Ahwo buobu a re roro nọ ohwo ọvo ọ riẹ oware ovo kpahe obọ odhiwu hu. A rẹ ta nọ ohwo ọvọ o ri no obei ze nọ ọ rẹ sae vuẹ omai kpahe epanọ obei ọ rrọ họ. Iroro itieye na e thọ, keme Jesu Kristi ọ rria obọ odhiwu no taure ọ tẹ te ziọ obọ otọakpọ obonẹ. Ọ ta kẹ isu egagọ ahwo Ju evaọ ikpe-udhusoi ọsosuọ nọ: “Me no obọ odhiwu ze ti ru oreva obọmẹ hẹ, rekọ oreva ọnọ o vi omẹ ze.” Nọ Jesu o je dhesẹ obonọ o no ze kẹ ikọ riẹ, ọ ta nọ: “Evaọ uwou Ọsẹ mẹ, eria buobu e riẹ nọ a rẹ rria.”—Jọn 6:38; 14:2.

Ọghẹnẹ họ Ọsẹ Jesu, odẹ riẹ Jihova, yọ “uwou” Jihova o rrọ obọ odhiwu. (Olezi 83:18, NW) Fikiere, ohwo ọvo nọ ọ rẹ sae ta kpahe eware nọ e rrọ obọ odhiwu vi Jihova avọ Jesu ọ rrọ họ. Jihova avọ Jesu a rehọ ẹkwoma eruẹaruẹ sa-sa dhesẹ eware nọ e rrọ obọ odhiwu kẹ idibo riẹ evaọ oke anwae.

Uzoẹme nọ o rrọ obaro na o ta kpahe eria Ebaibol sa-sa nọ i dhesẹ eware nọ eruẹaro Ọghẹnẹ a jọ eruẹaruẹ ruẹ kpahe obọ odhiwu. Nọ who ti se kpahe eruẹaruẹ nana, kareghẹhọ nọ eware nọ ma rẹ sae ruẹ hayo dhobọte he, eye e rrọ obọ odhiwu. Rekọ, ukpenọ Ọghẹnẹ ọ rẹ rehọ eware nọ ikọ-odhiwu ọvo a re wo otoriẹ rai ro dhesẹ epanọ obọ odhiwu ọ rrọ kẹ omai, ọ rehọ eware nọ ma rẹ sai wo otoriẹ rai lọlọhọ ro dhesẹ eruẹaruẹ na vevẹ kẹ omai. Eruẹaruẹ yena i ti fiobọhọ kẹ omai riẹ kpahe “eria buobu . . . nọ a rẹ rria” evaọ obọ odhiwu gbe emama ẹzi nọ e rrọ obei.

JIHOVA HỌ ERUMERU NA

“Mẹ tẹ ruẹ agbara-uvie evaọ obọ odhiwu, yọ ohwo jọ ọ keria agbara-uvie na. Ọnọ ọ keria agbara-uvie na o bi lo wọhọ utho jaspa gbe utho sadiọs, yọ usi-ame nọ o wọhọ utho ẹmerald o wariẹ agbara-uvie na họ.”—Eviavia 4:2, 3.

“Elo nọ ọ ware riẹe na ọ jọ wọhọ usi nọ o rẹ jọ ehru evaọ ẹdẹ oso. O jọ wọhọ elo oruaro ỌNOWO na.”—Izikiẹl 1:27, 28.

Eware nana nọ Jọn avọ Izikiẹl a jọ eruẹaruẹ ruẹ na, i dhesẹ oruaro Jihova nọ ọ rrọ Ọghẹnẹ Erumeru na via, yọ a rehọ eware nọ ma re wo otoriẹ rai ro dhesẹ ai vevẹ wọhọ, itho nọ i bi lo nwranwranwra, usi-oso, gbe agbara-uvie ologbo. Eware nana i dhesẹ nọ oria nọ Jihova ọ rrọ o vọ avọ erru, oruaro, gbe udhedhẹ.

