⁴ Kọ ma sae dao oma viere evaọ ewhowho emamọ usi na rọkẹ ahwo ẹkwotọ mai nọ a no orẹwho ofa ze? (Kọl. 1:25) Ikoko jọ i bi ru ọruẹrẹfihọ iruo usiuwoma ota evaọ oria nọ ahwo orẹwho ofa a be rria evaọ ẹkwotọ rai. Iwhowho-uvie na e rẹ kaki wuhrẹ amabọ jọ ẹvẹrẹ na ziezi nọ a sae rọ ta usiuwoma evaọ edhere ọlọlọhọ, wọhọ: “Do! Mẹ wha emamọ usi jọ s’owhẹ. [A vẹ kẹ ohwo na omobe-ovẹvẹ hayo ibroshọ evaọ ẹvẹrẹ ọyena.] Oke ofa ma ruẹ.” Jihova ọ be ghinẹ ghale emuhọ ọsese otiọye na!

Okpomahọ Ividio Nọ I Re Se Isẹri

¹ “Ọmọzae mai ọ be hai rri ividio na anwẹnọ o ti ro wuhrẹ onya ha ze. O rri rie unuẹse buobu no. Ẹvẹ u woma te re ma wo ekwakwa nọ e rẹ bọ uyoyou Jihova fihọ udu emọ mai!” Ividio vẹ ọyewọ Oleleikristi nana o je dhesẹ na? Onọ uzoẹme riẹ o rrọ Noah—He Walked With God (Noa—O Lele Ọghẹnẹ Nya). Oni jọ nọ ọ rrọ Osẹri hi nọ ọmọzae riẹ o rri ividio ọ Noah na evaọ uwou omọfa jọ, o vi unevaze nọ u bu te ₦10,458 se uwou-ogha na ọ tẹ nọ sọ ma wo ividio emaha na efa. Ividio nọ ukoko Jihova u bi ru i bi du obọ te emaha gbe ekpako gaga.

² Evaọ Uviuwou: Nọ uviuwou Osẹri jọ a rri Jehovah’s Witnesses Stand Firm Against Nazi Assault (Isẹri Jihova A Dikihẹ Ga Evaọ Otọ Ukpokpoma ọ Nazi), oni na o te gbiku nnọ: “Mẹ rehọ okpẹdẹ soso roro kpahe epanọ Jihova o ro fi obọ họ kẹ ahwo gheghe thihakọ ikpeware! Eroro kpahe oyena o kareghẹhọ omẹ epanọ ebẹbẹ mẹ e kao te. Eriwi ividio nana kugbe emọ mai u fi obọ họ kẹ ae ruẹ ẹgwọlọ nọ a rẹ rọ rẹro so Jihova viere no. Ẹkwoma ẹmeọta kpahe iẹe kugbe ai evaọ oke ofa, ma fi obọ họ kẹ emetẹ mai no re a thomavẹre viere re a rẹriẹ aro ku otunyẹ gbe ukpokpoma nọ a rẹ sae nyaku.”

³ Eva Obọ Isukulu: Wọhọ abọjọ iyẹrẹ, Osẹri ọ ikpe ikpegbọ jọ o dhesẹ abọjọ Ividio ọ Stand Firm na kẹ eklase riẹ. Owuhrẹ na ọ ta vẹre no nọ Isẹri na e were riẹ hẹ. Rekọ, nọ o rri ividio na no, ọ tẹ ta nọ: “Onana u nwene eriwo nọ me wo kpahe Isẹri Jihova no riẹriẹriẹ. Mẹ y’eyaa nnọ oke ofa nọ a tẹ nyaze uwou mẹ, mẹ te gaviezọ kẹ ae je lele ai muọ Ebaibol na họ ewuhrẹ!” Eme o nwene eriwo riẹ kpahe omai? Ọ ta nnọ “uvi uyoyou gbe omarokpotọ” mai.

⁴ Evaọ Odibọgba Na: Oniọvo-ọmọtẹ jọ ọ nyaku aye jọ nọ ọ jẹ rehọ obe he, dede na yọ o wo enọ jọ kpahe omai gbe erọwọ mai. Oniọvo na o te zihe avọ ividio na Jehovah’s Witnesses—The Organization Behind the Name je fi ei họ kẹ aye na avọ ọzae riẹ rri. Eva e were aimava na gaga a tẹ rọwo nọ a wuhrẹ Ebaibol kugbe ai. Fiki emamọ isẹri nọ a se kẹ ae na, a te muọ izuazọ rai họ ẹria lele oreva Ọghẹnẹ.

⁵ Kọ whọ be rehọ ividio mai na ruiruo vọvọ te ẹjiroro nọ a ro ru ai?