7. Izi Uvie Ọghẹnẹ i woma vi izi egọmeti ahwo-akpọ

Egọmeti a re fi izi họ nọ e rẹ kpọ jẹ thọ ahwo nọ a rrọ otọ esuo rai. Ere ọvona Uvie Ọghẹnẹ u wo izi nọ ahwo nọ a rrọ otọ riẹ a re lele. Se 1 Ahwo Kọrint 6:9-11, kẹsena wha vẹ ta ẹme kpahe enọ nana:

• Ẹvẹ who roro nọ akpọ na ọ te jọ evaọ okenọ ohwo kpobi o ti koko izi Ọghẹnẹ?a

• Kọ who roro nọ u kiehọ nọ Jihova ọ rọ ta nọ ohwo kpobi nọ ọ te jọ otọ Uvie na o koko izi nana? Fikieme?

• Eme u dhesẹ nọ ahwo nọ a bi koko izi nana ha a rẹ sai nwene? (Rri owọ avọ 11.)

Oma o rẹ vo ahwo buobu re a ta ẹme kpahe owezẹ ọzae-avọ-aye. Rekọ a jọ Ebaibol na ta ẹme kpahe iẹe vevẹ avọ adhẹẹ. Ma sai wuhrẹ eware buobu no oware nọ Ebaibol na ọ ta ze. O rrọ ere keme Jihova ọ ma omai. Fikiere ọ riẹ oware nọ o mai woma kẹ omai. Ọ vuẹ omai eware nọ ma re ru nọ e rẹ were iẹe gbe epanọ ma sae rọ reawere uzuazọ bẹdẹ bẹdẹ.

1. Ẹvẹ Jihova o rri owezẹ ọzae-avọ-aye?

Owezẹ ọzae-avọ-aye yọ okẹ nọ u no obọ Jihova ze. Ọ gwọlọ nọ ọzae-avọ-aye nọ a rọo no ọvo a rẹ wezẹ kugbe. Orọnikọ okẹ nana u re fiobọhọ kẹ ọzae-avọ-aye yẹ emọ ọvo ho, rekọ nọ obọdẹ edhere nọ aimava na a re ro dhesẹ uyoyou kẹ ohwohwo, yọ u re je ru eva were ae. Oyejabọ nọ Ọghẹnẹ ọ rọ ta nọ: “Wereva kugbe aye nọ whọ rehọ evaọ oke uzoge ra.” (Itẹ 5:18, 19) Jihova ọ gwọlọ nọ Ileleikristi nọ e rọo no a rẹ talamu ohwohwo, fikiere, a rẹ wezẹ kugbe omọfa vievie he.—Se Ahwo Hibru 13:4.

2. Eme họ ọfariẹ-ogbe?

Ebaibol na ọ ta kẹ omai nọ “ahwo nọ a bi gbe-ọfariẹ . . . a te reuku Uvie Ọghẹnẹ hẹ.” (1 Ahwo Kọrint 6:9, 10) Ahwo nọ a kere Ebaibol na evaọ ẹvẹrẹ Griki a rọ ẹme na por·neiʹa ta kpahe ọfariẹ-ogbe. Ẹme na u re dhesẹ (1) imava nọ e rrọ orọo ho nọ e wezẹ kugbe,a (2) ọzae avọ ọzae hayo aye avọ aye nọ a wezẹ kugbe, gbe (3) ohwo avọ arao nọ a wezẹ kugbe. Nọ ma te “siomano ọfariẹ-ogbe,” ma re ru eva were Jihova yọ ma re wo erere noi ze.—1 Ahwo Tẹsalonika 4:3.

GBE WUHRẸ EWARE EFA

3. Dhẹ siọ ọfariẹ-ogbe ba

Josẹf ọ dhẹ siọ aye jọ ba okenọ aye na ọ jẹ gbae họ re o lele iei wezẹ. Se Emuhọ 39:1-12, kẹsena wha vẹ ta ẹme kpahe enọ nana:

• Eme ọ lẹliẹ Josẹf dhẹ?—Rri owọ avọ 9.

