‘Wha Ruẹrẹ Oma Kpahe’

¹ Evaọ eruaruẹ ilogbo riẹ kpahe ekuhọ eyero eware nana, Jesu ọ vẹvẹ unu kpahe oma nọ ma re du le no họ ilale eware uzuazọ. (Mat. 24:36-39; Luk 21:34, 35) Nọ uye ulogbo na o rẹ sae roma via evaọ oke nọ ma riẹ hẹ na, o r’oja re ma gaviezọ kẹ unuovẹvẹ Jesu na: ‘Wha ruẹrẹ oma kpahe; keme eva auwa nọ wha roro ho Ọmọ ohwo ọ te rọ tha.’ (Mat. 24:44) Eme ọ rẹ sai fi obọ họ kẹ omai evaọ abọ nana?

² Ẹwhaha Awa-Ọruọ gbe Eware Efa nọ E rẹ Rehọ Iroro Ohwo: Oware jọ nọ o rẹ wha ekie abọ-ẹzi ze nọ ma rẹ whaha họ, awa-ọruọ eyero-uzuazọ. (Luk 21:34) Evaọ ekwotọ jọ, uvuhu, iruo nọ e riẹ hẹ, gbe eware nọ i bi dhe ẹghẹghare u ru rie nọ o jẹ rrọ gaga re a sai wo eware nọ e r’oja evaọ uzuazọ. Evaọ ekwotọ efa, re a wo ekwakwa abọ-iwo o rẹ lọlọhọ. Otẹrọnọ iroro epanọ ma re ro wo ekwakwa abọ-iwo e d’omai eva fia, yọ ma rrọ ọza-enwoma nọ ma gbẹ te rọ tẹrovi imuẹro Uvie na ha. (Mat. 6:19-24, 31-33) Iwuhrẹ ileleikristi i re fi obọ họ kẹ omai ruabọhọ ẹrotọvi eware Uvie na. Kọ who ru rie fihọ ute ra re whọ hai kpohọ iwuhrẹ na kpobi?—Hib. 10:24, 25.

³ Akpọ inẹnẹ ọ vọ avọ eware nọ e rẹ rehọ iroro nọ e rẹ sai mi omai oke oghaghae no lọlọhọ. Eroruiruo kọmputa o sae jọ agbefẹ otẹrọnọ ohwo ọ be raha oke vrẹ ẹta ro rovie Itanẹte, se je vi E-mail (evuẹ nọ a rẹ rehọ kọmputa vi), hayo erozaha kọmputa efa. Ma sae raha euwa buobu kufiẹ ro ru iweze, rri etẹlivisiọno, ividio, ezaro, gbe isase ebe akpọ, gbe erozaha efa, o vẹ suẹe ze nọ ma gbe ro wo oke gbe ẹgba te ere rọkẹ ilale eware abọ-ẹzi hi. Dede nọ aruọzaha gbe omasehọ e rẹ sae k’omai omosasọ jọ, uwuhrẹ Ebaibol omobọ ohwo gbe orọ uviuwou o rẹ kẹ erere ebẹdẹ bẹdẹ. (1 Tim. 4:7, 8) Kọ whọ be dẹ oke ro roro kpahe Ẹme Ọghẹnẹ kẹdẹ kẹdẹ?—Ẹf. 5:15-17.

⁴ Ẹvẹ ma rẹ kẹ uyere te inọ ukoko Jihova o ruẹrẹ ewuhrẹ abọ-ẹzi fihọ no re u fi obọ họ k’omai “va eware nana kpobi abọ, enọ i re ti ruẹ na, re [ma] sai dikihẹ aro Ọmọ ohwo”! (Luk 21:36) Joma rehọ eruẹrẹfihotọ nana ruiruo vọvọ je dhesẹ nnọ ma ‘ruẹrẹ oma kpahe’ re ẹrọwọ mai ọ sae jọ “ajiri gbe oro gbe adhẹẹ [evaọ] oke ezihetha Jesu Kristi.”—1 Pita 1:7.

Ujiro O rẹ Sasa Oma

¹ “Kọ me gbe dhesẹ emamọ uruemu nẹnẹ?” ere ọmọtẹ ọboba jọ ọ ta avọ inwe oviẹ nọ o si eva okenọ a rehọ iẹe kiẹzẹ no. Onọ yena u gbe oni riẹ unu gaga. Dede nọ o muẹrohọ epanọ ọmọtẹ ọboba riẹ o ru woma te eva ẹdẹ ọyena, oni na o jiri rie vievie he. Irui-oviẹ ọmọtẹ ọboba yena o rẹ kareghẹhọ omai inọ mai kpobi—te emaha te ekpako—ma gwọlọ ujiro. Kọ ma be sasa oma enọ e wariẹ omai họ ẹkwoma ujiro nọ ma re jiri ai rọkẹ eware ezi nọ a ru?—Itẹ 25:11.

² Ibe Ileleikristi a bi ru eware ezi buobu nọ ma re ro jiri ai. Ekpako, idibo iruiruo, gbe ekobaro a be daoma gaga re a sai ru ewha-iruo rai gba. (1 Tim. 4:10; 5:17) Esẹgbini nọ i wo ozodhẹ Ọghẹnẹ a be daoma gaga re a yọrọ emọ rai evaọ idhere Jihova. (Ẹf. 6:4) Izoge Ileleikristi e be daoma gaga re a ruẹse whaha “ẹzi akpọ na.” (1 Kọr. 2:12; Ẹf. 2:1-3) Amọfa a be rọ ẹrọwọ gọ Jihova ghelọ owho, ebẹbẹ ẹyao, hayo edawọ efa. (2 Kọr. 12:7) Ahwo nana kpobi a fo kẹ ujiro. Kọ ma bi dhesẹ ovuhumuo kẹ omodawọ rai nọ u fo ujiro na?

³ Onọ A re Jiri Ohwo Dẹẹ: O rẹ were omai kpobi re ma yo ujiro no eplatfọmo ze. Dede na, o rẹ mae sasa oma nọ a te jiri omai dẹẹ. Wọhọ oriruo, evaọ uzou avọ 16 orọ ileta riẹ se ahwo Rom, Pọl ọ t’ẹme ro jiri Fibi, Priska gbe Akwila, Trifina gbe Trifosa, Pasis, gbe efa. (Rom 16:1-4, 12) Dai roro epanọ eme riẹ e sasa inievo ẹrọwọ enana oma te! Ujiro utioye na o rẹ kẹ inievo mai imuẹro inọ ma gwọlọ e rai, u ve je si omai kẹle viere. Kọ who jiri ohwo jọ no kẹle?—Ẹf. 4:29.

⁴ No Udu Ze: Re o ghinẹ sasa oma ziezi, o gwọlọ nọ ujiro u re no udu ze. Ahwo a rẹ riẹ sọ ujiro mai u bi ghine no udu ze hayo orọ “emiero.” (Itẹ 28:23) Nọ ma bi wuhrẹ epanọ ma re ro mu ẹro họ ewoma nọ ọ rrọ amọfa oma na, udu mai o te wọ omai jiri ai. Jọ uvi ajiri o hai no omai unu ze kẹ amọfa ẹsikpobi, riẹ nọ ‘ẹvẹ u woma te, ẹme nọ a rẹ ta evaọ ẹruoke!’—Itẹ 15:23.