Ithihakọ E rẹ Kẹ Erere

¹ “Evaọ akothiho rai wha re ti ro wo uzuazọ rai.” (Luk 21:19) Eme yena, nọ e rrọ abọjọ eruẹaruẹ Jesu kpahe “urere akpọ na,” i ru rie vẹ inọ ma te kru ẹgbakiete mai, ma rẹ ruẹrẹ oma kpahe hrọ kẹ edawọ nọ i ti te omai. Rekọ avọ ẹgba nọ Jihova ọ rẹ kẹ, mai omomọvo ma rẹ sai “kiakọ te urere” a ve ‘siwi omai.’—Mat. 24:3, 13; Fil. 4:13.

² Ukpokpoma, ebẹbẹ ẹyao, ebẹbẹ ugho, gbe ẹyao iroro e rẹ sai ru okpẹdẹ kpobi jọ bẹbẹ gaga. Rekọ o thọrọ omai ẹro vievie he inọ, Setan ọ be daoma raha ẹgbakiete nọ ma wo kẹ Jihova. Ẹdẹ kpobi nọ ma yọrọ omarokpotọ mai kẹ Ọsẹ mai yọ uvẹ ofa nọ ma ro fi obọ họ eva uyo nọ ọ be kẹ Ọnọ ọ poviẹ ẹgbakiete mai na. Ẹvẹ o rrọ oware erere te re ma riẹ nọ ‘irui oviẹ’ mai evaọ etoke nọ ma rrọ odawọ e rẹ thọrọ ẹro ho! E rrọ ghaghae kẹ Jihova, yọ ẹgbakiete mai o re ru udu riẹ ghọghọ!—Ol. 56:8; Itẹ 27:11.

³ Edawọ I re Ru Omai Kpokpọ: Odawọ o rẹ sai dhesẹ orọwọ nọ u whrehe no hayo uruemu othọthọ via, wọhọ omorro hayo okpakpa. Ukpenọ ma rẹ gwọlọ rehọ idhere nọ e rọwo kugbe Ikereakere na ha dhẹ no edawọ hayo ku edawọ họ, ma rẹ jẹ uthubro nọ o rrọ Ẹme Ọghẹnẹ na rehọ re ma ‘jọ akothiho mai o ru iruo riẹ gba.’ Fikieme? Fikinọ ẹrọwọ nọ a re ro thihakọ edawọ u re fi obọ họ kẹ omai “kiete jẹ gbunu.” (Jem. 1:2-4) Ithihakọ e rẹ sai fi obọ họ kẹ omai bọ obọdẹ ekwakwa, whọhọ ororokẹ, ọdawẹ, gbe ohrọ.—Rom 12:15.

⁴ Uvi Orọwọ nọ A Dawo No: Nọ ma te thihakọ edawọ, ma re wo uvi orọwọ nọ o ghare gaga evaọ aro Ọghẹnẹ. (1 Pita 1:6, 7) Ẹrọwọ otiọye na ọ tẹ bọ omai ga ma jẹ sai dikihẹ ga kẹ edawọ nọ e rrọ obaro tha. Ofariẹ, ma rẹ sai wo irẹro ọjẹrehọ Ọghẹnẹ, yọ onana o rẹ bọ ẹruore mai ga, ru ei nọ u je mu omai ẹro viere.—Rom 5:3-5.

⁵ A fi elo họ uvi erere nọ o re no ithihakọ ze eva Jemis 1:12, onọ o ta nọ: “Ohwo nọ o re thihakọ kẹ odawọ o wo oghale, keme re o te mudhe kẹ odawọ na, o re ti mi etu-uvie uzuazọ.” Fikiere, joma dikihẹ ga evaọ omarokpotọ mai kẹ Jihova, avọ imuẹro inọ ọ rẹ te hwosa kẹ “enọ i you rie.”

