Epanọ A re ro Mu Ebe-Iwuhrẹ Ebaibol Họ Evaọ Unuẹthẹ gbe Ẹkwoma Ifonu

¹ Nẹnẹ, ahwo a bi wo uvẹ tere he. Ghele na, ibuobu i wo isiuru kpahe eware abọ-ẹzi. Ẹvẹ ma sai ro fi obọ họ kẹ ai ru ẹgwọlọ abọ-ẹzi rai gba? (Mat. 5:3) Iwhowho-uvie buobu a be sai ru ebe-iwuhrẹ Ebaibol kugbe ahwo eva unuẹthẹ iwou ahwo na hayo ẹkwoma ifonu. Kọ whọ sae rọ edhere nana ru odibọgba ra kẹre?

² Re ma sai mu ebe-iwuhrẹ Ebaibol họ, u fo nọ ma rẹ ruẹrẹ oma kpahe re ma sae to obe-uwuhrẹ Ebaibol họ evaọ uvẹ kpobi nọ u rovie fihọ. Oghẹrẹ vẹ gbe oria vẹ ma jẹ sai ru onana?

³ Eva Unuẹthẹ: Nọ whọ tẹ nyaku ohwo nọ u nevaze inọ who lele iei tẹme kpahe Ebaibol na, rovie kpohọ edhe-ẹme nọ whọ ruẹrẹ họ no vẹre, wọhọ edhe-ẹme ọsosuọ eva uwuhrẹ 1 ọrọ ibroshọ Gwọlọ na, whọ vẹ rọ ere mu ẹme họ ẹta no obe na ze. Se edhe-ẹme na, nọ onọ na, je se ikereakere ọvo hayo ivẹ evaọ usu enọ a fodẹ na. Eva ẹsibuobu, a rẹ sae rehọ iminiti isoi rite ikpe ro ru onana eva unuẹthẹ. Otẹrọnọ ẹme nọ wha ta na ọ were ohwo na, ru ọruẹrẹfihotọ nọ wha re ro wuhrẹ edhe-ẹme ọvo hayo ivẹ efa nọ e kẹle riẹ evaọ oke ofa.—A rẹ sae ruẹ iroro-ejẹ efa kpahe epanọ a rẹ rọ rehọ edhere nana mu ebe-iwuhrẹ Ebaibol họ eva Odibọgba Uvie Mai ọrọ January 2002, ẹwẹ. 6.

⁴ A rẹ sae rehọ oghẹrẹ edhere ọvona mu obe-uwuhrẹ Ebaibol họ nọ a te bi ru izihebro. Wọhọ oriruo, whọ sai dhesẹ ibroshọ Gwọlọ na jẹ ta kpahe odẹ Ọghẹnẹ, ẹkwoma uwuhrẹ avọ 2, edhe-ẹme 1-2 na nọ who re ro ruiruo. Eva iweze netha, whọ sae ta oware nọ Ebaibol i dhesẹ kpahe ekwakwa Jihova, ẹkwoma edhe-ẹme avọ 3-4 nọ who re ro ruiruo. Eva iweze nọ e kẹle riẹ, wha sai wuhrẹ edhe-ẹme avọ 5-6 jẹ ta kpahe uwoho nọ o rrọ ẹwẹ-obe avọ 5 na ro fielo họ epanọ ewuhrẹ Ebaibol na u re ro fi obọ họ kẹ omai riẹ Jihova. Ma rẹ sai ru enana kpobi nọ ma dikihẹ unuẹthẹ na.

⁵ Ẹkwoma Ifonu: O rẹ sai kiehọ ahwo jọ oma re a rehọ ẹkwoma ifonu wuhrẹ Ebaibol vi ẹsenọ a rẹ rẹriẹ ovao dhe ovao. Rri oriruo nọ ọ rrọ obotọ na: Nọ oniọvo-ọmọtẹ jọ ọ jẹ ta usiuwoma no uwou ruọ uwou, ọ nyaku uvovo-aye jọ nọ o wo emọ je wo iruo nọ e be lẹliẹe wo uvẹ hẹ. Nọ oniọvo-ọmọtẹ na ọ gbẹ be sae wariẹ di aye na họ uwou hu, ọ tẹ jiroro nọ ọ rẹ rehọ ifonu sei. Uvovo-aye na o te ru ei vẹ inọ o wo uvẹ nọ ọ rẹ rọ ginẹ keria re ọ tẹme kpahe Ebaibol ho. Oniọvo-ọmọtẹ na ọ tẹ ta nọ: “Whọ sae rehọ iminiti 10 hayo 15 ro wuhrẹ oware okpokpọ jọ, makọ eva ifonu dede.” Aye na ọ tẹ ta nọ: “Otẹrọnọ who re ru ei evaọ ifonu, mẹ rọwo.” U kri hi, a te mu obe-uwuhrẹ Ebaibol ẹsikpobi họ eva ifonu.

⁶ Kọ eva usu ahwo nọ who bi weze bru, u no ejọ eva ze re a rehọ ẹkwoma ifonu wuhrẹ Ebaibol na? Whọ sae dawo edhere nọ a nwani dhesẹ no na, hayo whọ sae ta nọ: “O tẹ were owhẹ, ma sae jọ ifonu tẹme kpahe Ebaibol na. Kọ oyena o mai ti kiehọ kẹ owhẹ?” Ẹkwoma omaa obe-uwuhrẹ Ebaibol mai nọ ma re nwene kiehọ iyero amọfa, ma rẹ sai fi obọ họ kẹ ae “ruẹ eriariẹ Ọghẹnẹ na.”—Itẹ 2:5; 1 Kọr. 9:23.

Ẹme nọ Whọ rẹ Ta Kpahe Emagazini Na

Awake! Aug. 22

“Kọ whọ riẹ nọ eria sa-sa nọ a re weze kpohọ u rovie uvẹ iruo fihọ kẹ ahwo buobu no nẹnẹ? [Kuvẹ kẹ uyo.] Iweze nọ a re weze kpohọ eria sa-sa e wha irere gbe ebẹbẹ ze no. Emagazini nana o ta kpahe ewoma gbe eyoma nọ eria sa-sa nọ a re weze kpohọ e be wha ze. O tẹ jẹ kẹ iroro-ejẹ jọ nọ i re fi obọ họ kẹ ahwo nọ a rẹ rehọ orẹwho ofa kperẹ.”

Uwou-Eroro Na Sept. 1

“Evaọ akpọ inẹnẹ na, uyoyou yọ okwakwa ezi nọ ahwo a re jiri gaga rekiyọ a be sae jọ uruemu rai dhesẹ iẹe via ha. Kọ u gbe woma otẹrọnọ ahwo buobu a re dhesẹ oghẹrẹ uyoyou nọ a jọ etenẹ dhesẹ na? [Se 1 Jọn 4:7, 20. Whọ vẹ kuvẹ kẹ uyo.] Emagazini nana o dhesẹ epanọ ma sai ro dhesẹ uyoyou evaọ akpọ nana nọ ọ kare uyoyou na.”

Awake! Sept. 8

“Ẹsejọhọ u gb’owhẹ unu no kpahe ọrọwokugbe-ọvo nọ ọ rrọ udevie emama. [Fodẹ oriruo jọ nọ a dhesẹ na.] Kọ o gbẹ rrọ oware idhọvẹ inọ emamọ oyerikugbe ọ rrọ udevie ahwo-akpọ họ? [Kuvẹ kẹ uyo.] Emagazini nana u dhesẹ epanọ Ọghẹnẹ ọ te rọ wha udhedhẹ gbe okugbe ze akpọ mai na kẹle.” Se Aizaya 11:9.