Oghẹrẹ nọ a dhesẹ Ọghẹnẹ evaọ eruẹaruẹ na o nwane rọwokugbe eme ọso-ilezi na, ọnọ o kere nọ: “ỌNOWO ọ rẹ ruaro, a rẹ rehọ ujiro ulogbo kẹ e; jọ a dhẹozọ riẹ vi edhọ kpobi. Keme edhọ ahwo na kpobi yọ ema nọ a kare; rekọ ỌNOWO ọye ọ ma ihru na. Adhẹ gbe oruaro e rọ aro riẹ; ogaga gbe ewoma e rọ aruẹri riẹ.”—Olezi 96:4-6.

Dede nọ Jihova họ Ọghẹnẹ Erumeru na, o zizie omai nọ ma lẹ sei, yọ ọ kẹ omai imuẹro nọ o ti yo elẹ mai. (Olezi 65:2) Fikinọ Ọghẹnẹ o you mai gaga jẹ be daezọ mai, o soriẹ ze nọ Jọn ukọ na ọ rọ ta gbiae nọ: “Ọghẹnẹ họ uyoyou.”—1 Jọn 4:8.

JESU Ọ RRỌ KUGBE ỌGHẸNẸ

“[Stivin olele na], avọ ẹzi ọfuafo nọ ọ vọ riẹ oma, o te rri kpobọ odhiwu, ọ tẹ ruẹ oruaro Ọghẹnẹ gbe Jesu nọ o dikihẹ obọze Ọghẹnẹ, ọ tẹ ta nọ: ‘Rri! Mẹ ruẹ idhiwu na nọ i rovie gbe Ọmọ ohwo nọ o dikihẹ obọze Ọghẹnẹ.’”—Iruẹru Ikọ 7:55, 56.

Taure Stivin ọ tẹ te jọ eruẹaruẹ ruẹ onana, isu-egagọ ahwo Ju a kpe Jesu no, yọ ae Stivin ọ jẹ ta ẹme kẹ na. Eruẹaruẹ Stivin na i dhesẹ nọ Jesu ọ rrọ uzuazọ, ọnọ Ọghẹnẹ ọ kpare kpohọ obọ odhiwu, jẹ kẹ oruaro. Rọ kpahe Jesu, Pọl ukọ na o kere nọ: “[Jihova] ọ kpare [Jesu] no uwhu ze jẹ rehọ iẹe keria obọze riẹ evaọ obọ odhiwu, kpehru vi egọmeti gbe udu-esuo gbe ogaga gbe isuẹsu gbe odẹ kpobi, orọnikọ evaọ uyero-akpọ nana ọvo ho rekọ te onọ o be tha na.”—Ahwo Ẹfisọs 1:20, 21.

U te no ọkwa Jesu nọ Ikereakere na e ta kpahe no, Ikereakere na i dhesẹ re nọ Jesu ọ be daezọ ahwo-akpọ wọhọ Jihova. Evaọ okenọ Jesu ọ jọ otọakpọ, o siwi enọ e jẹ mọ gbe enọ e ko, yọ ọ kpare enọ i whu no zihe ziọ uzuazọ. Jesu ọ rọ uwhu riẹ dhesẹ nọ o you Ọghẹnẹ gbe ahwo-akpọ gaga. (Ahwo Ẹfisọs 2:4, 5) Kẹle na, Jesu nọ ọ rrọ obọze Ọghẹnẹ na, ọ te rọ ogaga nọ Ọghẹnẹ ọ kẹ riẹ wha eghale se ahwo-akpọ nọ a yoẹme kẹ Ọghẹnẹ.

IKỌ-ODHIWU A BE GBODIBO KẸ ỌGHẸNẸ

“Epanọ [mẹ Daniẹl ọruẹaro na] me bi ro riwi na, mẹ tẹ ruẹ egbara-uvie nọ a ruẹrẹhọ gbe ọnọ ọ rọ no oke anwae ze [Jihova] ọ keria . . . odu idu e tẹ gọ e; idu ikpe akuakpe i te dikihẹ aro riẹ.”—Daniẹl 7:9, 10.

