Osa nọ Ma Re Amọfa

¹ Pọl ukọ na ọ rehọ e riẹ wọhọ owha-iruo riẹ re ọ ta usiuwoma kẹ amọfa. Ọ riẹ nọ Jihova o ru rie lọhọ no kẹ oghẹrẹ ahwo kpobi re a wo esiwo ẹkwoma azẹ ọghaghae Ọmọ Riẹ. (1 Tim. 2:3-6) Fikiere, Pọl ọ ta nọ: “Mẹ ọriesa ahwo Griki gbe enọ e be jẹ evẹrẹ efa, te igheghẹ gbe iwoareghẹ.” Ọ rehọ ajọwha ruiruo gaga re ọ wha osa nọ ọ re ibe ahwo akpọ riẹ ẹkwoma usiuwoma nọ ọ ta kẹ ae.—Rom 1:14, 15.

² Wọhọ Pọl, Ileleikristi oke mai na a be daoma vuẹ erivẹ rai emamọ usi na evaọ uvẹ kpobi nọ u rovie fihọ. Fikinọ ‘uye ulogbo’ na o kẹle gaga no na, ẹgwọlọ nọ ma be gwọlọ enọ i wo udu-oruọzewọ na o kpata gaga. Jọ uvi uyoyou nọ ma wo kẹ ahwo o wọ omai wo osegboja evaọ iruo uzuazọ usiwo nana.—Mat. 24:21; Izik. 33:8.

³ Ẹhwa Osa nọ Ma Re: Ugogo edhere nọ ma rẹ rọ nyate ahwo oma họ ẹkwoma usiuwoma ota nẹthẹ ruọ ẹthẹ na. Evaọ ekwotọ nọ a rẹ jọ di ahwo họ uwou hu, evuẹ egbagba nọ ma re kere fihotọ gbe etoke sa-sa nọ ma re ro zihe u re fi obọ họ kẹ omai nyate ahwo buobu oma. (1 Kọr. 10:33) Ma rẹ jẹ sai duku ahwo ẹkwoma usiuwoma ota evaọ ẹkwotọ ekiọthuọ, evaọ iyẹrẹ, eria nọ imoto e rẹ kpahe, eria ẹgbede gbe isẹri-ise ifonu. Ma sae nọ oma mai nọ, ‘Kọ mẹ be dao ẹgba mẹ kpobi rọ rehọ uvẹ usiuwoma ota kpobi ruiruo re mẹ wha ovuẹ uzuazọ na se amọfa?’—Mat. 10:11.

⁴ Oniọvo-ọmọtẹ jọ nọ ọ rrọ ọkobaro ọ rehọ e riẹ wọhọ owha-iruo riẹ re ọ nyate ahwo kpobi oma evaọ ẹkwotọ riẹ. Eva uwou jọ, ẹsikpobi a re si iwindo uwou na họ, yọ a re di ohwo họ uwou na ha. Rekọ evaọ ẹdẹ jọ nọ ọkobaro na ọ jọ usiuwoma ota ha, ọ tẹ ruẹ omoto jọ evaọ aro uwou nana nọ a re di ohwo họ oke ovo ho na. Fikinọ ọ gwọlọ nọ uvẹ nana u vru hu, o te kporo ẹgogo uwou na. Ọzae jọ ọ tẹ kpunu, yọ ẹme nọ a ta evaọ ẹdẹ yena o su kpohọ izihebro buobu nọ oniọvo-ọmọtẹ nana avọ ọzae riẹ a ru. Uwhremu na, ọzae na ọ tẹ jẹ obe-uwuhrẹ Ebaibol rehọ, yọ obọnana ọ họ-ame no. Ọ vọ avọ uyere inọ oniọvo-ọmọtẹ nana ọ rehọ e riẹ wọhọ owha-iruo riẹ re ọ ta usiuwoma kẹ amọfa.

⁵ Fiki urere nọ o kẹle no na, oke nana họ oke nọ ma rẹ rọ wha osa nọ ma re erivẹ mai ẹkwoma oma nọ ma rẹ dawo ziezi evaọ iruo usiuwoma ota na.—2 Kọr. 6:1, 2.

