Epanọ Ebaibol I Rri Orọo-Ofa gbe Ẹhẹriẹ

Jihova o rẹro nọ enọ e rọo a jọ kugbe ohwohwo ribri. Okenọ o ku ọzae avọ aye ọsosuọ na gbe evaọ orọo, Jihova ọ ta nọ: “Ọzae ọ rẹ . . . gbalọ aye riẹ, a vẹ jọ uwo ovo.” Uwhremu na, Jesu Kristi ọ wariẹ eme yena je fibae nọ: “Fikiere onọ Ọghẹnẹ o kugbe no, a jọ ohwo ọvo ọ hẹriẹ e he.” (Emuhọ 2:24; Matiu 19:3-6) Fikiere, Jihova avọ Jesu a rri orọo fihọ oware nọ o rẹ tọ, inọ uwhu ọvo o rẹ hẹrẹ iẹe. (1 Ahwo Kọrint 7:39) Nọ orọnọ Ọghẹnẹ ọ tuọ orọo họ na, a re rri orọo-ofa vovori hi. Evaọ uzẹme, Jihova o mukpahe orọo nọ a fa ababọ oware nọ Ebaibol e ta nọ o rẹ sae wha orọo-ofa ze.—Malakae 2:15, 16.

Eme Ebaibol e kuvẹ nọ o rẹ sae wha orọo-ofa ze? Jihova o mukpahe ẹnwae-obro gbe ọfariẹ-ogbe. (Emuhọ 39:9; 2 Samuẹle 11:26, 27; Olezi 51:4) Evaọ uzẹme, o rri ọfariẹ-ogbe yoma te epanọ ọ rọ kuvẹ inọ a sae rọ fiki riẹ fa orọo. (Rọkẹ ẹmeọta kpahe oware nọ ọfariẹ-ogbe o rrọ, rri Uzou avọ 9, edhe-ẹme avọ 7 ọrọ obe nana.) Jihova ọ kẹ ọnọ o bruẹnwae he udu nọ ọ rẹ rọ salọ sọ ọ rẹ gbẹ jọ orọo kugbe ọrivẹ-orọo riẹ nọ o bruẹnwae. (Matiu 19:9) Fikiere, otẹrọnọ ọnọ o bruẹnwae he na ọ jiroro inọ ọ rẹ fa orọo na, ọ raha uzi Jihova ha. Rekọ, ukoko Ileleikristi na o rẹ tuduhọ uvumọ ohwo awọ nọ ọ fa orọo riẹ hẹ. Evaọ uzẹme, eware jọ e rẹ sae lẹliẹ ohwo na jiroro nọ ọ be jọ orọo na ghele, maero otẹrọnọ ọrivẹ-orọo riẹ nọ o bruẹnwae na o gine kurẹriẹ no eva ze. Oghẹrẹ nọ o rrọ kpobi, enọ Ebaibol e kẹ udu nọ a rẹ sae fa orọo a rẹ jiroro na kẹ omobọ rai, a vẹ jẹ ruẹrẹ oma kpahe kẹ oware kpobi nọ u re no iroro nọ a jẹ na ze.—Ahwo Galesha 6:5.

Ileleikristi jọ a jiroro no inọ a rẹ hẹriẹ no ọrivẹ-orọo rai hayo fa orọo na fiki epanọ ebẹbẹ nọ e rrọ udevie rai e ga te dede nnọ ọrivẹ-orọo rai o bruẹnwae he. O tẹ via ere, Ebaibol e ta nọ ọnọ o bi no orọo na ọ rẹ rọo omọfa ha, inọ ‘ọye ọvo ọ jọ, hayo a ruẹrẹ họ.’ (1 Ahwo Kọrint 7:11) Oleleikristi otiọye na ọ rẹ gwọlọ aye hayo ọzae ọfa nọ ọ rẹ wariẹ rehọ họ. (Matiu 5:32) Rehọ iriruo jọ nọ ahwo jọ a jọ jiroro no inọ a rẹ hẹriẹ no ọrivẹ-orọo rai.