• Kọ who roro nọ emamọ iroro Josẹf ọ jẹ na? Fikieme who ro roro ere?

IVIDIO: Dhẹ Siọ Ọfariẹ-Ogbe Ba (5:06)

Jihova ọ gwọlọ nọ mai kpobi ma dhẹ siọ ọfariẹ-ogbe ba. Se 1 Ahwo Kọrint 6:18, kẹsena wha vẹ ta ẹme kpahe enọ nana:

• Eware vẹ e sai ru ohwo thọ uzi ọfariẹ-ogbe?

• Ẹvẹ whọ sae rọ dhẹ siọ ọfariẹ-ogbe ba?

4. Eware nọ who re ru nọ who gbe ro kie ruọ odawọ họ

IVIDIO: Hai Se Ebaibol na re Whọ Siọ Odawọ Ba Ekieruọ (3:02)

• Nọ oniọvo nọ a dhesẹ evaọ ividio na ọ ruẹ nọ eware nọ o bi roro gbe eware nọ o bi ru e sae lẹliẹe gbe-ọfariẹ, eme o ru?

O rẹ sae jọ bẹbẹ kẹ makọ Ileleikristi nọ i kruga ziezi re a siọ ikpehre eware ba eroro kpahe. Ẹvẹ whọ sae rọ siọ eware etọtọ ba eroro kpahe? Se Ahwo Filipai 4:8, kẹsena wha vẹ ta ẹme kpahe enọ nana:

• Oghẹrẹ eware vẹ u fo nọ ma re roro kpahe?

• Ẹvẹ Ebaibol na nọ ma re se gbe obọ nọ ma re wo ziezi evaọ egagọ Jihova o sai ro fiobọhọ kẹ omai nọ ma gbe ro kieruọ odawọ họ?

5. Izi Jihova e rẹ kẹ omai erere

IVIDIO: Jọ Uvi Areghẹ Ọ Kare Owhẹ Hẹ (9:31)

• Ẹvẹ ọmọzae na ọ rọ rehọ owọ riẹ kọ ruọ odawọ?—Rri Itẹ 7:8, 9.

• Wọhọ epanọ o rrọ Itẹ 7:23, 26, ọfariẹ-ogbe ọ sae wha uye ulogbo ze. Nọ ma gbe bi gbe-ọfariẹ hẹ, ebẹbẹ vẹ i re te omai hi?

• Nọ ma gbe bi gbe-ọfariẹ hẹ, ẹvẹ o sai ro fiobọhọ kẹ omai reawere uzuazọ bẹdẹ bẹdẹ?

Ahwo jọ a roro nọ u kiehọ họ nọ Ebaibol ọ rọ ta nọ ọzae avọ ọzae hayo aye avọ aye a du wezẹ kugbe he. Rekọ Jihova yọ Ọghẹnẹ nọ ọ rrọ yoyou yọ ọ gwọlọ nọ ohwo kpobi ọ reawere uzuazọ bẹdẹ bẹdẹ. Re o sae jọ ere, o gwọlọ nọ ma re koko izi riẹ. Se 1 Ahwo Kọrint 6:9-11, kẹsena wha vẹ ta ẹme kpahe onọ nana:

• Evaọ aro Ọghẹnẹ, kọ ọzae avọ ọzae hayo aye avọ aye nọ a rẹ wezẹ kugbe ọvo họ iruemu nọ e thọ?

Re ma sai ru eva were Ọghẹnẹ, o gwọlọ nọ mai kpobi ma re nwene uruemu mai. Kọ erere jọ ọ riẹ? Se Olezi 19:8, 11, kẹsena wha vẹ ta ẹme kpahe enọ nana:

• Kọ who roro nọ ma sai gine koko izi Jihova kpahe owezẹ ọzae-avọ-aye? Fikieme whọ rọ ta ere, hayo kọ fikieme who gbe ro roro ere he?

EME WHO WUHRẸ NO?