Abọ Avọ 2: Eru Ebe-Iwuhrẹ Ebaibol nọ E rẹ Nyaharo

Oma Oruẹrẹ Kpahe kẹ Eru Uwuhrẹ Na

¹ Re ohwo o wuhrẹ ziezi evaọ obe-uwuhrẹ Ebaibol o kẹre vi ẹme nọ ọ rẹ ta kpahe oria nọ a bi wuhrẹ na gbe ikereakere nọ a fodẹ na nọ o re se ọvo. O gwọlọ nọ ma re wuhrẹ ọmọ-uwuhrẹ na evaọ edhere nọ o re duobọte udu riẹ. Onana o gwọlọ oma oruẹrẹ kpahe ziezi avọ ọmọ-uwuhrẹ na nọ ma re wohọ iroro.—Itẹ 15:28.

² Epanọ A rẹ rọ Ruẹrẹ Oma Kpahe: Rehọ olẹ nọ whọ rẹ lẹ se Jihova kpahe ọmọ-uwuhrẹ na avọ ẹgwọlọ riẹ ro muhọ. Lẹ Jihova re o fi obọ họ kẹ owhẹ rọ eme na nyate udu ọmọ-uwuhrẹ na. (Kọl. 1:9, 10) Re whọ sai wo otoriẹ uzoẹme na ziezi, rehọ omoke jọ roro kpahe uzoẹme nọ o rrọ uzou hayo uwuhrẹ nọ wha bi ti wuhrẹ na, izoẹme-esese na, gbe eware efa kpobi nọ e rẹ sai fi obọ họ. Nọ oma ra nọ, ‘Eme họ uzedhe ẹjiroro uzoẹme na?’ Onana u ti fi obọ họ kẹ owhẹ tọ ẹro vi uzedhe igogo-eme na nọ who bi ru uwuhrẹ na.

³ Rọ oma totọ kiẹ ẹme na no edhe-ẹme te edhe-ẹme. Vuhu iyo enọ na mu, kpoka họ igogo-eme gbe ihie-eme nọ i wuzou na ọvo. Dhesẹ epanọ ikereakere nọ a fodẹ na i ro wobọ kpahe igogo-eme nọ e rrọ edhe-ẹme na, jẹ salọ enọ who ti se evaọ etoke uwuhrẹ na. Who te kere eme fihọ akotọ obe na nọ a kere oware ovo fihọ ha na o sai fi obọ họ kẹ owhẹ. Ọmọ-uwuhrẹ na o re vuhumu ziezi inọ oware nọ o bi wuhrẹ na Ẹme Ọghẹnẹ u no ze.—1 Tẹs. 2:13.

⁴ Ru Uwuhrẹ na Kiehọ Ẹgwọlọ Ohwo Na: Ofariẹ, ru uwuhrẹ na re u kiehọ ẹgwọlọ ọmọ-uwuhrẹ na. Daoma kaki roro kpahe enọ nọ ọ be te nọ gbe igogo-eme nọ o bi ti wo otoriẹ rai hi hayo nọ e te jọ bẹbẹ re o te wo otoriẹ rai. Nọ oma ra nọ: ‘Eme u fo nọ o re wo otoriẹ riẹ hayo ru iruo kpahe re ọ sai wo ẹnyaharo abọ-ẹzi? Ẹvẹ mẹ sae rọ rehọ eme na nyate udu riẹ?’ Who ve ru uwuhrẹ na lele ere. Evaọ ẹsejọ, whọ sae ruẹ oware nọ u je fo re whọ ruẹrẹ ọtadhesẹ jọ họ, epanọ who re ro ru ẹme vẹ, hayo enọ sa-sa re i fi obọ họ kẹ ọmọ-uwuhrẹ na wo otoriẹ ẹme hayo ikere jọ. (Neh. 8:8) Rekọ whaha eme efa nọ i wobọ kpahe uzoẹme na tere he nọ who re fiba ae. Ọkiẹriwo ọkpẹkpẹe nọ who re ru evaọ obọ ekuhọ uwuhrẹ na u ti fi obọ họ kẹe kareghẹhọ igogo eme na.

⁵ Ẹvẹ oghọghọ nọ ma re wo o rẹ rro te nọ ahwo ọkpokpọ a tẹ mọ ibi ẹrẹreokie rọ kẹ oruaro Jihova! (Fil. 1:11) Re ma sae fi obọ họ kẹ ae nyate ute yena, ruẹrẹ oma kpahe ziezi evaọ oke kpobi nọ whọ tẹ gwọlọ ru obe-uwuhrẹ Ebaibol.