Ahwo Galesha 6:9—“Je Oma Oware Uwoma Uruo O rọ Omai Hi”

“Ma jọ oware uwoma uruo o bẹ omai no ho, keme nọ oke u te te, ma te kọrọ ibi riẹ otẹrọnọ oma o gbẹ rrọ omai no ho.”—Ahwo Galesha 6:9, Efafa Akpọ Ọkpokpọ.

“Je oma oware uwoma uruo o rọ omai hi: keme u re ti krẹ hẹ re ma te kọrọ ibi rai, otẹrọnọ oma o rọ omai hi.”—Ahwo Galesha 6:9, Ebaibol Ẹri Na.

Otofa Eme nọ E Rrọ Ahwo Galesha 6:9

Pọl ukọ na ọ tuduhọ Ileleikristi awọ re a hae daoma ru oware nọ u kiehọ hayo nọ uwoma evaọ aro Ọghẹnẹ. A te ru ere, Jihova ọ te ghale ae.

“O bẹ omai no ho.” A sae jẹ fa ẹme nana nọ, oma oware uwoma uruo “o rọ omai hi.” Evaọ ẹvẹrẹ ọsosuọ nọ a ro kere ẹme nana, a sae jẹ rehọ iẹe dhesẹ epanọ ohwo ọ rẹ kuvẹ re udu u whrehe iei hi. Pọl ukọ na ọ riẹ nọ eme nana i kie kpahe iẹe re, keme u wo okejọ nọ edawọ nọ i te rie e jẹ te lẹliẹ udu whrehe iei.—Ahwo Rom 7:21-24.

“Oware uwoma,” hayo oware nọ u kiehọ nọ a fodẹ evaọ oria nana u kiekpahe oware kpobi nọ u fo nọ Oleleikristi o re ru evaọ egagọ Ọghẹnẹ. Yọ ọjọ họ eware sa-sa nọ ohwo o re ru ro fiobọhọ kẹ ahwo nọ a gbẹ be gọ Ọghẹnẹ gbe amọfa.—Ahwo Galesha 6:10.

“Ma te kọrọ ibi riẹ otẹrọnọ oma o gbẹ rrọ omai no ho.” Pọl ukọ na o dhesẹ nọ o sae rehọ oke re a tẹ te ruẹ erere eware iwoma nọ a bi ru, nwane wọhọ epanọ eware nọ ọwhẹrẹ ọ kọ e rẹ rehọ oke re e tẹ te rro na. Nọ orọnọ Pọl ọ ta kpahe ibi nọ a rẹ kọrọ hayo vu na, ọ rọ onana dhesẹ erere hayo uye nọ u re no oware nọ ohwo o ru ze, wọhọ epanọ o rrọ owọ avọ 7 na, nọ o ta nọ: “Oware kpobi nọ ohwo ọ be kọ, oye o ti vu re.” Onana u dhesẹ nọ Oleleikristi ọ tẹ be hae daoma ru oware uwoma, Jihova ọ rẹ ghale iẹe evaọ idhere buobu, yọ o ti wo uzuazọ ebẹdẹ bẹdẹ.—Ahwo Rom 2:6, 7; Ahwo Galesha 6:8.

Eme nọ E Wariẹ Ahwo Galesha 6:9 Họ

Pọl ukọ na o kere ileta nana se Ileleikristi nọ e jẹ rria Galesha evaọ oware wọhọ 50-52 C.E. O kere ileta na re ọ thọ Ileleikristi uzẹme fiki eviẹhọ ahwo jọ nọ a se omarai Ileleikristi rekọ nọ a bi gu erue kpahe Jesu. (Ahwo Galesha 1:6, 7) Ileleikristi eviẹhọ nana a je si ikẹ inọ o gbahọ nọ ilele Jesu a re koko Uzi nọ Ọghẹnẹ ọ rọ kẹ orẹwho Izrẹl na, taure ohwo o te ti kiẹrẹe evaọ aro Ọghẹnẹ. (Ahwo Galesha 2:15, 16) Pọl ọ ta nọ Uzi na u ru iruo riẹ no, fikiere idibo Ọghẹnẹ a gbẹ rrọ otọ Uzi na ha, yọ o gbahọ nọ a re gbe koko iei hi.—Ahwo Rom 10:4; Ahwo Galesha 3:23-25.

Fikiere nọ Pọl ukọ na ọ tuduhọ Ileleikristi awọ nọ “jọ oware uwoma uruo” o bẹ ae no ho, orọnikọ ọ jẹ ta kpahe Uzi Mosis na ha. Ukpoye, ọ jẹ tuduhọ ae awọ re a “ru uzi Kristi na gba,” koyehọ re a ru eware kpobi nọ Jesu o wuhrẹ kpahe ewoma nọ a re ru kẹ amọfa.—Ahwo Galesha 6:2; Matiu 7:12; Jọn 13:34.

Rri ividio ọkpẹkpẹe nana re whọ ruẹ eware nọ e rrọ obe Ahwo Galesha.