Abọ Avọ 3: Eru Ebe-Iwuhrẹ Ebaibol nọ E rẹ Nyaharo

Ikereakere na I ro Ru Iruo Ziezi

¹ Ẹjiroro nọ ma bi ro ru ebe-iwuhrẹ Ebaibol họ re ma “ru ilele” ẹkwoma obọ nọ ma re fihọ kẹ ahwo re a wo otoriẹ jẹ rọwo iwuhrẹ Ẹme Ọghẹnẹ, re a je fi ai họ iruo evaọ uzuazọ rai. (Mat. 28:19, 20, NW; 1 Tẹs. 2:13) Fikiere, uwuhrẹ na i re no Ikereakere na ze. Orọ ọsosuọ, o sai fi obọ họ re who dhesẹ kẹ emọ-uwuhrẹ na epanọ a rẹ rọ jọ Ebaibol rai duku igogo ikere jọ. Kọ ẹvẹ ma sae rọ rehọ Ikereakere na fi obọ họ kẹ ahwo otiọye re a wo ẹnyaharo abọ-ẹzi?

² Salọ Ikere nọ Who re Se: Evaọ okenọ whọ be ruẹrẹ oma kpahe, kiẹ ikere kpobi nọ a fodẹ na riwi re whọ riẹ epanọ i ro kie kpahe oware nọ a be ta na, jẹ salọ enọ wha ti se jẹ tẹme kpahe evaọ etoke uwuhrẹ na. Wọhọ epanọ u fo, u re woma re ma se ikereakere nọ i dhesẹ oria nọ ẹrọwọ mai o no ze. U du fo ho re a se ikere nọ e nwane rehọ ugogo-ẹme na ze he. Wo ẹgwọlọ gbe iyero ọmọ-uwuhrẹ ọvuọvo họ iroro.

³ Rehọ Enọ ro Ruiruo: Ukpenọ who re ru ikere Ebaibol vẹ kẹ ọmọ-uwuhrẹ na, ta kẹe re o ru ei vẹ kẹ owhẹ. Whọ rẹ sae kpakpa iẹe ru onana ẹkwoma enọ nọ whọ rẹ rehọ ona nọe. Otẹrọnọ efihiruo ikereakere jọ o re vevẹ, whọ rẹ sae nọe epanọ ikere na e rọ tha ẹme nọ a jọ edhe-ẹme na ta na uke. Evaọ iyero efa, o sae gwọlọ ugogo onọ jọ hayo enọ buobu nọ e rẹ kpọ ọmọ-uwuhrẹ na nọ o je wo otoriẹ ẹme na ziezi. Otẹrọnọ o gwọlọ oruvẹ ọfa, whọ rẹ sai ru ere nọ ọmọ-uwuhrẹ na ọ tẹ kpahe ẹme no.

⁴ Ru Ei Lọhọ: Evaọ ẹsibuobu, ose ovuọvo ozuẹ nọ o wo ona ọ rẹ rọ sa oware rehọ. Epọvo na re, owuhrẹ nọ o wo ona o re du gwọlọ eme buobu taure o te ru ugogo-ẹme vẹ hẹ. Ọ rẹ sai dhesẹ ẹme lọlọhọ, vevẹ, jẹ jọ gbagba. Eva ẹsejọ, whọ sae jọ ebe ukoko mai na ru ekiakiẹ re whọ sai wo otoriẹ ikereakere jọ jẹ sae fotọ riẹ gbagba. (2 Tim. 2:15) Rekọ whaha abọ ikereakere na kpobi nọ whọ rẹ gwọlọ ru vẹ evaọ uwuhrẹ na. Eware nọ i wuzou nọ whọ rẹ sai ro ru ẹme nọ wha bi wuhrẹ na vẹ ọvo who re kugbei.

⁵ Dhesẹ Efihiruo Ẹme Na: Oria nọ u je fo, fi obọ họ kẹ ọmọ-uwuhrẹ na re ọ ruẹ epanọ ikere Ebaibol i ro kie kpahe ọyeomariẹ. Wọhọ oriruo, nọ who te bi se Ahwo Hibru 10:24, 25 kugbe ọmọ-uwuhrẹ nọ o ri mu iwuhrẹ Ileleikristi họ ẹnya ha, whọ sae ta kpahe uwuhrẹ mai jọ je zizie ọmọ-uwuhrẹ na re ọ ziọ ewuhrẹ na. Rekọ whọ kpakpa iẹe he. Kẹ Ẹme Ọghẹnẹ uvẹ re ọ wọe jowọ nọ u fo nọ o re ro ru eva were Jihova.—Hib. 4:12.

⁶ Nọ ma be wha iruo nọ a kẹ omai re ma ru ilele haro na, joma rehọ Ikereakere na ruiruo ziezi re u ru ahwo wo ‘ẹmeoyo nọ o re no orọwọ ze.’—Rom 16:26.

Ẹme nọ Whọ rẹ Ta Kpahe Emagazini Na

Awake! Nov. 22

“Evaọ ikpe 20 nọ e vrẹ, a ru ẹnyaharo gaga no evaọ ewo otoriẹ ẹyao AIDS gbe esiwi riẹ. Ghele na ahwo jọ a gbe bi wo evuẹ ethọthọ kpahe ẹyao nana. [Dhesẹ etehe na “Myths About AIDS” (Iku-Esia Kpahe AIDS), whọ vẹ kuvẹ re ohwo na ọ kpahe ẹme.] Emagazini nana ọ ta kpahe epanọ esẹgbini a sae rọ thọ emọ rai.” Se Iziewariẹ 6:6, 7.

Uwou-Eroro Na Dec. 1

“Ẹme kpahe udi-ogaga nọ a rẹ da u zihe ruọ ẹme avro gaga no. Ahwo jọ nọ a se oma rai Ileleikristi a rọwo nọ o thọ re Oleleikristi uzẹme ọ da udi-ogaga, yọ amọfa a be ta nọ ẹme udi-ogaga nọ a rẹ da yọ ẹme nọ Oleleikristi kpobi ọ rẹ jiroro riẹ kẹ oma riẹ. Kọ ẹvẹ who roro? [Kuvẹ kẹ uyo. Kẹsena who ve se Itẹ 20:1.] Emagazini nana u dhesẹ ẹme nọ Ebaibol na e ta gbe epanọ ma sai ro wo eriwo owowa kpahe ẹme na.”

Awake! Dec. 8

“Ẹnyaharo evaọ ewuhrẹ-eware-ikuo u ri nwene ẹgwọlọ ogbẹnyusu nọ ahwo-akpọ a wo ho. Kọ whọ sai mu ẹro họ no inọ inwene nọ e be roma via evaọ okegbe ahwo-akpọ e sai ru ei fihọ bẹbẹ nẹnẹ re a bọ usu okpekpe? [Kuvẹ kẹ uyo. Kẹsena who ve se Itẹ 18:24.] Emagazini nana ọ ta kpahe epanọ ma sai ro mu jẹ yọrọ emamọ egbẹnyusu.”