Owezẹ ọzae-avọ-aye yọ okẹ nọ u no obọ Jihova ze, ọ gwọlọ nọ ọzae-avọ-aye nọ a rọo no ọvo a rẹ wezẹ kugbe.

Ọkiẹkpemu

• Eware jọ vẹ a re se ọfariẹ-ogbe?

• Eme o re fiobọhọ kẹ omai nọ ma gbe ro gbe-ọfariẹ hẹ?

• Irere vẹ i re te omai nọ ma te bi koko izi Jihova kpahe owezẹ ọzae-avọ-aye?

KIẸ KPAHE EFA

Wuhrẹ oware nọ Ọghẹnẹ ọ rọ gwọlọ nọ ọzae-avọ-aye a rẹ ruọ orọo taure a tẹ te rria kugbe.

“Eme Ebaibol na Ọ Ta Kpahe Imava nọ E re Rọo Ho nọ A rẹ Rria Kugbe?” (Uzoẹme nọ o rrọ itanẹte)

Dede nọ Ebaibol ọ ta nọ o thọ re ọzae avọ ọzae hayo aye avọ aye a wezẹ kugbe, wuhrẹ oware nọ ma gbe ro mukpahe ahwo nọ a bi ru ere he.

“Kọ O Thọ re Ọzae O Lele Ọzae Wezẹ Hayo re Aye O Lele Aye Wezẹ?” (Uzoẹme nọ o rrọ itanẹte)

Wuhrẹ kpahe oghẹrẹ nọ izi Ọghẹnẹ e rẹ rọ thọ omai evaọ ẹme kpobi nọ o kiekpahe owezẹ ọzae-avọ-aye.

“Kọ A rẹ Sae Se Ẹba Omọfa nọ A Wọ Họ Unu Nọ Owezẹ?” (Uzoẹme nọ o rrọ itanẹte)

Jọ iku nọ uzoẹme riẹ o ta nọ “A Bru Ọghọ Họ Omẹ Oma” ruẹ oware nọ o lẹliẹ ọzae jọ nọ ọ jẹ hai lele ezae efa wezẹ nwene uzuazọ riẹ re ọ sai ru eva were Ọghẹnẹ.

“Ebaibol na O re Nwene Uzuazọ Ohwo” (Uwou-Eroro Na, Ahrẹ 1, 2011)

Wariẹ akpọ na soso họ, ahwo a rri udi nọ u re mu oghẹrẹ sa-sa. O rẹ were ahwo jọ re a da umudi ẹsejọ nọ a tẹ rrọ kugbe egbẹnyusu rai. Ahwo jọ a rẹ da vievie he. Yọ amọfa jọ a rẹ da bẹsenọ idi i re ro mu ai. Eme Ebaibol na ọ ta kpahe udi nọ u re mu?

1. Kọ o thọ re a da udi nọ u re mu?

Ebaibol na ọ ta nọ o thọ họ re a da udi nọ u re mu. Ukpoye, Ebaibol na ọ ta nọ “enwaene nọ o re ru udu ohwo-akpọ ghọghọ” yọ okẹ jọ evaọ usu ekẹ buobu nọ Ọghẹnẹ ọ kẹ omai na. (Olezi 104:14, 15) Ezae gbe eyae buobu nọ e gọ Ọghẹnẹ ziezi nọ a fodẹ evaọ Ebaibol na a da udi nọ u re mu.—1 Timoti 5:23.

2. Ohrẹ vẹ Ebaibol na ọ kẹ ahwo nọ a jiroro nọ a rẹ da udi nọ u re mu?

Jihova o mukpahe udi nọ a rẹ da buobu gbe udi nọ a rẹ da thomawa. (Ahwo Galesha 5:21) Ọ jọ Ẹme riẹ Ebaibol na ta nọ: “Whọ jọ usu enọ e rẹ da udi bu hrọ họ.” (Itẹ 23:20) Fikiere, otẹrọnọ ma jiroro nọ ma rẹ da udi, makọ evaọ okenọ mai ọvo ma rrọ oria, ma rẹ da bu hrọ họ, te epanọ iroro mai e gbẹ rọ gba ha, nọ ma gbẹ rọ riẹ eme nọ ma be ta hayo eware nọ ma bi ru hu, hayo tubẹ nwoma dede. Otẹrọnọ ma rẹ sae da umutho ho, ma vẹ dhugbẹ seba ẹda riẹriẹriẹ.

