-
Epanọ A Ruẹrẹ Ukoko na HọReawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
-
-
Jihova yọ Ọghẹnẹ nọ ọ rrọ kpatiẹ. (1 Ahwo Kọrint 14:33) Fikiere ma sai rẹro nọ o ti koko ahwo riẹ họ kpatiẹ re. Ẹvẹ a ruẹrẹ ukoko Ileleikristi na họ? Eme ma rẹ sai ru re eware e gbẹ nya kpatiẹ evaọ ukoko na?
1. Ono o wuzou ukoko na?
“Kristi o wuzou ukoko na.” (Ahwo Ẹfisọs 5:23) Ọ be rẹrote iruẹru ahwo Jihova nọ e rrọ akpọ-soso no obọ odhiwu ze. Jesu ọ rọ “ọrigbo nọ a re fievahọ nọ o wo areghẹ na” mu, koyehọ umutho ekpako ukoko jọ nọ a re je se Utu Ẹruorote, yọ a kri ukoko na no. (Se Matiu 24:45-47.) Wọhọ ikọ gbe ekpako ikpe-udhusoi ọsosuọ nọ e jọ Jerusalẹm, Utu Ẹruorote na o rẹ vuẹ ikoko nọ e rrọ akpọ na soso oware nọ a re ru. (Iruẹru Ikọ 15:2) Orọnọ ezae nana a bi su ukoko mai hi. Rekọ Ẹme Jihova nọ ọ rrọ Ebaibol na a bi ru lele, a te je bi lele eware nọ Jesu nọ o wuzou ukoko na ọ ta.
2. Eme họ iruo ekpako na?
Ekpako ukoko yọ ezae Ileleikristi nọ i kri ukoko na no nọ e rẹ rọ Ebaibol na wuhrẹ jẹ tuduhọ ahwo Jihova awọ. A rẹ hwa ae osa fiki iruo rai hi. Ukpoye, a re ru iruo na “avọ unevaze evaọ aro Ọghẹnẹ; orọnọ fiki erere nọ a rẹ rọ ewhariọ wo ho, rekọ avọ ọwhọ.” (1 Pita 5:1, 2) Idibo iruiruo a re fiobọhọ kẹ ekpako na, yọ nọ oke o be nya na, a sae rehọ ai mu ekpako re.
Utu Ẹruorote na o rẹ rọ ekpako jọ mu esẹro okogho. Yọ esẹro nana a re weze kpohọ ikoko sa-sa re a wuhrẹ jẹ tuduhọ inievo na awọ. Ae a rẹ rehọ ezae nọ e nyate eware nọ Ikereakere na e ta mu ekpako gbe idibo iruiruo.—1 Timoti 3:1-10, 12; Taitọs 1:5-9.
3. Eme ohwo kpobi nọ ọ rrọ ukoko na o re ru?
Ahwo kpobi nọ a rrọ ukoko na a re “jiri odẹ Jihova.” A re ru onana nọ a te bi wobọ evaọ iwuhrẹ ukoko, jẹ be hae ta usi uwoma na wọhọ epanọ uyero rai o kuvẹ riẹ.—Se Olezi 148:12, 13.
GBE WUHRẸ EWARE EFA
Wuhrẹ kpahe oghẹrẹ osu nọ Jesu ọ rrọ, oghẹrẹ nọ ekpako na a be rọ daoma rọ aro kele oriruo riẹ, gbe epanọ ma sai ro yoẹme kẹ Jesu gbe ekpako na.
4. Jesu yọ osu nọ ọ rrọ wowou
Jesu o zizie omai nọ ma ru oware jọ. Se Matiu 11:28-30, kẹsena wha vẹ ta ẹme kpahe onọ nana:
Ẹvẹ Jesu ọ gwọlọ nọ ma rri isuẹsu riẹ?
Ẹvẹ ekpako na a be rọ rehọ aro kele oriruo Jesu? Kporo IVIDIO na.
Ebaibol na ọ fodẹ oghẹrẹ nọ u fo nọ ekpako na a re ro ru iruo rai.
Se Aizaya 32:2 gbe 1 Pita 5:1-3, kẹsena wha vẹ ta ẹme kpahe enọ nana:
Kọ o gbẹ were owhẹ nọ whọ rọ riẹ nọ ekpako a rẹ sasa amọfa oma wọhọ Jesu? Fikieme whọ rọ ta ere?
Idhere efa vẹ ekpako na a be rọ rehọ aro kele Jesu?
5. Ekpako a rẹ rọ oriruo rai ro wuhrẹ amọfa
Ẹvẹ Jesu ọ gwọlọ nọ ekpako na a rri iruo rai? Kporo IVIDIO na.
Jesu ọ ta oghẹrẹ nọ ahwo nọ a be kobaro evaọ ukoko na a re rri omarai. Se Matiu 23:8-12, kẹsena wha vẹ ta ẹme kpahe onọ nana:
Ohẹriẹ vẹ o rrọ oghẹrẹ nọ Ebaibol ọ ta nọ ekpako ukoko a rẹ jọ gbe oware nọ whọ be ruẹ evaọ oma isu egagọ?
