Kọ whọ kareghẹhọ ẹdẹjọ nọ who ro kie evaọ okenọ whọ jọ ọmaha? Ẹsejọhọ whọ nwoma evaọ obọ hayo whọ whra ugbo. Kọ whọ kareghẹhọ oghẹrẹ nọ oni ra o je ro yere owhẹ hayo sasa owhẹ oma? Ẹsejọhọ oni ra o ririe omola na je fi uvovo họ iẹe. Dede nọ whọ jẹ viẹ, ẹwọ nọ ọ wọ owhẹ gbe ememe omosasọ nọ ọ jẹ ta kẹ owhẹ e jẹ lẹliẹ oma sasa owhẹ. Evaọ oke yena, omoware kpobi nọ u ru owhẹ, oni ra ọ rẹ sasa owhẹ oma.

Rekọ eware e rẹ gbẹ nwane jọ ere he nọ whọ be kpako na. Ẹsejọ dede whọ rẹ ruẹ ohwo nọ ọ rẹ sasa owhẹ oma ha nọ whọ tẹ rẹriẹ ovao dhe ebẹbẹ ilogbo. Ebẹbẹ nọ ohwo ọ rẹ rẹriẹ ovao dhe nọ ọ tẹ kpako no, e rẹ wọhọ ebẹbẹ esese nọ oniọmọ ọ rẹ jọ wọ ọmọ hayo fi uvovo họ omola riẹ hẹ. Joma ta kpahe iriruo jọ.

• O sae jọnọ a si owhẹ no iruo. Ọzae jọ nọ a re se Julian ọ ta nọ ọ gbẹ riẹ oware nọ o re ru hu nọ a si ei no iruo. Eware nọ o je roro kpahe họ, ‘Ẹvẹ mẹ te sae rọ rẹrote uviuwou mẹ? Fikieme ekọmpene na i ro si omẹ no iruo dede nọ me lele i rai ruiruo ikpe buobu no?’

• O sae jọnọ ofu o bi dhe owhẹ fikinọ orọo ra o fa. Aye jọ nọ a re se Raquel ọ ta nọ, “Nọ orọo mẹ avọ ọzae mẹ o fa evaọ ukpe ovo gbe emerae ezeza nọ e vrẹ, ọkora ọ tẹ da omẹ oma fia. O wọhọ ẹsenọ udu mẹ o ghale kpohọ abava. Edada riẹ e ga wumuo ho. Yọ ozọ epanọ akpọ mẹ ọ te jọ, u je mu omẹ gaga.”

• O sae jọnọ whọ be mọ ẹyao nọ ọ be rọwo kpo ho. Ẹsejọ oma o sai ru owhẹ wọhọ epanọ u ru Job, ọnọ ọ ta nọ: “Uzuazọ na o vẹso omẹ no; fikiere mẹ te jọ bẹdẹ hẹ.” (Job 7:16) O sae jọ owhẹ oma wọhọ epanọ o jọ kẹ ọzae jọ nọ a re se Luis nọ ọ kpako vrẹ ikpe 80 no, ọnọ ọ ta nọ, “Ẹsejọ o rẹ jọ omẹ oma nọ ẹdẹ uwhu mẹ be hẹrẹ.”

• Hayo o sae jọnọ ohwo jọ nọ who you gaga o whu, yọ whọ gwọlọ omosasọ. Ọzae jọ nọ a re se Robert ọ ta nọ, “Nọ ọmọ mẹ o whu evaọ asidẹnte arupre, o kaki mu omẹ ẹro ho. Edada riẹ e jọ wọhọ ẹsenọ a rọ ọgbọdọ othethei duwu omẹ lafi, ọkpọ onọ Ebaibol ọ ta ẹme te na.”​—⁠Luk 2:⁠35.

Robert, Luis, Raquel, gbe Julian a ginẹ ruẹ omosasọ dede nọ a rẹriẹ ovao dhe ebẹbẹ ilogbo. Yọ Jihova nọ ọ rrọ Ọghẹnẹ omosasọ na, ọye ọ sasa e rai oma. Ẹvẹ Jihova ọ rọ sasa ae oma? Kọ ẹvẹ Jihova ọ sae rọ sasa owhẹ oma re?

Pọl ukọ na o dhesẹ nọ Jihovaa yọ “Ọghẹnẹ nọ ọ rẹ kẹ omosasọ evaọ oghẹrẹ uyero kpobi, ọnọ ọ rẹ sasa omai oma evaọ uye kpobi nọ ma rrọ.” (2 Ahwo Kọrint 1:​3, 4) Fikiere Ebaibol na ọ kẹ omai imuẹro nọ Ọghẹnẹ ọ rẹ sai fiobọhọ kẹ ohwo kpobi, yọ makọ oghẹrẹ nọ ẹbẹbẹ na ọ gbẹdẹ te kẹhẹ, Ọsẹ obọ odhiwu mai na ọ rẹ sae sasa omai oma.