3. Ẹvẹ ma sae rọ rehọ adhẹẹ kẹ amọfa evaọ iroro nọ a jẹ kpahe udi nọ u re mu?

Ohwo kpobi ọ rẹ jiroro kẹ omobọ riẹ sọ ọ rẹ da udi nọ u re mu. Ma re gu omọfa ẹdhọ họ nọ ọ tẹ jiroro nọ ọ rẹ da umutho udi. Yọ ma rẹ gba ohwo họ hayo tẹzẹ iẹe he nọ ọ tẹ ta nọ ọ be da vievie he. (Ahwo Rom 14:10) Ma rẹ siọ udi ba ẹda nọ ma tẹ ruẹ nọ o te wha ebẹbẹ se amọfa. (Se Ahwo Rom 14:21.) Ma re “ru oware nọ o rẹ kẹ omọfa erere orọnikọ [omobọ mai hi].”—Se 1 Ahwo Kọrint 10:23, 24.

GBE WUHRẸ EWARE EFA

4. Whọ rẹ jiroro sọ whọ rẹ da udi nọ u re mu

Ẹvẹ Jesu o rri udi nọ u re mu nọ a rẹ da? Re whọ riẹ uyo na, se kpahe iruo igbunu ọsosuọ nọ o ru. Se Jọn 2:1-11, kẹsena wha vẹ ta ẹme kpahe enọ nana:

• Ẹvẹ iruo igbunu nana nọ Jesu o ru na u ro fiobọhọ kẹ omai riẹ oghẹrẹ nọ o rri udi nọ u re mu gbe ahwo nọ a rẹ dae?

• Nọ orọnọ Jesu ọ ta ha inọ o thọ re a da udi nọ u re mu na, ẹvẹ u fo nọ Oleleikristi o re rri ohwo nọ ọ jiroro nọ ọ rẹ da udi?

O make rọnọ o thọ họ re Oleleikristi ọ da udi nọ u re mu na, orọnikọ ẹsikpobi u kiehọ re ọ da udi hi. Se Itẹ 22:3, kẹsena wha vẹ ta kpahe epanọ eware nọ e rrọ obotọ na e sai ro dhesẹ sọ whọ rẹ da udi:

• Whọ be te dhẹ omoto hayo imotosaikoro, hayo ru iruo evaọ ẹjini.

• Who dihọ.

• Edọkita ọ ta nọ whọ gbẹ da udi nọ u re mu hu.

• Whọ rẹ sai su omara ha nọ udi o tẹ rrọ otọ.

• Uzi egọmeti o kuvẹ hẹ inọ whọ da udi nọ u re mu.

• Whọ rrọ kugbe ohwo nọ ọ jiroro nọ ọ rẹ da udi vievie he fikinọ evaọ okenọ u kpemu ọ jẹ da vroma.

Kọ u fo re idi nọ i re mu e jọ ehaa-orọo ra hayo omakugbe ọfa jọ nọ who bi ru? Re whọ riẹ oware nọ o sai fiobọhọ kẹ owhẹ jiroro na, kporo IVIDIO na.

IVIDIO: Kọ U Fo nọ Me re Fi Idi Egaga Hotọ? (2:41)

Se Ahwo Rom 13:13 gbe 1 Ahwo Kọrint 10:31, 32. Nọ wha te se oria ikere ọvuọvo no, wha vẹ ta ẹme kpahe onọ nana:

• Ẹvẹ ohrẹ Ebaibol nana o sai ro fiobọhọ kẹ owhẹ jiroro nọ i re ru eva were Jihova?

