Edhesẹ Uyoyou kẹ Enọ I Wo Ẹgwọlọ

ILELEIKRISTI a wo te owha-iruo gbe ọghọ nọ a re ro dhesẹ uyoyou kẹ inievo emezae gbe emetẹ nọ i wo ẹgwọlọ. (1 Jọn 3:17, 18) Pọl ukọ na o kere nọ: “Joma ru iruo ezi kẹ ahwo kpobi, onọ o mae ro kọ rọ kẹ otu nọ ọrọ ẹgba orọwọ na.” (Ahwo Galesha 6:10) Oniọvo jọ nọ ọ gọ Jihova te ikpe udhuvẹ no ọ ruẹ uyoyou ogba-inievo Ileleikristi evaọ etoke ẹyao gbe uwhu aye riẹ. O kere nọ:

“Nọ mẹ jẹ rẹro te aye mẹ evaọ uwou eva oke ẹyao riẹ na, mẹ sai ruiruo evaọ enwene emerae ivẹ hẹ. Ẹvẹ oma u vori omẹ te nọ egbẹnyusu na evaọ ukoko na a rehọ udu obọ rai nyaze ti fiobọhọ! Ekẹ ugho buobu i te omai obọ—‘re ma ro fiobọhọ eva araha na,’ wọhọ epanọ ekade uyere enana e jẹ ta—rọ hwa esa ugho nọ a momo, ekwakwa uwou, gbe araha efa.

“Eka ivẹ taure aye mẹ o te ti whu, ọsẹro okogho mai ọ tẹ nyaze iweze uduotahawọ jọ. O te dhesẹ k’omai iwoho nọ o ti dhesẹ kẹ ukoko na evaọ urere oka na. Ma rọ ifonu gaviezọ kẹ iwuhrẹ na—kugbe omakugbe kẹ usiuwoma ota nọ ọsẹro okogho na o je ru. Eva iwuhrẹ enana jọ, o ru nọ ahwo kpobi nọ a kokohọ kẹ usiuwoma ota na a rọ rehọ unu-ovo ta kẹ aye mẹ nnọ ‘doo.’ Fikiere, dede nọ ọ jọ etẹe eva ugboma ha, ọ jọ ọkora ha.

“Eva umutho euwa jọ nọ o whu no, enwene ekpako na kpobi a te zurie ziọ obọ uwou. Bu vi inievo udhusoi a weze ze evaọ ẹdẹ ọyena ọvo. Emuore ọ ‘rayẹ’ ruọ ehru emẹjẹ kẹ ahwo na kpobi. Mẹ rẹ sae kareghẹhọ ekẹ na kpobi hi, eme ororokẹ, eme ọbọga, gbe elẹ nọ a lẹ kẹ omẹ. Ẹvẹ enana e jọ ọbọga te! Me te bi bo se inievo na nọ a dobọji evaọ obufihọ emuore gbe ẹruẹrẹ uwou na!

“U te no ukoko Jihova no, diẹse ọfa a rẹ jọ ruẹ edhesẹ ohrọ otiọye na, ororokẹ, gbe uyoyou? Ahwo buobu nẹnẹ a rẹ sai kele emamọ egbẹnyusu nọ a wo. Jihova ọ ghale omai no avọ uviuwou ologbo ọrọ inievo emezae gbe emetẹ ẹzi!”—Mak 10:29, 30.