Ono Họ Maekẹl Ukọ-Odhiwu Oride Na?

A FODẸ omama ẹzi nọ a re se Maekẹl na unuẹse buobu evaọ Ebaibol na ha. Dede na, oria nọ a jọ ta ẹme kpahe iẹe yọ obọ riẹ o rọ iruo ilogbo jọ. Evaọ obe Daniẹl, a ta nọ Maekẹl ọ họre ijẹle imuomu; evaọ ileta Jud, ọ jọ avro kugbe Setan; yọ evaọ Eviavia, o fi Ẹdhọ avọ idhivẹri riẹ ẹmo. Ẹkwoma ẹthọ esuo Jihova gbe ẹhọre ewegrẹ Ọghẹnẹ, Maekẹl ọ be rria te otofa odẹ riẹ—“Ono Wọhọ Ọghẹnẹ?” Kọ ono họ Maekẹl?

Eva ẹsejọ ahwo a re wo edẹ vrẹ ọvo. Wọhọ oriruo, a riẹ Jekọp ọsẹ-orua na wọhọ Izrẹl, a tẹ jẹ riẹ Pita ukọ na wọhọ Saimọn. (Emuhọ 49:1, 2; Matiu 10:2) Epọvo na re, Ebaibol o dhesẹ nọ Maekẹl yọ odẹ ofa orọ Jesu Kristi taure ọ tẹ te ziọ otọakpọ gbe nọ o zihe kpohọ odhiwu no. Joma kiẹ ikereakere jọ riwi nọ o lẹliẹ omai ta ere.

Ukọ-Odhiwu Oride. Ẹme Ọghẹnẹ o se Maekẹl “ukọ-odhiwu oride na.” (Jud 9) Muẹrohọ nọ a se Maekẹl ukọ-odhiwu oride na. Onana u dhesẹ nọ oghẹrẹ ẹnjẹle otiọye na ọvo ọ riẹ. Evaọ uzẹme, oria nọ ẹme na “ukọ-odhiwu oride” o jọ roma via evaọ Ebaibol na u dhesẹ omọvo orọnikọ ahwo buobu hu. Ofariẹ, a ta kpahe Jesu inọ ọ rrọ ọkwa ukọ-odhiwu oride. Obe 1 Ahwo Tẹsalonika 4:16 o ta kpahe Jesu Kristi nọ ọ kparoma ze no na inọ: “Ọnowo omariẹ ọvo o re ti mu no obọ odhiwu tha, avọ edo gbe uru ukọ-odhiwu oride.” Fikiere a dhesẹ urru Jesu wọhọ orọ ukọ-odhiwu oride. Ikereakere nana i dhesẹ inọ Jesu họ Maekẹl, ukọ-odhiwu oride na.

Osu Ogbaẹmo. Ebaibol na e ta nọ ‘Maekẹl avọ ikọ-odhiwu riẹ a tẹ be họre odudu na . . . avọ ikọ riẹ.’ (Eviavia 12:7) Onana u dhesẹ nọ Maekẹl yọ osu ogbaẹmo ijẹle nọ e be roma kpotọ kẹ Ọghẹnẹ. Eviavia i dhesẹ Jesu re wọhọ Osu ogbaẹmo ijẹle omurokpotọ. (Eviavia 19:14-16) Pita ukọ na ọ ta nnọ a fi ikọ-odhiwu họ otọ Jesu Kristi. (1 Pita 3:22; Matiu 16:27; 24:31) Fikiere, Ebaibol na e ta ẹme kpahe Maekẹl avọ “ikọ-odhiwu riẹ” gbe Jesu avọ ‘ikọ-odhiwu riẹ.’ (Matiu 13:41) Nọ Ẹme Ọghẹnẹ ọ jọ uvumọ oria ta nọ ma wo eko ivẹ erọ ijẹle omurokpotọ evaọ obọ odhiwu hu na—ejọ erọ Maekẹl, efa kọ erọ Jesu—o rrọ oware iroro re ma ta inọ ginọ Jesu Kristi evaọ ọkwa obọ odhiwu riẹ họ Maekẹl na.a