5. Fi umuo nọ whọ rẹ da ba họ

Otẹrọnọ whọ jiroro nọ whọ rẹ da idi nọ i re mu, kareghẹhọ onana: O make rọnọ Jihova o mukpahe idi nọ i re mu nọ a rẹ da ha na, o mukpahe idi nọ a rẹ da vroma. Fikieme? Se Hosia 4:11, 18, kẹsena wha vẹ ta ẹme kpahe onọ nana:

• Eme ọ rẹ sae via nọ ohwo ọ tẹ be da udi bu hrọ?

Eme ọ rẹ sai fiobọhọ kẹ omai nọ ma gbẹ rọ da udi bu hrọ họ? O gwọlọ nọ ma rẹ riẹ utho nọ ma sae da. Se Itẹ 11:2, kẹsena wha vẹ ta ẹme kpahe onọ nana:

• Fikieme u ro woma re who fi umuo nọ whọ rẹ da ba họ?

6. Oware nọ o sai fiobọhọ kẹ ohwo nọ ọ gbẹ da idi vroma ha

IVIDIO: ‘Uzuazọ Mẹ O tẹ Vẹso Omẹ’ (6:32)

• Evaọ ividio na, eme idi nọ Dmitry ọ jẹ da vroma e jẹ lẹliẹe ru?

• Kọ ọ sae siọ idi ba ẹda ẹsiẹsiẹe?

• Ẹvẹ ọ sae rọ siọ idi ba ẹda vroma uwhremu na?

Se 1 Ahwo Kọrint 6:10, 11, kẹsena wha vẹ ta ẹme kpahe enọ nana:

• Ẹvẹ idi nọ a rẹ da vroma i yoma te?

• Eme o dhesẹ nọ ohwo nọ ọ rẹ da idi vroma ọ sai nwene?

Se Matiu 5:30, kẹsena wha vẹ ta ẹme kpahe onọ nana:

• Nọ Jesu ọ ta nọ ohwo o bru obọ riẹ no, u dhesẹ nọ ma re siobọno eware jọ re ma sai ru eva were Jihova. Eme whọ rẹ sai ru otẹrọnọ o be bẹ owhẹ re whọ siọ idi ba ẹda vroma?a

Se 1 Ahwo Kọrint 15:33, kẹsena wha vẹ ta ẹme kpahe onọ nana:

• Otẹrọnọ egbẹnyusu ra a rẹ da idi, eme onana o rẹ sae lẹliẹ owhẹ ru?

EME WHO WUHRẸ NO?

Jihova o ru udi re u ru oma were omai, rekọ o mukpahe udi nọ a rẹ da buobu gbe idi nọ a rẹ da vroma.

Ọkiẹkpemu

• Eme Ebaibol na ọ ta kpahe udi nọ u re mu?

• Ebẹbẹ vẹ i re noi ze nọ ma tẹ be da idi vroma?

• Ẹvẹ ma sae rọ rehọ adhẹẹ kẹ amọfa evaọ iroro nọ a jẹ kpahe udi?

KIẸ KPAHE EFA

Ẹvẹ izoge a sae rọ jẹ emamọ iroro evaọ ẹme udi nọ u re mu?

Udi O Viẹ Owhẹ Họ Họ (2:31)

Se kpahe eware nọ whọ rẹ sai ru re whọ siọ idi ba ẹda vroma.

“Eware nọ E rẹ Sai Fiobọhọ kẹ Owhẹ Da Umutho Udi” (Uwou-Eroro Na, Ọvo 1, 2010)

Kọ u fo re Oleleikristi o kuomagbe ahwo rehọ egalase udi kaehọ ohwohwo?

“Enọ Ahwo nọ A s’Ebe” (Uwou-Eroro Na, Ava 15, 2007)

Jọ iku nọ uzoẹme riẹ o ta nọ “Mẹ Jọ Othẹ nọ Ọ rẹ Kake Vọ Họ,” se kpahe epanọ ọzae jọ ọ sae rọ siọ idi ba ẹda.

