Yọrọ Ẹme Ọghẹnẹ Gbagba

¹ Okenọ o je se isẹri kẹ oletu jọ, “Filip o te rovie unu riẹ, ọ jẹ jọ evaọ ikerakere [jọ] mu ei usiuwoma Jesu họ ẹta kẹ.” (Iruẹru 8:35) Filip ọ jẹ “yọrọ ẹme uzẹme na [gbagba].” (2 Tim. 2:15) Dede na, esẹro ọnyawariẹ a muẹrohọ no inọ nẹnẹ na ọthobọ gheghe iwhowho-uvie buobu e rẹ rọ rehọ Ebaibol na ruiruo evaọ okenọ a tẹ be ta usiuwoma. Kọ whọ be rehọ Ebaibol na ruiruo evaọ odibọgba ra?

² Ẹme Ọghẹnẹ họ ehri oware kpobi nọ ma rọwo je bi wuhrẹ. (2 Tim. 3:16, 17) Oye họ oware nọ u re si ahwo bru Jihova ze je wuhrẹ ai kẹ uzuazọ. Oye o jẹ r’oja re ma rehọ Ebaibol na ruiruo evaọ odibọgba mai na viukpenọ ma re gbiku kpahe izoẹme nọ i si omai urru gheghe ọvo. (Hib. 4:12) Fikinọ ahwo buobu a riẹ kpahe Ebaibol na tere he, o gwọlọ re ma se noi ze ro dhesẹ kẹ ae ọkpọvio owoma nọ o kẹ gbe ẹruore nọ o kẹ ahwo-akpọ.

³ Se No Ebaibol na ze Dẹẹ: Otẹrọnọ ahwo ẹkwotọ na a re gu unoma nọ a tẹ ruẹ ahwo nọ a be ta usiuwoma avọ ẹkpa, whọ rẹ sae dawo usiuwoma onya ababọ ẹkpa ebe. Whọ rẹ sai fi ebe nọ a fodẹ nọ a ro ruiruo nọ whọ gwọlọ fihọ ada na họ ẹmẹkpa ọsese who ve kru Ebaibol na họ obọ hayo fi ei họ ẹkpa ewu ra. Nọ whọ jẹ ruẹ ohwo jọ nọ o bi lele owhẹ t’ẹme no, whọ sae rehọ Ebaibol na lahwe evaọ edhere nọ ohwo na o gbe ro roro nọ whọ be gwọlọ wuhrẹ iẹe he. Ruẹrẹ oma ra họ epanọ ọnọ ọ be gaviezọ k’owhẹ na ọ sai ro lele owhẹ rri Ebaibol ra. Ẹsejọhọ whọ sae ta kẹe re o se owọ Ebaibol jọ do via. Ovuẹ na o rẹ nya te ei udu viere nọ ọ tẹ ruẹ ẹme evaọ Ebaibol na viukpenọ o re yoi no unu ra ze gheghe. Uzẹme, re who fiobọhọ kẹe w’otoriẹ oria ikere na, fiẹgbahọ eme nọ e rẹ rọ ẹme na lahwe.

⁴ Ẹmeọta nọ A rẹ jọ Se Ikere Ọvuọvo: Nọ who te dhesẹ oma ra no, whọ sae ta nọ: “Ahwo a re fievahọ eria sa-sa rọkẹ ọkpọvio evaọ izuazọ rai. Eme who roro nọ o rrọ ehri ọkpọvio nọ ọ mai woma? [Kuvẹ kẹ uyo.] Eme who roro kpahe ẹme nana? [Se Itẹ 2:6, 7, re whọ kuvẹ kẹ uyo.] Areghẹ ohwo-akpọ ọ kare iroro gaga, bi su ahwo buobu kpohọ ababọ ẹruore. Rekọ areghẹ Ọghẹnẹ ọ rrọ oware nọ a re fievahọ yọ o rẹ jẹ kẹ erere.” Who ve dhesẹ obe nọ who bi fihọ ada na kẹe, jẹ riobọhọ oriruo ọvojọ ọrọ uvi areghẹ Ọghẹnẹ.

