• Eme Obe Eviavia O Ta Kpahe Ewegrẹ Ọghẹnẹ?
    Uwou-Eroro Na (Uwuhrẹ)—2022 | Asoi

    • A DHESẸ EWEGRẸ ỌGHẸNẸ KẸ OMAI

      Arao ojihẹ nọ a jọ obe Eviavia ta kpahe nọ o wo izou ihrẹ nọ o no akpọ na nọ ọ wọhọ abade na ze. O wo izei ikpe, yọ itu-uvie ikpe e rrọ izou na. Ọ wọhọ okeke, awọ riẹ e wọhọ erọ adaka, yọ unu riẹ o wọhọ unu okpohrokpo.

      ARAO OJIHẸ NỌ O WO IZOU IHRẸ NA

      Arao nana o “no evaọ abade na ze,” o wo izou ihrẹ, izei ikpe, gbe itu-uvie ikpe. (Evia. 13:1-4) O dikihẹ kẹ egọmeti kpobi nọ i bi su ahwo-akpọ no oke anwae ze rite inẹnẹ. Izou ihrẹ na i dikihẹ kẹ egọmeti ihrẹ nọ i su erẹwho nọ idibo Ọghẹnẹ a rrọ, hayo nọ i kpokpo idibo Ọghẹnẹ gaga. (edhe-ẹme avọ 6-8)

      6. Eme arao ojihẹ nọ o wo izou ihrẹ nọ a jọ Eviavia 13:1-4 fodẹ na o dikihẹ kẹ?

      6 Eme arao ojihẹ nọ o wo izou ihrẹ na o dikihẹ kẹ? (Se Eviavia 13:1-4) Arao ojihẹ nọ a fodẹ evaọ oria Ebaibol nana ọ wọhọ okeke, awọ riẹ e wọhọ awọ adaka, unu riẹ o wọhọ unu okpohrokpo, yọ o wo izei ikpe. Erao ijihẹ ene nọ a fodẹ evaọ obe Daniẹl uzou avọ 7 na, ọjọ ọ wọhọ okeke, ọfa ọ wọhọ adaka, ọfa jọ ọ wọhọ okpohrokpo, ọnọ o kiọkọ o te wo izei ikpe. Rekọ ọnọ a fodẹ evaọ obe Eviavia na, ọye ọvo o wo eware nana kpobi. Fikiere ọ sai dikihẹ kẹ egọmeti ọvo goli hi. A ta nọ arao ojihẹ nana o wo “udu nọ o re ro su erua gbe itu ahwo gbe erọunu gbe erẹwho kpobi.” Onana u dhesẹ nọ egọmeti orẹwho ọvo o dikihẹ kẹ hẹ. (Evia. 13:7) Ma sae ta nọ arao ojihẹ nana o dikihẹ kẹ egọmeti kpobi nọ i bi su ahwo-akpọ anwẹdẹ ze rite inẹnẹ na.b—Ọtausi. 8:9.