“Ebaibol O re Nwene Uzuazọ Ohwo” (Uwou-Eroro Na, Asoi 1, 2012)

O make rọnọ who you Jihova gaga jẹ be daoma re who gbe ru oware ovo nọ o rẹ dhae eva ha na, u ti wo ẹsejọ nọ eware e te thọ owhẹ obọ. Rekọ izieraha jọ i yoma vi izieraha jọ. (1 Ahwo Kọrint 6:9, 10) Otẹrọnọ whọ raha uzi ulogbo jọ, kareghẹhọ nọ Jihova o gbe you owhẹ ghele; ọ gwọlọ nọ ọ rẹ rọvrẹ owhẹ je fiobọhọ kẹ owhẹ.

1. Eme ma re ru hrọ re Jihova ọ sae rọvrẹ omai?

O rẹ da ahwo nọ a you Jihova gaga nọ a tẹ raha uzi ulogbo jọ. Rekọ oma o rẹ sasa ae nọ a tẹ kareghẹhọ eyaa nọ Jihova ọ ya kẹ ahwo riẹ inọ: “Dede nọ izieraha rai e rrọ wawae, a ti ru ai jọ fuafo wọhọ ekpalekpa-ame.” (Aizaya 1:18) Ma te kurẹriẹ no eva ze, Jihova ọ rẹ rọvrẹ omai riẹriẹriẹ. Eme ma re ru ro dhesẹ nọ ma kurẹriẹ no? Oware nọ ma ruthọ na o rẹ da omai gaga, ma vẹ siọ iẹe ba, jẹ lẹ se Jihova re ọ rọvrẹ omai. Kẹsena ma vẹ daoma gaga re ma nwene ekpehre iroro hayo uruemu nọ o lẹliẹ omai raha uzi na, ma vẹ jẹ daoma koko izi Jihova nọ e rrọ fuafo na.—Se Aizaya 55:6, 7.

2. Ẹvẹ Jihova ọ rẹ rọ rehọ ekpako na fiobọhọ kẹ omai nọ ma tẹ raha uzi?

Nọ ma tẹ raha uzi ulogbo, Jihova ọ ta kẹ omai nọ ma “se ekpako ukoko na.” (Se Jemis 5:14, 15.) Ezae nana nọ a ro mu na a you Jihova gbe igodẹ riẹ. A rẹ sai fiobọhọ kẹ omai ruẹrẹ usu mai họ kugbe Jihova.—Ahwo Galesha 6:1.

Ẹvẹ ekpako na a re ro fiobọhọ kẹ omai nọ ma tẹ raha uzi ulogbo? Ekpako ivẹ hayo esa a rẹ rehọ Ebaibol na rọ kpọ omai họ. A rẹ jẹ tuduhọ omai awọ jẹ kẹ omai ehrẹ nọ i re fiobọhọ kẹ omai nọ ma gbẹ wariẹ raha uzi na ha. Otẹrọnọ ohwo nọ ọ raha uzi ulogbo ọ gbẹ rọwo kurẹriẹ hẹ, ekpako na a re si ei no ukoko re ọ gbẹ wha ekpehre uruemu na fihọ amọfa ha.

GBE WUHRẸ EWARE EFA

3. Ma tẹ feva izieraha mai, u re ru omai wariẹ wo emamọ usu kugbe Jihova

Uzi kpobi nọ ma raha o rẹ dha Jihova eva, fikiere ma rẹ feva kẹe. Se Olezi 32:1-5, kẹsena wha vẹ ta ẹme kpahe onọ nana:

• Fikieme u ro woma re ma feva izieraha mai kẹ Jihova ukpenọ ma rẹ ko ai dhere?

IVIDIO: “Enọ Jihova O You Ọ rẹ Whọku” (3:01)

• Evaọ ividio na, ẹvẹ ekpako na a ro fiobọhọ kẹ Canon zihe bru Jihova ze?

