Egọmo Amara nọ A re Se Barnacle

U kri no nọ ahwo nọ a wuhrẹ kpahe erao a ro muẹrohọ onaa nọ amara nọ a re se barnacle ọ rẹ rọ tamu itho, egbada nọ a vi fihọ ame, gbe obotọ ekọ-oyibo. Egọmo amara nana ọ ga vi egọmo efa kpobi nọ ahwo a ru no kpekufiẹ. U kri no nọ ahwo a be rọ gwọlọ riẹ oghẹrẹ nọ amara nana ọ rẹ sae rọ tamu oria nọ o rrọ vuavo, rekọ kẹle na a tẹ te riẹ.

Roro kpahe onana: Ahwo nọ a rẹ kiẹ otọ eware a ruẹ no nọ barnacle nọ a sa obọ ọ rẹ jọ ame ya, be kiẹ eria sa-sa riwi bẹsenọ ọ rẹ salọ oria nọ u kiehọ iẹe oma nọ ọ rẹ tamu. Ọ tẹ ruẹ oria na no, o ve ru oghẹrẹ ame ivẹ jọ no oma riẹ ze. Ame ọsosuọ na ọ dina wọhọ ewhri, yọ u re si ame no oria nọ ọ gwọlọ tamu na. Ame nana ọ rẹ jẹ ruẹrẹ oria na họ re ame avọ ivẹ nọ o ti no oma riẹ ze na ọ sae daji oria na.

Ame ivẹ na i re kuomagbe, i ve zihe ruọ egọmo nọ ọ rẹ tamu oria kpathe, nọ emera-ọraha nọ a re se bacteria dede e rẹ sae raha ha. O gwọlọ nọ egọmo nana ọ rẹ tamu ziezi keme oria nọ amara nana ọ tamu na ọ te jọ evaọ edẹ uzuazọ riẹ kpobi.

Oghẹrẹ nọ barnacle na o re ro ru egọmo riẹ u wo onaa gaga, tube vi epanọ egba-eriariẹ a je roro evaọ oke ọsosuọ. Omọvo utu nọ o kiẹ onaa amara nana via ọ ta nọ: “Oware nana nọ amara barnacle o re ru na yọ obọdẹ edhere nọ a sae rọ rehọ oware tamu oria nọ ame ọ make rrọ dede.” Oware nana nọ a kiẹ via na o sai fiobọhọ kẹ egba-eriariẹ ru obọdẹ egọmo nọ a sae rọ rehọ eware tamu eria evaọ obotọ ame, rọ whẹ ekwakwa ẹlẹtriki kugbe, je ro ruiruo evaọ abọ usiwo imu.

Ẹvẹ Who Roro? Kọ egọmo amara nọ a re se barnacle na u mu romavia? Manikọ ẹma a ma riẹ?