Abọ Avọ 11: Eru Ebe-Iwuhrẹ Ebaibol nọ E rẹ Nyaharo

Obọ Ufihọ kẹ Iwhowho-Uvie Ekpokpọ re A Ru Izihebro

¹ Nọ ọmọ-uwuhrẹ Ebaibol o te mu obọ họ ewo no evaọ iruo usiuwoma ota na, ọ te nyaku ahwo nọ a dhesẹ isiuru kpahe emamọ usi na. Kọ ẹvẹ ma sai ro fi obọ họ kẹ owhowho-uvie ọkpokpọ na re o ru obọdẹ izihebro jẹ bọ isiuru nọ ahwo a dhesẹ?

² Omaruẹrẹhọ kẹ ozihebro u re muhọ no iweze ọsosuọ na ze. Ta udu họ ọmọ-uwuhrẹ na awọ re o dhesẹ uvi isiuru kẹ ahwo nọ ọ be ta usiuwoma kẹ. (Fil. 2:4) Wuhrẹ ọmọ-uwuhrẹ ọkpokpọ na re ọ ta kẹ ahwo na nọ a ta oware nọ ọ rrọ iroro rai, re ọ gaviezọ kẹ eme nọ a be ta, re o je muẹrohọ eware nọ e rrọ ọdawẹ kẹ ae. Nọ ohwo jọ o te dhesẹ isiuru, ta kẹ owhowho-uvie na re o kere eme nọ i wuzou fihotọ kpahe iweze na. Rehọ eme yena fi obọ họ kẹe ru ọruẹrẹfihotọ kẹ ẹmeọta ọfa evaọ obaro.

³ Omaruẹrẹhọ re A Zihe: Kiẹ eme nọ a jọ iweze ọsosuọ na ta riwi, re who dhesẹ kẹ ọmọ-uwuhrẹ na epanọ ọ rẹ rọ salọ abọjọ ovuẹ Uvie na nọ u ti si ohwo nọ ọ ta ẹme kẹ na urru. (1 Kọr. 9:19-23) Wha ruẹrẹ edhere-ẹmeọta jọ họ kugbe nọ a rẹ jọ rehọ oria ikere Ebaibol ọvo gbe edhe-ẹme jọ evaọ obe mai jọ nọ a re ro ru uwuhrẹ ro ruiruo. Fibae, ruẹrẹ onọ jọ họ nọ a rẹ sae nọ evaọ obọ ekuhọ ẹme na ro ru otọhotọ họ kẹ iweze netha. Dhesẹ kẹ owhowho-uvie ọkpokpọ na epanọ ọ sai ro ru eriariẹ ohwo na kpahe Ẹme Ọghẹnẹ rro evaọ iweze kpobi.

⁴ U re je fi obọ họ re a wuhrẹ ọmọ-uwuhrẹ na eme elọlọhọ nọ a re ro mu ẹme họ evaọ ozihebro. Nọ o te yere ohwo nọ ọ be ta ẹme kẹ no, ọ sae ta nọ: “Ẹme nọ me lele owhẹ ta evaọ iweze mẹ nọ i kpo ọ were omẹ gaga, yọ me zihe ze no re mẹ ta ẹme ọfa no Ebaibol ze kẹ owhẹ kpahe [fodẹ uzoẹme na].” Whọ sai je dhesẹ kẹ owhowho-uvie ọkpokpọ na epanọ ọ rẹ ta otẹrọnọ omọfa ọ kpọ riẹ unu nọ o kporo ẹthẹ na.

⁵ Nya Lele Isiuru na Ziezi: Ta udu họ ọmọ-uwuhrẹ na awọ re o fi emamọ oriruo hotọ nọ o re ro zihe vẹrẹ vẹrẹ bru ahwo kpobi nọ a dhesẹ isiuru. Re a di ahwo họ uwou o sae gwọlọ ithihakọ nọ a re ro dhe ezezihe. Wuhrẹ ọmọ-uwuhrẹ na epanọ o re ro ru ọruẹrẹfihotọ nọ ọ rẹ rọ wariẹ zihe, je fi obọ họ kẹe wo otoriẹ oware nọ o jẹ roja re o zihe wọhọ epanọ ọ ya kẹ ohwo na. (Mat. 5:37) Wuhrẹ owhowho-uvie ọkpokpọ na re o wo ẹwo, roro kẹ amọfa, je dhesẹ adhẹẹ nọ ọ be gwọlọ enọ e wọhọ igodẹ jẹ be bọ isiuru rai ga na.—Tait. 3:2.