gbẹ be gọ Jihova nọ ma tẹ gwọlọ sẹ osẹ?

O make rọnọ ma wo udu nọ ma rẹ rọ salọ oghẹrẹ iwu nọ ma rẹ wha na, u fo nọ ma re roro sọ osẹ mai o te kẹ amọfa uye hayo ru ai zoruẹ. Ma rẹ daoma re ma gbe ru ohwo ọvo eva dha ha, ukpoye, ma re ru “eva were ọrivẹ [mai],” je ru oware nọ “o rẹ kẹe erere, re o bọe ga.”—Se Ahwo Rom 15:1, 2.

3. Ẹvẹ osẹ mai o sai ro si amọfa ziọ egagọ uzẹme?

U fo nọ oke kpobi ma re muẹrohọ osẹ mai, rekọ ma rẹ mai ru ere nọ ma te bi kpohọ ewuhrẹ gbe usi uwoma ota. Ma gwọlọ nọ ohwo ọvo ọ rọ ekpehre ubiẹro rri obọdẹ ovuẹ nọ ma bi whowho na ha. Ukpoye, ma gwọlọ nọ osẹ mai u ru uzẹme na si amọfa urru, o vẹ jẹ “whẹ erru họ uwuhrẹ Osiwi mai.”—Taitọs 2:10.

GBE WUHRẸ EWARE EFA

4. Ma tẹ sẹ emamọ osẹ, u re dhesẹ nọ ma wo adhẹẹ kẹ Jihova

Ẹjiroro vẹ o mai wuzou nọ ma rẹ rọ fiki riẹ roro kpahe osẹ mai? Se Olezi 47:2, kẹsena wha vẹ ta ẹme kpahe enọ nana:

• Nọ orọnọ ma bi dikihẹ kẹ Jihova na, ẹvẹ u fo nọ ma rẹ gọ ẹgọ mai?

• Kọ who roro nọ u kiehọ re ma roro kpahe osẹ mai nọ ma te bi kpohọ iwuhrẹ gbe usi uwoma ota? Fikieme whọ rọ ta ere, hayo kọ fikieme who gbe ro roro ere he?

5. Epanọ ma rẹ sae rọ jẹ emamọ iroro evaọ ẹme ẹgọ gbe osẹ

Kporo IVIDIO na.

IVIDIO: “Wha Ru Eware Kpobi rọ kẹ Ọghẹnẹ Oruaro” (10:18)

Te iwu mai e rrọ ghaghae hayo e rrọ kuẹku, u fo nọ e rẹ jọ fuafo yọ i re je kiehọ kẹ oria nọ ma bi ku ai họ nya. Se 1 Ahwo Kọrint 10:24 gbe 1 Timoti 2:9, 10. Kẹsena wha vẹ ta ẹme kpahe oware nọ u gbe fo ho re ma wha iwu nọ . . .

• e nware ku jẹ rrọ jẹvu jẹvu

• e rẹ gbamu oma, kpe oma ohwo fihọ, hayo nọ e rẹ sai ru amọfa wo ekpehre isiuru.

Dede nọ Uzi Mosis Ileleikristi ma bi lele he, u fiobọhọ kẹ omai riẹ oware nọ Jihova ọ gwọlọ. Se Iziewariẹ 22:5, kẹsena wha vẹ ta ẹme kpahe onọ nana:

• Fikieme u gbe fo ho re ma sẹ osẹ nọ u re ru ọzae jọ wọhọ aye hayo ru aye jọ wọhọ ọzae?

Se 1 Ahwo Kọrint 10:32, 33 gbe 1 Jọn 2:15, 16, kẹsena wha vẹ ta ẹme kpahe enọ nana:

• Fikieme u ro fo re ma roro sọ ẹgọ mai o bi ru eva dha amọfa nọ ma gbẹ rrọ ukoko na hayo ahwo nọ ma gbẹ be rria oria?

• Oghẹrẹ vẹ ahwo a rẹ mae gọ ẹgọ evaọ oria nọ whọ be rria?

• Kọ who roro nọ oghẹrẹ ẹgọ nọ ahwo jọ a rẹ gọ na i fo kẹ Oleleikristi? Fikieme whọ rọ ta ere, hayo kọ fikieme who gbe ro roro ere he?

EME WHO WUHRẸ NO?

Nọ ma tẹ be hai ku emamọ ẹgọ họ jẹ sẹ osẹ ziezi, yọ ma bi dhesẹ nọ ma wo adhẹẹ kẹ Jihova gbe amọfa.

Ọkiẹkpemu

• Fikieme Jihova ọ rọ gwọlọ nọ ma gọ ẹgọ jẹ sẹ osẹ ziezi?

• Ehrẹ Ebaibol jọ vẹ e rẹ kpọ omai nọ ma tẹ be jiroro ẹgọ nọ ma rẹ gọ hayo osẹ nọ ma rẹ sẹ?

• Ẹvẹ ẹgọ mai o rẹ sae lẹliẹ amọfa rri egagọ uzẹme?

KIẸ KPAHE EFA

Se kpahe oware nọ o sae jọnọ amọfa a bi roro kpahe owhẹ nọ a tẹ ruẹ oghẹrẹ iwu nọ who kuhọ.

“Kọ Osẹ Mẹ O Rrọ Ziezi?” (Uzoẹme nọ o rrọ itanẹte)

Wuhrẹ oware nọ u ro wuzou re who roro taure whọ tẹ ta nọ a drọ etatu fihọ owhẹ oma.

“Eme Ebaibol Ọ Ta Kpahe Eware nọ A rẹ Drọ Fihọ Oma?” (Uzoẹme nọ o rrọ itanẹte)

Wuhrẹ ehrẹ efa nọ e sae kpọ omai evaọ ẹme osẹ.

“Kọ Osẹ Ra O be Wha Orro se Ọghẹnẹ?” (Uwou-Eroro Na, Azie 2016)

Ẹvẹ aye jọ nọ o wo emamọ eva o ro wuhrẹ nọ ohwo kpobi o wo udu nọ ọ rẹ rọ salọ oghẹrẹ ẹgọ nọ ọ rẹ gọ?

“Osẹ O jẹ Whaha Omẹ Ekurẹriẹ” (Awake!, Akpegbivẹ 22, 2003)