“Fikiere u tomai te obọ ufihọ kẹ ahwo otiọye, re ma ruẹse jọ egba iruiruo eva uzẹme na.”—3 JỌN 8.

3. Ẹvẹ ma sai ro duku uvi oghọghọ gbe edẹro?

³ Ẹvẹ eware i re wo ohẹriẹ te otẹrọnọ ahwo a be raro kele oghẹrẹ nọ Jihova o bi ro yeri kugbe amọfa—re a jọ wowou, ruọghọ, ghọ-erara! O ru rie vevẹ inọ edidi evawere uzẹme o roma hwa omodawọ nọ ma rẹ rọ nyate isiuru mai hi. Ikpoye, onana họ usiavẹ na: “Ẹkẹ oghale o mae rọ vi emio.” (Iruẹru 20:35) Re ma ruẹ uvi oghọghọ gbe edẹro, ma re fi ezadhe gbe omohẹriẹ nọ i re bru omai abọ dhe kparobọ. Yọ ma re je fiobọhọ kẹ ahwo nọ i bi lele omai gọ Jihova. U wuzou re ma yo ohrẹ onana: “Fikiere u tomai te obọ ufihọ kẹ ahwo otiọye, re ma ruẹse jọ egba iruiruo eva uzẹme na.” (3 Jọn 8) Edhesẹ erara-ghọ kẹ ahwo nọ i te, te epanọ ẹgba mai u te, u wo erere evaọ idhere ivẹ—o rẹ kẹ ọnọ o bi ru ọghọ na gbe ọnọ a bi ru kẹ na erere. Kọ, amono a rọ usu enọ i te kẹ ‘emamọ odederehọ’ mai?