⁵ Jesu ọ rehọ Ikereakere na ro fiobọhọ kẹ ahwo udu oruọzewọ. (Luk 24:32) Pọl o dhesẹ eware nọ o wuhrẹ no Ikereakere na ze. (Iruẹru 17:2, 3) Udufihọ gbe oghọghọ mai evaọ odibọgba na e te rro viere nọ ma bi wo ona viere evaọ ẹyọrọ Eme Ọghẹnẹ gbagba na.

Isukulu Odibọgba Esuo-Ọghẹnẹ ọrọ 2002

¹ Ahwo buobu a re rri ẹgba ẹmeọta vo. Dede na, ẹmeọta yọ okẹ nọ u no obọ Jihova ze. O rẹ k’omai uvẹ nọ ma re ro lele amọfa t’ẹme jẹ ta iroro mai via. Maero, ma rẹ sae rehọ iẹ jiri Ọghẹnẹ mai.—Ol. 22:22; 1 Kọr. 1:4-7.

² A bi wuhrẹ ezae, eyae, gbe emaha evaọ Isukulu Odibọgba Esuo-Ọghẹnẹ na re a whowho odẹ Jihova. (Ol. 148:12 13) Ọruẹrẹfihotọ isukulu ọ 2002 na o ta kpahe izoẹme Ebaibol buobu nọ ma rẹ sai wo erere no ze je ro ruiruo evaọ odibọgba na. Ẹkwoma oma-oruẹrẹhọ kẹ isukulu na gbe obọ nọ ma rẹ jariẹ wo, ma rẹ sai ru eriariẹ gbe ona mai rro haro wọhọ otu ọ iwuhrẹ Ẹme Ọghẹnẹ.—Ol. 45:1.

³ Se Ebaibol na Kẹdẹ Kẹdẹ: Otẹrọnọ Ebaibol ọ kẹle omai oma ẹsikpobi, ma rẹ sae rehọ uvẹ nọ ma wo kpobi ro sei. Uvẹ ọ iminiti jọ kakao ọvo ibuobu mai i wo nọ a rẹ sai ro ruiruo evaọ edhere nana. Ẹvẹ o rẹ kẹ erere te re a se i, o tẹ kao, ẹwẹ-obe ọvuọvo kẹdẹ kẹdẹ, onọ u re ru nọ a sae rọ nya te omaa isase Ebaibol nọ a ruẹrẹhọ omaa isukulu na!—Ol. 1:1-3.

⁴ Ẹgba nọ a re ro se Ebaibol ziezi o rẹ sai fiobọhọ k’omai nyate idu enọ e be gaviezọ k’omai jẹ kẹ ae ọwhọ re a jiri Jihova. Jọ inievo nọ i re ru Ẹme avọ 2 evaọ isukulu na a wuhrẹ, wuhrẹ, wuhrẹ ese dovia ẹme na. Ọsẹro isukulu na o re jiri ai jẹ j’iroro kẹ ae kpahe epanọ a sai ro ru isase na woma viere.

⁵ Rehọ Obe ọ Ọzae nọ Ọ Mae Rro gbe Evawere Uviuwou na ro Ruiruo: A rehọ Ẹme Avọ 3 ro no obe ọ Ọzae nọ Ọ Mae Rro na ze, a tẹ rehọ Ẹme Avọ 4 ro no obe ọ Evawere Uviuwou ze. Ẹsejọhọ ibuobu mai jọ e rẹ sai roro kpahe eroruiruo uvi okwakwa obufihọ nana viere evaọ iruo odibọgba na. Inievo-emetẹ na e rẹ salọ oghẹrẹ ẹkeria ẹmeọta nọ o fo ẹkwotọ na ziezi. Ọsẹro isukulu na o re muẹrohọ epanọ a bi wuhrẹ jẹ rehọ Ikereakere na ruiruo.

⁶ Jọ Isukulu Odibọgba Esuo-Ọghẹnẹ na i fiobọhọ k’omai kpobi re ma gbẹ rehọ okẹ ẹmeọta nọ Ọghẹnẹ ọ k’omai na ruiruo ro whowho emamọ usi na je jiri Ọghẹnẹ ologbo mai, Jihova!—Ol. 34:1; Ẹf. 6:19.