Rekọ o gwọlọ nọ ma re ru oware jọ ma tẹ gwọlọ nọ Ọghẹnẹ ọ sasa omai oma. Ẹvẹ edọkita ọ sai ro fiobọhọ kẹ omai ma gbẹ nya bru ei hi? Emọs ọruaro na ọ nọ inọ: “Kọ imava e sae nya usu, ajokpa nọ a tamu no ho?” (Emọs 3:3) Fikiere Ebaibol na ọ tuduhọ omai awọ nọ: “Wha si kẹle Ọghẹnẹ, o re ti si kẹle owhai.”​—Jemis 4:8.

Ẹvẹ o sai ro mu omai ẹro nọ Ọghẹnẹ o ti si kẹle omai? Orọ ọsosuọ, keme ọ jọ Ebaibol na vuẹ omai unuẹse buobu nọ ọ gwọlọ fiobọhọ kẹ omai. (Rri ẹmẹkpẹti nọ ọ rrọ uzoẹme nana.) Orọ avivẹ, keme ahwo buobu evaọ oke mai nana gbe oke nọ u kpemu, a gbiku epanọ Ọghẹnẹ ọ rọ sasa ae oma no.

Wọhọ epanọ ahwo buobu nẹnẹ a be gwọlọ obufihọ Ọghẹnẹ fiki ebẹbẹ na, ere o jọ kẹ Devidi ovie na re, ọnọ ọ rẹriẹ ovao dhe ebẹbẹ buobu. Evaọ okejọ ọ lẹ se Jihova nọ: “Yo uru ayare mẹ, okenọ me bose owhẹ.” Kọ Ọghẹnẹ o yo olẹ riẹ? Ee. Devidi o fibae nọ: “O te fiobọhọ kẹ omẹ, eva mẹ e te ghọghọ.”​—Olezi 28:​2, 7.

JESU Ọ RẸ SASA AHWO NỌ A RRỌ UWERI OMA RE

Ọghẹnẹ ọ gwọlọ nọ Jesu ọ rẹ sasa ahwo oma re. Evaọ usu iruo nọ Ọghẹnẹ ọ kẹ Jesu, ojọ họ re o fiobọhọ kẹ enọ e be ruẹ uye, jẹ “sasa ahwo nọ a rọ uweli oma.” (Aizaya 61:​1, 2) Wọhọ epanọ a ruaro riẹ, Jesu o gine fiobọhọ kẹ enọ “e be ruẹ uye, nọ ewha egbẹgbẹdẹ e rrọ uzou.”​—Matiu 11:​28-30.

Jesu ọ rrọ eme areghẹ riẹ sasa ahwo oma, ọ jọ wowou kugbe ahwo, yọ evaọ ẹsejọ dede o siwi enọ e jẹ mọ. Ọmoti jọ ọ lẹ Jesu ẹdẹjọ nọ: “O tẹ ruọ owhẹ, whọ sai ru omẹ fo.” Fikinọ ohrọ ọmoti na o re Jesu, o te yo kẹe nọ: “O ruọ omẹ. Jọ oma ra o fo.” (Mak 1:​40, 41) Ẹyao ọmoti na o te kpo.

Nẹnẹ, Jesu ọ gbẹ rrọ otọakpọ re ọ nyate omai oma jẹ sasa omai oma ha. Rekọ Jihova Ọsẹ riẹ, ọnọ ọ rrọ “Ọghẹnẹ nọ ọ rẹ kẹ omosasọ evaọ oghẹrẹ uyero kpobi” na, o gbe bi fiobọhọ kẹ enọ e gwọlọ obufihọ. (2 Ahwo Kọrint 1:3) Joma ta kpahe idhere ene jọ nọ Ọghẹnẹ ọ rẹ rọ sasa ahwo oma.

• Ebaibol Na. “Eware kpobi nọ a kere fihọ otọ anwẹdẹ na a kere ai re ma wuhrẹ no ai ze, re ma rọ ẹkwoma ithihakọ mai gbe omosasọ nọ u re no Ikereakere na ze wo ẹruore.”​—Ahwo Rom 15:4.

