“Re Uwoma kẹ Owhai”

Pọl o dhesẹ ewoma ẹmeoyo ọfa nọ o kere nọ: “ ‘Dhẹ ọsẹ ra avọ oni ra’ (onana họ uzi ọsosuọ avọ eya), ‘re uwoma kẹ owhai, wha ruẹse ria akpọ na kri.’ ” (Ahwo Ẹfẹsọs 6:2, 3; Ọnyano 20:12) Ẹvẹ ẹmeoyo kẹ ọsẹ gbe oni ohwo o rẹ rọ wha ewoma se ohwo?

Orọ ọsosuọ, kọ o gbẹ rọ uzẹme inọ esẹ gbe ini a wo erere ẹkpako gbe eriariẹ? Dede nọ a make riẹ kpahe kọmputa hayo eware efa jọ nọ a be jọ isukulu wuhrẹ tere he, a riẹ kpahe ẹria-uzuazọ gbe eyerikugbe ebẹbẹ uzuazọ ziezi. Emoha, evaọ abọdekọ riẹ, a kare iroro owowa nọ ohwo o re wo no ẹkpako ze. Fikiere, emoha e rẹ jiroro ekpuakpua, a re kie kẹ otunyẹ ọhwa, avọ enwoma nọ i re noi ze te ai. Avọ iroro, Ebaibol na e ta nọ: “Ugheghẹ o rọ eva ọmaha.” Eme họ ifue riẹ? “Oviaviẹ ofa u re le i noi eva.”—Itẹ 22:15.

Erere ẹmeoyo ọ nya ba usu ọyewọ gbe ọmọ ọvo ho. Re okegbe ohwo-akpọ ọ nya kpatiẹ avọ erere, ọrọwokugbe ọ rẹ jariẹ hrọ, onọ o rẹ gwọlọ ẹmeoyo. Wọhọ oriruo, oware nọ o rẹ wha udhedhẹ, okugbe, gbe evawere ziọ orọo họ unevaze re a kie kẹ ohwo odekọ, viukpọ ayare owha nọ a re fihọ amọfa gbe ababọ ọdawẹ kẹ ẹgwọlọ gbe iroro amọfa. Evaọ oria iruo, ẹmeoyo iruiruo na o r’oja otẹrọnọ iruo na i re w’aro. Kpahe izi gbe ijaje egọmeti, orọnikọ ẹmeoyo ọ rẹ lẹliẹ ohwo vabọ no uye ọvo ho rekọ o rẹ jẹ wha ufuoma gbe uketha jọ ze.—Ahwo Rom 13:1-7; Ahwo Ẹfẹsọs 5:21-25; 6:5-8.

Emoha nọ e rẹ ghẹmeeyo kẹ udu-esuo a re zihe ruọ awha-ohọo evaọ ẹwho. Wo ohẹriẹ, ẹmeoyo nọ ohwo o wuhrẹ evaọ oke emaha o re wholo ohwo evaọ etoke uzuazọ riẹ kpobi. Ẹvẹ o rọ erere te re a wuhrẹ onana evaọ etoke emaha!

Kareghẹhọ nọ, wọhọ epanọ Pọl ukọ na o fi rie họ, ujaje na re a yoẹme kẹ ọsẹ gbe oni u wo eyaa akuava, koyehọ, re “u woma kẹ owhai, wha ruẹse ria akpọ na kri.” A rẹ ruẹ ẹgbagba eyaa nana eva Itẹ 3:1, 2: “Ọmọ mẹ, uwuhrẹ mẹ o thọrọ owhẹ ẹro ho, jọ eva ra koko izi mẹ; keme e rẹte kẹ owhẹ edẹ ithethei gbe ukriakpọ avọ evawere.” Osohwa ulogbo rọkẹ enọ i yoẹme họ usu kugbe Jihova enẹna gbe uzuazọ ebẹdẹ bẹdẹ evaọ akpọ ọkpokpọ udhedhẹ.—Eviavia 21:3, 4.