Edhesẹ Ovuhumuo kẹ Oware nọ Ma Wo
1 Wo ohẹriẹ no akpọ na, Aizaya ọ ruẹaro kpahe emuore abọ-ẹzi obuobu nọ ọ te jariẹ kẹ ahwo Ọghẹnẹ evaọ oke urere onana. Ọghẹnẹ ọ ta nọ: “Keme ri, idibo mẹ e rẹte re evavọ, rekọ ohọo u reti kpe owhai; ri, idibo mẹ e rẹte da bẹ, rekọ uruame u reti kpe owhai. “Jihova ọ rehọ emu abọ-ẹzi obuobu ghale ahwo riẹ no. Edhere vẹ Jihova ọ rọ ko omai no evaọ abọ-ẹzi?
2 Rọ kpahe oke mai na, Jesu ọ y’eyaa nọ ‘ọrigbo nọ o wo ẹrọwọ avọ areghẹ’ ọ te hae rehọ emu abọ-ẹzi evaọ ẹruoke kẹ enọ i se ẹgwọlọ abọ-ẹzi rai gboja. (Mat. 5:3; 24:45-47) Utu ọrigbo na o ru onana no ababọ eriosehọ.
3 Ugogo edhere jọ nọ a be rọ ko omai evaọ abọ-ẹzi họ emagazini Uwou-Eroro na. Ma te je wo emagazini Awake! na gbe ibroshọ, emebe, gbe ebe ikokoli sa-sa rọkẹ ọbọga mai. Kọ who bi dhesẹ ovuhumuo kẹ ekwakwa abọ-ẹzi enana? Ma re ru ere.—Hib. 12:16.
4 Ma muẹrohọ no nnọ ebe nọ i wo uke olọlọhọ e rọ hẹhẹhẹ vi ebe nọ i wo uke ogaga yọ e rẹ kake kpare no. Edhere jọ nọ ma re ro dhesẹ ovuhumuo mai kẹ oware nọ ma wo họ ma rẹ rẹrote ebe enana ziezi. Nọ ma riẹ vuhumu nọ igho nọ a ro mudhe a raha ro ru ebe enana o rẹ wọ omai omomọvo re ma muẹrohọ ẹme ọnana ziezi. Eyewọ e rẹ daoma wuhrẹ emọ rai re a rẹrote ebe kpobi ziezi, fi emamọ oriruo h’otọ evaọ abọ nana. Otẹrọnọ ma romatotọ rẹrote ebe mai ziezi, o te gwọlọ re ma rehọ efa ro nwene ai ẹsikpobi hi. Onana u re fiobọhọ sẹro igho Society re a sae rehọ igho nọ a ro mudhe na ro ru eware efa.—Jọn 6:12.
5 Uzẹme, mai yọ ahwo nọ a ghale. J’omai kpobi ma hai dhesẹ ovuhumuo kẹ oware nọ ma wo ẹkwoma ekwakwa abọ-ẹzi nọ Jihova ọ be kẹ na nọ ma re rri ghaghae.—Kọl. 3:15, 17.