Evaọ eruẹaruẹ nana, orọnikọ ukọ-odhiwu ọvo Daniẹl ọ ruẹ hẹ rekọ ikọ-odhiwu buobu gbidigbidi. Eruẹaruẹ na i mu urirẹ! Ikọ-odhiwu yọ emama ẹzi nọ i wo ogaga gbe areghẹ. Ikọ-odhiwu a wo ekwa sa-sa wọhọ seraf gbe chẹrub. A jọ Ebaibol na fodẹ ikọ-odhiwu vrẹ asia egba ivẹ gbe udhuvẹ gbe ikpe (250).

Orọnikọ ikọ-odhiwu yọ ahwo nọ a jẹ rria otọakpọ na vẹre he. Ọghẹnẹ ọ ma ikọ-odhiwu no taure ọ tẹ te ma ahwo-akpọ. Okenọ Ọghẹnẹ ọ ma otọakpọ na, ikọ-odhiwu a je do edo oghọghọ.—Job 38:4-7.

Edhere jọ nọ ikọ-odhiwu nọ i wo ẹrọwọ a be rọ gbodibo kẹ Ọghẹnẹ họ, ẹkwoma obọ nọ a bi wo evaọ iruo nọ e mai wuzou nọ a bi ru evaọ otọakpọ na nẹnẹ, koyehọ usiuwoma Uvie na nọ a be ta evaọ akpọ na soso. (Matiu 24:14) Jọn ukọ na ọ jọ eruẹaruẹ ruẹ oghẹrẹ nọ a bi ro wobọ evaọ iruo usi uwoma Uvie na nọ o kere nọ: “Mẹ tẹ ruẹ ukọ-odhiwu ọfa nọ ọ be rra evaọ idadeghe, yọ o bi whowho usi uwoma ebẹdẹ bẹdẹ kẹ enọ e be rria otọakpọ na, kẹ orẹwho, orua, ẹrọunu gbe oghoghẹrẹ ahwo kpobi.” (Eviavia 14:6) Dede nọ ikọ-odhiwu a gbẹ be ta ẹme kẹ ahwo nẹnẹ wọhọ epanọ a jẹ ta ẹme kẹ ahwo evaọ oke nọ u kpemu hu, a bi fiobọhọ kpọ enọ e be ta usiuwoma Uvie na bru ahwo evezi.

SETAN O BI SU IMA AHWO BUOBU THỌ

“Ẹmo o te du lahwe evaọ obọ odhiwu: Maekẹl [Jesu Kristi] avọ ikọ-odhiwu riẹ a tẹ jẹ họre araomuomu idudu na, araomuomu idudu na avọ ikọ-odhiwu riẹ a tẹ jẹ họre ai re, rekọ a kparobọ họ, yọ a gbe wo oria ovo nọ a rẹ jọ evaọ obọ odhiwu hu. Fikiere a te gele araomuomu idudu ologbo na fihọ otọ, araomuomu anwae na, ọnọ a re se Ẹdhọ gbe Setan na, nọ o bi su akpọ na soso thọ; a gele i rie fihọ otọakpọ, yọ a gele ikọ-odhiwu riẹ lele iei.”—Eviavia 12:7-9.

Udhedhẹ o jọ obọ odhiwu vẹre he. Nọ Ọghẹnẹ ọ nwane ma ohwo-akpọ no, ukọ-odhiwu jọ nọ ọ gwọlọ nọ ahwo-akpọ a gọe viukpọ Jihova, ọ tẹ kpareso Jihova je zihe ruọ Setan, onọ otofa riẹ o rrọ “Ohwo Ọwọsuọ.” Ikọ-odhiwu efa i te kuomagbei wọso Ọghẹnẹ je zihe ruọ idhivẹri hayo izi imuomu. Fikinọ Setan avọ idhivẹri riẹ a muomu gaga, a be wọso Jihova jẹ be viẹ ahwo buobu họ ghẹmeeyo kẹ izi Jihova.

