Ileta nọ I No Obọ Ugboma Esuo Ze
Nọ ma kẹle akpọ ọkpokpọ na gaga no na, o rẹ kpata kpata gaga re ma hẹrẹ Jihova. (Zef. 3:8) Daniẹl ọruaro na ọ ta nọ ‘Ọghẹnẹ . . . o re dhesẹ eware ididi, yọ o dhesẹ . . . eware nọ e be te via ẹdẹfa no.’ (Dan. 2:28) Ẹvẹ o rrọ uvẹ-ọghọ te nọ ma be rọ rria etoke urere nọ a ruaro riẹ na, je bi wo otoriẹ eware ididi nọ Jihova o bi rovie via enẹna!
Ẹkwoma ‘ọrigbo nọ o wo ẹrọwọ avọ areghẹ na’ Jihova rovie ẹjiroro riẹ via no, nọ o bi ro koko ‘ogbotu obuobu’ egegagọ riẹ họ evaọ etoke obẹbẹ “edẹ urere” enana. (Mat. 24:45; Evia. 7:9; 2 Tim. 3:1) Aizaya 2:2, 3, (NW ) u dhesẹ inọ iruo akpọ so-so nana e te rọ oma via “evaọ edẹ urere na.” Ekokohọ nana ọ be nyaharo kukpe kukpe evaọ udevie ẹvohẹ gbe ozighi nọ ọ rrọ akpọ nana.
Eva ukpe 2004, a kareghẹhọ omai oware nọ ma je yoẹme kẹ ujaje Jesu na eva enẹna vi epaọ ọsosuọ: ‘Wha hai rroro . . . Wha ruẹrẹ oma kpahe.’ (Mat. 24:42, 44) Eva uzẹme, eware nọ e be via evaọ akpọ na i wo otofa ulogbo kẹ Ileleikristi nọ i vuhu “eware-oka oke onana” mu jẹ jowọ lele ere. (Mat. 16:1-3) Evaọ orugba Ẹme riẹ, Jihova ọ te gbẹ jọ kugbe ahwo riẹ nọ ọ ruẹrẹ họ no re a ru iruo riẹ makọ oghẹrẹ ukpokpoma kpobi nọ a rẹriẹ ovao dhe kẹhẹ.
Ghelọ oma nọ ewegrẹ a be dawo re a whaha ewhowho usi Uvie na, inievo mai a be ruabọhọ uzẹme na ota je bi koko oma họ kugbe. (Iruẹru 5:19, 20; Hib. 10:24, 25) Evaọ June 2004 eva Russia, okọto jọ nọ a rẹ kpare ẹdhọ kpohọ eva ẹkwotọ Russia jọ nọ a re se nọ Moscow o rọwo kugbe okọto osese jọ re a whaha iruo Isẹri Jihova, re a jẹ raha ebe-udu abọ-uzi nọ a ru kpobi no evaọ ẹkwotọ na. Ghele na, oma o lọhọ inievo na ha; a riẹ oware nọ Ọghẹnẹ ọ gwọlọ mi ai, yọ a bi yoẹme kẹe wọhọ Osu vi ahwo-akpọ. (Iruẹru 5:29) Ma fi eva họ nọ Jihova ọ rẹ kpọ idibo riẹ nọ a tẹ make rẹriẹ ova ku ukpokpoma ogaga.
Evaọ Republic of Georgia eva umutho ikpe jọ nọ e vrẹ na, a raha eware inievo mai, a ruẹ uye ozighi otu-ugbarugba, jẹ rọ ẹro ruẹ ebe rai nọ a jọ iraro rai mahe. Rekọ okwakwa ẹmo ovuovo nọ a gale vi ai nọ o kparobọ no o rrọ họ. (Aiz. 54:17) Evaọ etoke ukpe-iruo 2004 na, a tẹ wariẹ kẹ Isẹri Jihova uvẹ nọ a ta usiuwoma evaọ Georgia. A ru ikokohọ ababọ ukpokpoma, yọ a be jọ oria kpobi ghale ebe mai evaọ orẹwho na soso. A nẹ iyẹrẹ ẹvi iwhowho-uvie nọ a wo gbe ẹvi ahwo nọ a kpohọ Ekareghẹhọ.