U fo nọ ma rẹ ko oware ovo dhere ekpako na ha, ma rẹ ta uzẹme na kpobi kẹ ae, keme obọ a gwọlọ fihọ kẹ omai. Se Jemis 5:16, kẹsena wha vẹ ta ẹme kpahe onọ nana:

• Ma tẹ ta uzẹme na kpobi kẹ ekpako na, ẹvẹ o sai ro ru ei lọhọ kẹ ae re a fiobọhọ kẹ omai?

4. Jihova ọ rẹ re ohrọ erahaizi

Nọ ohwo nọ ọ raha uzi ulogbo ọ gbẹ rọwo kurẹriẹ hẹ, a re si ei no ukoko na, yọ ma re gbe lele ohwo na nyusu hayo re da kugbe he. Se 1 Ahwo Kọrint 5:6, 11, kẹsena wha vẹ ta ẹme kpahe onọ nana:

• Wọhọ epanọ ẹvi o re ru ukulu ebrẹdi fu na, ẹvẹ o sai ro gbe ukoko na ku nọ ma te bi kuomagbe hayo nyusu kugbe ọrahauzi nọ ọ rọwo kurẹriẹ hẹ?

Ẹvẹ oghẹrẹ nọ Jihova o re ru ahwo nọ a raha uzi u ro dhesẹ nọ o wo ororokẹ gbe ohrọ-oriọ, ọ tẹ jẹ rrọ yoyou?

5. Jihova ọ rẹ rọvrẹ omai nọ ma te kurẹriẹ

Jesu ọ kẹ oriruo jọ ro dhesẹ epanọ o rẹ jọ kẹ Jihova nọ ohwo o te kurẹriẹ. Se Luk 15:1-7, kẹsena wha vẹ ta ẹme kpahe onọ nana:

• Eme onana u wuhrẹ owhẹ kpahe Jihova?

Se Izikiẹl 33:11, kẹsena wha vẹ ta ẹme kpahe onọ nana:

• Eme ohwo o re ru hrọ ro dhesẹ nọ o kurẹriẹ no?

EME WHO WUHRẸ NO?

Otẹrọnọ ma raha uzi ulogbo rekọ ma je kurẹriẹ jẹ gbaemu nọ ma re gbe ru oware uyoma na ha, Jihova ọ rẹ rọvrẹ omai.

Ọkiẹkpemu

• Fikieme u ro woma re ma feva izieraha mai kẹ Jihova?

• Eme o gwọlọ nọ ma re ru re Jihova ọ sae rọvrẹ omai?

• Otẹrọnọ ma raha uzi ulogbo, fikieme u ro fo nọ ma nyabru ekpako na re a fiobọhọ kẹ omai?

KIẸ KPAHE EFA

Rri epanọ Jihova o ro dhesẹ ohrọ-oriọ kẹ ọzae jọ wọhọ epanọ ọ ta evaọ obe Aizaya 1:18.

Whọ Vro Ohrọ-Oriọ Jihova Ha (5:02)

Ẹvẹ ukoko nọ a re si ohwo no u re ro fiobọhọ kẹ ukoko na soso?

“Epanọ A Sae rọ Re Ohrọ Ohwo nọ Ọ Raha Uzi je Dhesẹ nọ A You Rie” (Uwou-Eroro Na, Aria 2024)

Se kpahe epanọ whọ sae rọ vuẹ omọfa nọ ọ rrọ ukoko na ha kpahe oware nọ u dhesẹ re a si ohwo no ukoko.

“Epanọ A Sae rọ Re Ohrọ Ohwo nọ Ọ Raha Uzi je Dhesẹ nọ A You Rie” (Uwou-Eroro Na, Aria 2024)

Jọ iku nọ uzoẹme riẹ o ta nọ “Me re zihe bru Jihova,” se kpahe oware nọ ọzae jọ nọ o ghoro no ukoko no vẹre ọ rọ ta nọ Jihova o si rie zihe ze.

“Ebaibol Na O Re Nwene Uzuazọ Ohwo” (Uwou-Eroro Na, Ane 1, 2012)