Ekpako na a rẹ daoma wo emamọ usu kugbe Jihova je fiobọhọ kẹ ahwo uviuwou rai ru epọvo na re
Ekpako na a rẹ rẹrote ahwo kpobi nọ a rrọ ukoko na
Ekpako na a rẹ ta usi uwoma kẹse kẹse
Ekpako na a re wuhrẹ ahwo. A re je fiobọhọ ru Ọgwa Uvie fo je ru iruo efa
6. Ma sai yoẹme kẹ ekpako na
Ebaibol na ọ ta oware nọ u ro wuzou gaga re ma yoẹme kẹ ekpako na. Se Ahwo Hibru 13:17, kẹsena wha vẹ ta ẹme kpahe enọ nana:
Kọ u kiehọ nọ Ebaibol na ọ rọ ta kẹ omai nọ ma yoẹme jẹ romakpotọ kẹ enọ e be kobaro na? Fikieme whọ rọ ta ere, hayo kọ fikieme who gbe ro roro ere he?
Se Luk 16:10, kẹsena wha vẹ ta ẹme kpahe onọ nana:
Fikieme u ro wuzou re ma yoẹme kẹ ekpako na makọ evaọ emeware esese dede?
AHWO JỌ A RẸ TA NỌ: “U du gwọlọ nọ whọ rẹ jọ egagọ jọ họ.”
Didi irere who roro nọ i re te ohwo nọ o te bi kuomagbe amọfa gọ Ọghẹnẹ evaọ ukoko Isẹri Jihova jọ?
EME WHO WUHRẸ NO?
Jesu họ ọnọ o wuzou ukoko na. U fo nọ ma rẹ rọ evawere yoẹme kẹ ekpako na keme a be sasa omai oma jẹ be rọ oriruo rai wuhrẹ omai.
Ọkiẹkpemu
Ono o wuzou ukoko na?
Oghẹrẹ vẹ ekpako na a bi ro fiobọhọ kẹ ukoko na?
Eme omomọvo nọ ọ rrọ ukoko na o re ru?
KIẸ KPAHE EFA
Rri epanọ uyoyou nọ Utu Ẹruorote na gbe ekpako efa a wo kẹ ahwo ukoko na nẹnẹ o ga te.
Rri iruo nọ esẹro okogho a bi ru.
Se kpahe iruo nọ eyae a wo evaọ ukoko na.
“Kọ eyae nọ e rrọ ukoko Isẹri Jihova a re wuhrẹ ahwo?” (Uwou-Eroro Na, Akpe 1, 2012)
Se kpahe oware nọ ekpako na a re ru rọ tuduhọ ibe eg’Ọghẹnẹ rai awọ.
“Ekpako Ukoko ‘Ibe Iruiruo Rọkẹ Oghọghọ Mai’” (Uwou-Eroro Na, Ọvo 15, 2013)
-
-
Ẹvẹ Uviuwou Ra O Sai ro Wo Evawere?—Abọ 1Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
-
-
1. Didi ohrẹ Ebaibol na ọ kẹ ezae?
Jihova ọ rọ ọzae mu re o wuzou uviuwou riẹ. (Se Ahwo Ẹfisọs 5:23.) Jihova ọ gwọlọ nọ ọzae na ọ rẹ jiroro nọ i re fiobọhọ kẹ uviuwou na. Ebaibol na ọ ta kẹ ezae na nọ: “Wha gbẹ hai you eyae rai.” (Ahwo Ẹfisọs 5:25) Ẹvẹ ọzae o re ro ru onana? Ọzae nọ ọ rrọ yoyou o re tete aye riẹ evaọ obọ uwou gbe obọ ore. Ọ rẹ thọ aye riẹ no enwoma, ọ rẹ daoma rẹrotei, je ru eware nọ e rẹ lẹliẹ eva were iẹe. (1 Timoti 5:8) Onọ o mai wuzou kọ, o re fiobọhọ kẹe wo usu okpekpe kugbe Ọghẹnẹ. (Matiu 4:4) Wọhọ oriruo, ọ rẹ lẹ kugbe aye riẹ, a ve je se Ebaibol na kugbe. Nọ ọzae ọ tẹ be rẹrote aye riẹ ziezi, ọyomariẹ o re wo emamọ usu kugbe Jihova.—Se 1 Pita 3:7.
-
-
Iruo “Ọrigbo nọ A re Fievahọ nọ O Wo Areghẹ Na”Reawere Uzuazọ Bẹdẹ Bẹdẹ!—Uwuhrẹ Ebaibol nọ O te Kẹ Owhẹ Erere
-
-
Jesu họ ọnọ o wuzou ukoko Ileleikristi na. (Ahwo Ẹfisọs 5:23) Nẹnẹ, Jesu nọ ọ rrọ obọ odhiwu na ọ be rehọ “ọrigbo nọ a re fievahọ nọ o wo areghẹ na” kpọ ilele riẹ nọ e rrọ otọakpọ na. (Se Matiu 24:45.) Jesu họ ọnọ ọ rehọ “ọrigbo” na mu, yọ ọ kẹ riẹ udu nọ ọ sae rọ jiroro eware jọ kẹ ilele riẹ. O make rrọ ere na, ọrigbo na ọ rrọ otọ Kristi, yọ ọ rẹ jẹ gbodibo kẹ inievo Kristi. Ono họ ọrigbo yena? Oghẹrẹ vẹ ọrigbo na ọ be rọ rẹrote omai?
-