A jọ erẹwho nana Armenia, Eritrea, Republic of Korea, Rwanda, gbe Turkmenistan, mu inievo na fihọ uwou-odi no fiki ẹrọwọ rai. Dede nọ a lahiẹ e rai, a riẹ oware no Ikereakere na e ta nọ a be rọ lahiẹ ae, yọ onana u fi obọ họ kẹ ae yọrọ ẹgbakiete rai no nọ a be rọ ẹro so Jihova kẹ esiwo rai na.—1 Pita 1:6; 2 Pita 2:9.
Nọ whọ be jọ 2005 Yearbook ọrọ Isẹri Jihova se “Highlights of the Past Year” (Ikuigbe Eware Obọdẹ nọ E Via Evaọ Ukpe Nukpo Na), gbe Iyẹrẹ Iruo Akpọ Soso erọ 2004 na, eva e te were owhẹ fiki ewoma nọ Jihova o ru no. (Ol. 31:19; 65:11) Ma rẹro nọ Yearbook ukpe nana o te ta udu họ owhẹ awọ re whọ ruabọhọ ẹnya evaọ edhere nọ ọ rẹ were Ọghẹnẹ.—1 Tẹs. 4:1.
Ma gbẹ be daoma gaga re ma wha uzẹme na se oghẹrẹ ahwo kpobi. Wọhọ oriruo, a ru ividio, DVD, gbe ekwakwa efa fihọ ẹvẹrẹ obọ rọ tẹme kẹ ahwo nọ a diezọ gbe ebe Braille nọ a ru kẹ enọ i tuaro re i fi obọ họ kẹ ae evaọ abọ-ẹzi. Iwhowho-uvie buobu a wuhrẹ ẹvẹrẹ erara nọ e be rria ẹkwotọ ukoko rai no.
Fibae, a rehọ itu ekwotọ nọ i sioma no nọ i bu te egba buobu mu no evaọ ekwotọ nọ a rẹ sae kake nyate he. Itu ekwotọ nọ i siomano nọ uwou ogha jọ u wo i bu vrẹ 300, yọ iwhowho-uvie nọ e rrọ ae i bu vrẹ 7,000. Onana u gine dhesẹ nọ ma ti wo ẹvi ikoko ekpokpọ evaọ obaro. Ofariẹ re, eva usu-ahwo 16,760,607 nọ a kpohọ Ekareghẹhọ evaọ ukpe-iruo nọ o vrẹ na, ahwo nọ a bu vrẹ ima 10 a rrọ Isẹri Jihova ha. Onana u dhesẹ nọ ẹvi iruẹru buobu ọ gbẹ rrọ obaro kẹ omai nọ ma bi ti ru.
Ma yere Jihova kẹ eghale ilogbo riẹ gbe edhere oyoyou nọ ọ be rọ sẹro mai nẹdẹ tẹdẹ. (Itẹ 10:22; Mal. 3:10; 1 Pita 5:7) Nọ ma be rọ okugbe ọvo nyaharo eva “edẹ urere” nana, ma fi eva mai kpobi họ Jihova. Makọ ẹbẹbẹ kpobi nọ ma rẹriẹ ova dhe kẹhẹ, joma rehọ eme uzẹme ẹgbukpe 2005 na vọ iroro mai: “Obọ Jihova obufihọ mẹ u re no tha.” (Ol. 121:2, NW ) Iviena wha jẹ uyoyou gbe elẹ nọ ma be lẹ fiki rai rehọ.
Inievo rai,
Ugboma Esuo orọ Isẹri Jihova