• Ẹzi Ọfuafo Na. Nọ Jesu ọ nwani whu no, ukoko na soso o tẹ ruọ etoke udhedhẹ. Fikieme? Keme o jẹ “nya evaọ ozodhẹ Jihova je bi wo omosasọ nọ ẹzi ọfuafo na ọ rẹ kẹ.” (Iruẹru Ikọ 9:31) Ẹzi ọfuafo Ọghẹnẹ o wo ẹgba gaga. Ọghẹnẹ ọ rẹ sae rọ ẹzi ọfuafo na sasa ohwo oma evaọ oghẹrẹ uyero kpobi.

• Olẹ. Ebaibol na ọ hrẹ omai nọ, “Wha ruawa kpahe oware ovo ho.” Ukpoye, “ta ayare rai via kẹ Ọghẹnẹ; udhedhẹ Ọghẹnẹ nọ u vi otoriẹ kpobi o vẹ te kpọ udu rai gbe ẹgba iroro rai.”​—Ahwo Filipai 4:​6, 7.

• Ibe Ileleikristi Mai a rẹ sae sasa omai oma nọ ma tẹ rẹriẹ ovao dhe ebẹbẹ. Pọl ukọ na o dhesẹ ibe Ileleikristi riẹ inọ a jọ “omosasọ ulogbo” rọ kẹe evaọ etoke “ebẹbẹ gbe ukpokpoma.”​—Ahwo Kọlọsi 4:11; 1 Ahwo Tẹsalonika 3:7.

Rekọ ohwo ọ rẹ sai roro nọ, ẹvẹ Ọghẹnẹ ọ sae rọ rehọ eware nọ ma fodẹ na sasa ohwo oma? Joma ta kpahe iriruo ahwo jọ nọ a rẹriẹ ovao dhe ebẹbẹ nọ ma fodẹ evaọ uzoẹme nọ o vrẹ na. Wọhọ ahwo yena, whọ te ruẹ nọ Ọghẹnẹ o gbe bi ru eyaa riẹ nana gba: “Wọhọ epanọ oni ọ rẹ sasa ọmọ riẹ oma, ere mẹ rẹte sasa owhẹ oma.”​—Aizaya 66:13.

NỌ A TE SI OHWO NO IRUO

Ọzae jọ nọ a re se Setha ọ ta nọ, “Oke ovona a ro si omẹ avọ aye mẹ no iruo. Evaọ ikpe ivẹ soso, imoni mai a gbẹ kẹ omai hi, ma rẹ re he, yọ ma je ru imiruo ototọ jọ re. Fiki onana Priscilla aye mẹ ọ tẹ vọ avọ ọkora, yọ me je rri omamẹ nọ me fioka ha.

“Kọ ẹvẹ ma sai ro thihakọ? Ẹsikpobi Priscilla ọ jẹ hae kareghẹhọ omariẹ eme Jesu nọ e rrọ obe Matiu 6:34 na. Jesu ọ jọ etẹe ta nọ ma ruawa kpahe odẹ hẹ, keme ẹdẹ kpobi o wo ẹkẹ ebẹbẹ riẹ. Yọ olẹ u fiobọhọ kẹe gaga re. Rọkẹ omẹ, Olezi 55:22 ọ sasa omẹ oma gaga. Wọhọ ọso-ilezi na, me gbolo owha mẹ kpobi kẹ Jihova, yọ mẹ ruẹ nọ o gine fiobọhọ kẹ omẹ. Dede nọ enẹna mẹ ruẹ iruo efa nọ ma bi ru no, ma bi yeri uzuazọ olọlọhọ lele eme Jesu nọ e rrọ obe Matiu 6:​20-22 na. Maero na, onana u si omai kẹle ohwohwo gbe Ọghẹnẹ vi epaọ anwẹdẹ no.”

Ọzae jọ nọ a re se Jonathan ọ ta nọ, “Nọ eki mai o kie, ozọ epanọ mẹ te sae rọ rẹrote uviuwou mẹ u je mu omẹ gaga. Fiki eware nọ e jẹ via evaọ orẹwho na, eki nọ ma jẹ tho anwọ ikpe 20 soso ze na, o te kie. Yọ ugho o jẹ hai fou mẹ avọ aye mẹ họ ẹwhọ gaga. Ma gbẹ jẹ sae rọ ATM dẹ oware he keme ma riẹ nọ a te zẹ kẹ omai hi.

“Rekọ Ẹme Ọghẹnẹ gbe ẹzi ọfuafo riẹ o je fiobọhọ kẹ omai jẹ emamọ iroro. Oghẹrẹ iruo kpobi me je ru, yọ ma jẹ dẹ eware tere he. Fikinọ mai yọ Isẹri Jihova, ibe Ileleikristi mai a je fiobọhọ kẹ omai re. Fiki obufihọ rai, ma gbe je rri oma mai kuẹku hu dede nọ eware e jọ gaga.”

