Epanọ A rẹ rọ Ta Usiuwoma Evaọ Ẹkwotọ Ekiọthuọ

¹ Kọ o rẹ were owhẹ re whọ ta usiuwoma evaọ ẹkwotọ nọ ahwo a rẹ jọ dede erara rehọ gbe oria nọ a je di ahwo họ uwou? Ẹsejọhọ oria jọ o rrọ ẹkwotọ ukoko ra nọ whọ jẹ sae ruẹ onana. Oghẹrẹ vẹ? Ẹkwoma eweze kpohọ iwou ekiọthuọ nọ e rrọ etẹe. Iwhowho-uvie nọ e rẹ ta usiuwoma no uwou-eki ruọ uwou-eki a rẹ reawere emamọ iyẹrẹ ẹsibuobu.

² Ekwotọ ekiọthuọ e rrọ usu ekwotọ nọ a ghale kẹ ikoko jọ. Oniọvo nọ ọ be rọ ẹro te ẹkwotọ na ọ rẹ sae ruẹrẹ obọdẹ ekade omaa-udhesẹ ẹkwotọ fihọ kẹ ofẹ nana nọ eria ekiọthuọ e vọ gaga na. Ekade omaa-udhesẹ ẹkwotọ nọ a be rria kpobi nọ o kẹre te eria ekiọthuọ, a re dhesẹ iẹe vevẹ inọ a re ru eria ekiọthuọ na kugbe ẹkwotọ nọ ahwo a be rria na ha. Evaọ ekwotọ efa, a rẹ sai ru eria ekiọthuọ na kugbe iwou nọ ahwo a be rria. Otẹrọnọ whọ re jọ ẹkwotọ ekiọthuọ ta usiuwoma vẹre he, muhọ ẹkwoma iwou-eki esese jọ nọ whọ rẹ jọ ta usiuwoma.

³ Rehọ Edhere Ọlọlọhọ Nya bru Ahwo: Nọ whọ tẹ be ta usiuwoma no uwou-eki ruọ uwou-eki, o roja re whọ gọ ẹgọ wọhọ epanọ whọ rẹ gọ ẹgọ kpohọ ewuhrẹ evaọ Ọgwa Uvie. U re je woma re whọ salọ oke nọ uwou-eki na u re ro zurie he. O tẹ lọhọ, ro eva uwou-eki na evaọ okenọ ohwo ọvo nọ ọ be dẹ oware ọ rrọ uwou-eki na ha. Nọ onọ ohwo nọ o wuzou uwou-eki na hayo ohwo nọ ọ be rọ ẹro te uwou-eki na re who lele iei ta ẹme. Ta ugogo-ẹme nọ whọ wha nya, je ru ẹme na kpẹkpẹe. Eme whọ rẹ sae ta?

⁴ Whọ tẹ be ta usiuwoma kẹ ohwo nọ ọ be zẹ evaọ uwou-eki hayo ọnọ o wuzou uwou-eki na, whọ sae ta ẹme wọhọ: “Ahwo nọ a rẹ zẹ eki a re wo uvẹ hẹ, yọ o rẹ bẹbẹ re ma di ai họ uwou, fikioye ma je weze bru owhẹ ze evaọ oria iruo ra. Emagazini mai e rẹ ta kpahe eware nọ e be via ẹsikpobi wariẹ akpọ-soso họ.” Kẹsena who ve dhesẹ owọ-ẹme jọ kpẹkpẹe no emagazini na ze.

⁵ Hayo whọ sae dawo edhere ọlọlọhọ nana: “Ahwo buobu a gwọlọ riẹ kpahe Ebaibol na viere rekọ a wo oke tere he. Omobe-ovẹvẹ nana u dhesẹ omaa uwuhrẹ ọvọvẹ nọ a rẹ sae k’owhẹ nọ u ti fi obọ họ kẹ owhẹ ruẹ iyo kẹ enọ ra kpahe Ebaibol na.” Kẹsena who ve dhesẹ kpohọ ẹwẹ-obe avọ 4-5 ọrọ omobe-ovẹvẹ na Kọ Whọ Gwọlọ Riẹ Kpahe Ebaibol na Viere?

⁶ Otẹrọnọ ọnọ o wuzou uwou-eki na o wo uvẹ hẹ, whọ sai fi omobe-ovẹvẹ họ ada kẹe whọ vẹ ta nọ: “Mẹ te wariẹ zihe ze evaọ okenọ who te wo umuvẹ jọ. Mẹ te gwọlọ riẹ oware nọ who roro kpahe omobe-ovẹvẹ nana.”

⁷ Ẹbọga Isiuru nọ A Dhesẹ: Whọ sai tube ru obe-uwuhrẹ Ebaibol evaọ ẹkwotọ ekiọthuọ dede. Ọkobaro obọdẹ jọ ọ jẹ hae rehọ emagazini se ọthueki jọ ẹsikpobi. Nọ ọzae na o dhesẹ ovuhumuo kẹ oware nọ o je se, ọkobaro na o te dhesẹ oghẹrẹ nọ ma re ru obe-uwuhrẹ Ebaibol kẹe, ẹkwoma ibroshọ Gwọlọ na. A tuọ obe-uwuhrẹ na họ ẹsiẹsiẹe evaọ oria iruo ọzae na. Nọ ọkobaro na o wo eyero na fihọ iroro, o te ru oke uwuhrẹ na kpẹre fihọ iminiti 10 rite 15 evaọ oke kpobi nọ a bi ru uwuhrẹ na. Jọ mai oma mai ma ruabọhọ ẹgwọlọ enọ i te ẹkwoma usiuwoma nọ ma rẹ ta evaọ ẹkwotọ ekiọthuọ.

Ẹme nọ Whọ rẹ Ta Kpahe Emagazini Na

Awake! July 22

“Evaọ akpọ inẹnẹ na, ifiwhayo i gbe bi wuhrẹ idhere ekpokpọ nọ a rẹ rọ viẹ ahwo nọ a rri otọ mu hu họ. Kọ onana u kpomahọ owhẹ? [Kuvẹ kẹ uyo.] Ukere Awake! nana o ta kpahe uvi omoyọrọ jọ kakao nọ e rẹ sai fi obọ họ kẹ omai yọrọ oma re a se omai ba ẹviẹhọ.” Se Itẹ 22:3.

Uwou-Eroro Na Aug. 1

“Fiki epanọ ahwo-akpọ a wo okugbe ọvo ho, ahwo jọ a roro nọ edhere ọvo nọ a sai ro wo udhedhẹ akpọ họ ẹkwoma egọmeti akpọ-soso. Kọ who roro nọ oware utioye o lọhọ? [Kuvẹ kẹ uyo. Kẹsena who ve se Daniẹl 2:44.] Emagazini nana o ta oware nọ Uvie Ọghẹnẹ u bi ru enẹna gbe epanọ o te rọ wha udhedhẹ akpọ-soso ze.”

Awake! Aug. 8

“Mai kpobi ma rẹ vọ avọ ọkora nọ ma te yo kpahe olahiẹ nọ u bi te emaha na. Ẹsejọhọ who roro no inọ, ‘Kọ Ọghẹnẹ ọ be ghinẹ daezọ?’ [Kuvẹ kẹ uyo. Kẹsena who ve se Olezi 72:12-14.] Ukere nana o ta oghẹrẹ nọ o rrọ Ọghẹnẹ oma kpahe emaha na gbe epanọ o ti ro si uye-oruẹ no riẹriẹriẹ kẹ ahwo kpobi nọ a be ruẹ uye olahiẹ.”