Ọzae o te keke aro fihọ se inọ ọ rẹ rẹrote uviuwou riẹ hẹ. Ẹsejọ uvuhu o rẹ sae jọ uviuwou fikinọ ọzae na o keke aro fihọ gbabọkẹ ae, orọnikọ fikinọ akpọ o ki ei thọ họ. Ebaibol e ta nọ: “Otẹrọnọ ohwo jọ ọ sae guọlọ kẹ . . . uwou riẹ [hẹ], ohwo ọyena ọ vro orọwọ na no, o te je yoma vi ohwo nọ ọ rọwo ho.” (1 Timoti 5:8) Otẹrọnọ ọzae otiọye na o gbe nwene he, aye na ọ sae jiroro inọ, re ọ sae rẹrote omobọ riẹ gbe emọ riẹ, o re siobe kẹ ọzae na re ọ ruẹse kwa siẹe ba. O tẹ ginẹ rrọ uzẹme inọ ọzae na o keke aro fihọ bi gbabọkẹ uviuwou riẹ, ekpako ukoko na a re se oniọvo otiọye na. A rẹ sai si ohwo nọ o keke aro fihọ gbabọkẹ uviuwou riẹ no ukoko.

Olahiẹ ogaga. Ohwo ọ rẹ sae lahiẹ ọrivẹ-orọo riẹ te epanọ o re tube ro fi uzuazọ ọrivẹ-orọo riẹ na họ ọza. Otẹrọnọ ọzae avọ aye na yọ Ileleikristi, ekpako ukoko a rẹ kiẹ ẹme na riwi. A rẹ sae rehọ fiki ofu-ọkpoo gbe ukpe ugbobọ si ohwo no ukoko.—Ahwo Galesha 5:19-21.

Nọ ohwo ọ tẹ be gwọlọ raha usu nọ ọrivẹ-orọo riẹ o wo kugbe Ọghẹnẹ. O sae jọnọ ohwo o bi ru ei bẹbẹ gaga kẹ ọrivẹ-orọo riẹ re ọ se Ọghẹnẹ ba ẹgọ hayo be tubẹ gwọlọ gbae họ re ọ raha uzi Ọghẹnẹ evaọ oghẹrẹ jọ. O tẹ via ere, ọnọ a bi kpokpo na ọ sae jiroro inọ edhere nọ o re ro “yo ẹme Ọghẹnẹ vi o rọ ahwo” họ, o re siobe kẹ ọrivẹ-orọo riẹ na re ọ ruẹse kwa no uwou na kẹe.—Iruẹru Ikọ Na 5:29.

Evaọ iyero esa nọ ma jọ obehru dhesẹ na, uvumọ ohwo ọ rẹ tuduhọ ọnọ uye o be bẹ na ha re ọ kwa siọ ọrivẹ-orọo riẹ ba hayo re ọ daji uwou na. Dede nọ egbẹnyusu nọ e kpako evaọ abọ-ẹzi gbe ekpako ukoko a rẹ sai fi obọ họ jẹ kẹ ohrẹ nọ u no Ebaibol ze, a rẹ sae riẹ eware kpobi nọ e be via evaọ udevie ọzae avọ aye totọ họ. Jihova ọvo ọ rẹ sae ruẹ oyena. Otẹrọnọ aye nọ ọ rrọ Oleleikristi o bi ru ẹme na rro vi epanọ o ginẹ rrọ re ọ ruẹse kwa siọ ọzae riẹ ba, hayo otẹrọnọ ọzae o bi ru ere, ọzae hayo aye otiọye na ọ be rọ ọghọ kẹ Ọghẹnẹ hayo ọruẹrẹfihotọ orọo na ha. Ohwo ọ tẹ faki bi gu ọrue re ọ ruẹse kwa siọ ọzae hayo aye riẹ ba, Jihova ọ riẹ kpahe iẹe, makọ oghẹrẹ nọ ọ ko riẹ dhere kẹ hẹ. Evaọ uzẹme, “eware na kpobi e ba rovie fihọ gbaladhẹ eva aro ọ nọ ma re lele.” (Ahwo Hibru 4:13) Rekọ Oleleikristi ọ tẹ daoma bẹ no yọ eware i bi dhe eyeyoma ghele, uvumọ ohwo ọ rẹ fo ẹe he nọ ọ tẹ kwa siọ ọrivẹ-orọo riẹ na ba. Evaọ ekuhọ riẹ kpobi, “mai kpobi ma ti . . . gu ọvuọ ẹkẹunu riẹ kẹ Ọghẹnẹ.”—Ahwo Rom 14:10-12.