NỌ ORỌO OHWO O TẸ FA

Aye jọ nọ a re se Raquel ọ ta nọ, “Nọ ọzae mẹ ọ dhẹ siọ omẹ ba, o da omẹ gaga, yọ ofu o je mu dhe omẹ. Ọkora ọ tẹ da omẹ oma fia. Rekọ nọ me si kẹle Ọghẹnẹ, me te wo omosasọ. Me re wo udhedhẹ iroro nọ mẹ tẹ lẹ se Ọghẹnẹ kẹdẹ kẹdẹ. O rẹ jọ omẹ oma wọhọ ẹsenọ Ọghẹnẹ o ru edada na kpotọ.

“Me yere Ọghẹnẹ kẹ Ẹme riẹ Ebaibol na re, keme u fiobọhọ kẹ omẹ kpairoro vrẹ ofu nọ ọ jọ omẹ udu. Me te je fi eme Pọl ukọ na nọ e rrọ obe Ahwo Rom 12:21 họ iruo re, nọ o ta nọ: ‘Whọ kuvẹ re eyoma o fi owhẹ kparobọ họ, rekọ hae rehọ ewoma ro fi eyoma kparobọ.’

“Ogbẹnyusu ọkpekpe mẹ jọ ọ tuduhọ omẹ awọ gaga re. O dhesẹ obe Ọtausiuwoma Na 3:6 kẹ omẹ, jẹ ta kẹ omẹ nọ ‘oke jọ o riẹ nọ a rẹ rọ kpairoro vrẹ oware.’ Dede nọ o lọhọ kẹ omẹ re ma ru lele ohrẹ yena ha, u gine fo nọ mẹ rẹ kpairoro vrẹ. Enẹna me wo itee ekpokpọ nọ me bi le evaọ uzuazọ.”

Aye jọ nọ a re se Elizabeth ọ ta nọ: “Nọ orọo ohwo o tẹ fa, ọ rẹ gwọlọ uduotahawọ. Me wo ogbẹnyusu ọkpekpe jọ nọ ọ jẹ hae tuduhọ omẹ awọ kẹdẹ kẹdẹ. O re lele omẹ viẹ, sasa omẹ oma, je si omẹ kẹle oma. Avro ọ riẹ hẹ, Jihova ọ rẹhọ aye na tuduhọ omẹ awọ.”

EVAỌ ETOKE ẸYAO GBE OWHO

Ọzae nọ a re se Luis nọ ma fodẹ evaọ uzoẹme ọsosuọ na, o wo ẹyao udu, yọ anwọ isiava soso o whu fithọ no. Evaọ euwa 16 soso evaọ okpẹdẹ o re fi oxygen họ inwe, koyehọ oware nọ a rẹ rọ wẹ. Ọ ta nọ: “Mẹ rẹ lẹ se Jihova ẹsikpobi. Nọ mẹ tẹ lẹ no, mẹ rẹ ruẹ nọ ẹzi Ọghẹnẹ ọ be kẹ omẹ ẹgba. Olẹ o rẹ kẹ omẹ udu nọ me re ro thihakọ, keme mẹ riẹ nọ Ọghẹnẹ ọ be daezọ mẹ.”

Aye jọ nọ a re se Petra nọ ọ rrọ ikpe 80 gbọ ọ ta nọ: “Eware buobu e riẹ nọ mẹ gwọlọ ru rekọ mẹ be sai ru ai hi. O rẹ kẹ omẹ uye inọ me gbe wo ogaga nọ mẹ be sai ro ru oware ovo ho. O gbẹ rrọ imu hu, mẹ rẹ sae kpama no otọ họ.” Ẹsibuobu me re roro kpahe olẹ nọ Jesu ọ lẹ se Ọsẹ riẹ inọ otẹrọnọ o rẹ lọhọ, o ru re uye na o thọe wa. Rekọ Jihova ọ bọ Jesu ga, yọ ọ bọ omẹ ga re. Olẹ họ oware nọ u bi fiobọhọ kẹ omẹ kẹdẹ kẹdẹ. Nọ mẹ tẹ lẹ sei no, me re wo ogaga nọ me re ro thihakọ.”​—Matiu 26:39.