Setan avọ idhivẹri riẹ a rrọ yoyoma jẹ rrọ eva gaga. Ewegrẹ ahwo-akpọ a rrọ yọ ae a be mae wha uye-oruẹ nọ o rrọ akpọ na ze. Wọhọ oriruo, Setan o kpe uthuru erao Job kpobi gbe idibo riẹ. Kẹsena o te kpe emọ ikpe riẹ ẹkwoma “ofou ologbo” nọ ọ rọ tehe uwou nọ a kokohọ. Uwhremu na, Setan “o te fi ela ipepehe fihọ Job oma nọ obọ evawọ ri te obọ oko-uzou riẹ.”—Job 1:7-19; 2:7.

Kẹle na, a te raha Setan no. Anwọ oke nọ a ro le Setan ziọ obọ otọakpọ obonẹ na, ọ riẹ nọ “omoke kakao o wo.” (Eviavia 12:12) A bruoziẹ uwhu kpe Setan no, yọ onana emamọ usi!

AHWO NỌ A TI NO OTỌAKPỌ NA KPOHỌ ODHIWU

“[Whẹ Jesus] whọ tẹ rehọ azẹ ra dẹ ahwo kẹ Ọghẹnẹ no orua kpobi, ẹrọunu kpobi, oghoghẹrẹ ahwo gbe orẹwho kpobi ze, who te ru ae re a jọ ivie gbe izerẹ kẹ Ọghẹnẹ mai, yọ a te jọ ivie nọ i ti su otọakpọ na.”—Eviavia 5:9, 10.

Wọhọ epanọ Ọghẹnẹ ọ kpare Jesu no otọakpọ na kpohọ odhiwu na, ere ọ te kpare ahwo jọ kpohọ odhiwu re. Jesu ọ ta kẹ ikọ riẹ nọ e talamu ei te urere nọ: “Mẹ be nyae ruẹrẹ oria họ kẹ owhai. Ofariẹ, . . . mẹ te wariẹ nyaze mẹ vẹ rehọ owhai kugbe oma, re oria nọ mẹ rrọ wha vẹ jọ etẹe re.”—Jọn 14:2, 3.

U wo oware nọ ahwo nọ a bi kpohọ odhiwu a be nyai ru. A ti kuomagbe Jesu su evaọ Uvie Ọghẹnẹ, onọ o te wha eghale se akpọ na soso. Uvie nana Jesu ọ ta kẹ ilele riẹ nọ a lẹ kẹ evaọ olẹ oriruo na inọ: “Ọsẹ mai nọ ọ rrọ obọ odhiwu, jọ odẹ ra o jọ fuafo. Jọ Uvie ra o ze. Jọ a jọ otọakpọ na ru oreva ra wọhọ epanọ o rrọ obọ odhiwu.”—Matiu 6:9, 10.

OWARE NỌ AHWO NỌ A TI KPOHỌ ODHIWU A BE NYAI RU

“Kẹsena [mẹ Jọn ukọ na] me te yo urru oruarua jọ nọ u do no agbara-uvie na ze nọ o ta nọ: ‘Rri! Uwou Ọghẹnẹ o te jọ udevie ahwo-akpọ, . . . yọ o ti ririe irui-oviẹ kpobi no aro rai, uwhu o gbẹ te jọ ofa ha, yọ uweri hayo oviẹ hayo edada e gbẹ te jọ ofa ha. Eware ọsosuọ na e vrẹ no.’”—Eviavia 21:3, 4.

Eruẹaruẹ nana e be ta kpahe okenọ Jesu avọ ahwo nọ a te kpare kpohọ obọ odhiwu a ti ro su evaọ Uvie Ọghẹnẹ, a vẹ te raha esuo Setan no je ru akpọ na kpobi fihọ aparadase. Eware nọ e be wha edada gbe uweri se ahwo-akpọ e gbẹ te jọ họ. Makọ uwhu dede o gbẹ te jọ ofa ha.

Kọ ẹvẹ kpahe ima ahwo buobu nọ a whu no nọ a te kpare kpohọ odhiwu hu? Evaọ obaro a te kpare ae ze uzuazọ, a vẹ te rria aparadase otọakpọ.—Luk 23:43.