Ọzae jọ nọ a re se Julian, nọ o bi lele ẹyao nọ a re se multiple sclerosis muabọ enwenọ ikpe 30 soso, o muẹrohọ nọ Ọghẹnẹ ọ be sasa iẹe oma re. Ọ ta nọ: “Agbara ọmo mẹ be keria enẹna ukpọ agbara okpohwo nọ mẹ jẹ hae keria. Rekọ eva e be were omẹ ghele keme me bi fiobọhọ kẹ amọfa. Who te bi fiobọhọ kẹ amọfa, whọ rẹ gbẹ kareghẹhọ uye nọ whọ be ruẹ hẹ, yọ Jihova o bi ru eyaa riẹ gba nọ ọ be rọ sasa omai oma n’oke t’oke. Mẹ rẹ sae ta wọhọ Pọl ukọ na inọ: ‘Evaọ eware kpobi, me bi wo ẹgba ẹkwoma ọnọ ọ be kẹ omẹ ogaga.’”​—Ahwo Filipai 4:13.

OKENỌ OHWO NỌ MA YOU O TE WHU

Ọzae jọ nọ a re se Antonio ọ ta nọ: Nọ ọsẹ mẹ o whu evaọ asidẹnte, o kaki mu omẹ ẹro. O ru oware ovo thọ họ, ọ jẹ nya edhere vrẹ ọvo. Rekọ u wo oware ovo nọ mẹ rẹ sai ru hu. Ọ rria ẹsipito edẹ isoi soso ababọ ẹme nọ ọ ta taure o te ti whu. Mẹ jẹ gba omamẹ re mẹ seba ẹviẹ evaọ iraro oni mẹ, rekọ nọ mẹ ọvo ọ tẹ rrọ oria, me ve kuenu oviẹ. Mẹ jẹ nọ omamẹ nọ: ‘Fikieme oware utiona o rọ via?’

“Evaọ oke yena mẹ jẹ hae lẹ se Jihova nọ o fiobọhọ kẹ omẹ kru udu ga, jẹ kẹ omẹ udhedhẹ iroro. Ẹmẹrera iroro mẹ i ve mu otọ họ ẹnya. Mẹ kareghẹhọ nọ Ebaibol na ọ ta nọ eware idudhe e rẹ sae via kẹ ohwo kpobi. Nọ orọnọ Ọghẹnẹ ọ rẹ ta ọrue he na, u mu omẹ ẹro nọ mẹ te wariẹ ruẹ Ọsẹ mẹ nọ a tẹ kpare iẹe ze.”​—Ọtausiuwoma Na 9:11; Jọn 11:25; Taitọs 1:2.

Ere ọvona o jọ kẹ Robert nọ ma fodẹ evaọ uzoẹme ọsosuọ na re. Ọ ta nọ: “Mẹ avọ aye mẹ Maribel, ma wo udhedhẹ iroro nọ Ebaibol ọ fodẹ evaọ obe Ahwo Filipai 4:​6, 7 na ẹkwoma elẹ mai se Jihova. Udhedhẹ iroro nana u fiobọhọ kẹ omai ta kpahe ẹruore ẹkparomatha na kẹ ahwo nọ a rẹ niyẹrẹ evaọ TV. Dede nọ ọmọ mai o whu evaọ asidẹnte arupre na, ma gbẹ be kareghẹhọ eware buobu nọ ma je ru kugbe. Eware nana e rẹ bọ omai ga.

“Nọ ibe Ileleikristi mai a vuẹ omai nọ a ruẹ omai evaọ TV nọ ma jẹ ta kpahe ẹruore nọ ma wo avọ udu udhedhẹ, ma vuẹ rai nọ elẹ nọ a jẹ lẹ roro mai họ oware nọ u fiobọhọ kẹ omai kru udu ga. U gine mu omẹ ẹro nọ Jihova ọ jẹ rehọ eme omosasọ ibe Ileleikristi mai sasa omai oma.”

Wọhọ epanọ iriruo ahwo nọ ma ta ẹme te na i dhesẹ na, Ọghẹnẹ ọ rẹ sae sasa ahwo kpobi oma makọ oghẹrẹ ebẹbẹ nọ a be rẹriẹ ovao dhe kẹhẹ. Kọ ẹvẹ kpahe owhẹ? Makọ oghẹrẹ ẹbẹbẹ kpobi nọ whọ be rẹriẹ ovao dhe evaọ uzuazọ kẹhẹ, riẹ nọ Ọghẹnẹ ọ rẹ sae sasa owhẹ oma.b Kọ whọ gbẹ lẹ se Jihova re o fiobọhọ kẹ owhẹ? Ọye họ “Ọghẹnẹ nọ ọ rẹ kẹ omosasọ evaọ oghẹrẹ uyero kpobi.”​—2 Ahwo Kọrint 1:3.