Abọ Avọ 4: Eru Ebe-Iwuhrẹ Ebaibol nọ E rẹ Nyaharo

Epanọ A re ro Wuhrẹ Ọmọ-Uwuhrẹ na re Ọ Ruẹrẹ Oma Kpahe

¹ Ọmọ-uwuhrẹ nọ o re se oria nọ a bi ti wuhrẹ kpahotọ, kpoka họ iyo na, je roro epanọ ọ rẹ rọ rehọ eme obọriẹ kẹ iyo na o re wo ẹnyaharo abọ-ẹzi ziezi. Fikiere, nọ whọ tẹ tuọ obe-uwuhrẹ Ebaibol họ no, lele ọmọ-uwuhrẹ na rehọ uwuhrẹ jọ ruẹrẹ oma kpahe re who dhesẹ epanọ a rẹ rọ ruẹrẹ oma kpahe kẹe. Rọkẹ emọ-uwuhrẹ buobu, o rẹ mai fiobọhọ re wha rehọ uzou hayo uwuhrẹ jọ soso ruẹrẹ oma họ kugbe.

² Oka Ukpehọ gbe Eme nọ A re Kere Fihọ Akotọ Obe Na: Dhesẹ kẹ ọmọ-uwuhrẹ na epanọ a rẹ rọ ruẹ uzedhe uyo orọ enọ nọ a nọ na. Eva obe nọ wha bi wuhrẹ na, dhesẹ ora nọ who je kpoka họ igogo eme hayo ihie-eme na kẹ ọmọ-uwuhrẹ na. Nọ wha bi wuhrẹ obe na, ẹsejọhọ o sae were iẹe re o lele oriruo ra, ọ vẹ te jọ obe riẹ kpoka họ eme nọ i wuzou re u fi obọ họ kẹe kareghẹhọ uyo na. (Luk 6:40) Whọ vẹ ta kẹe re ọ rehọ eme obọ riẹ kẹ uyo na. Onana u ti fi obọ họ kẹ owhẹ riẹ epanọ o wo otoriẹ oware nọ wha bi wuhrẹ na te.

³ Ikereakere nọ a jọ obe na fodẹ nọ a kere eme rai via ha nọ a rẹ rọ oma totọ kiẹ riwi yọ abọ jọ nọ o wuzou evaọ omaruẹrẹhọ ọmọ-uwuhrẹ na kẹ uwuhrẹ na. (Iruẹru 17:11) Fi obọ họ kẹe vuhumu inọ ikereakere kpobi nọ a fodẹ e tha ẹme jọ evaọ edhe-ẹme na uke. Dhesẹ kẹe epanọ o re ro kere eme kpẹkpẹe fihọ akotọ obe nọ o bi wuhrẹ na. Fi ẹgba họ ugogo-ẹme na kẹe inọ Ebaibol na họ otọhotọ oware nọ o bi wuhrẹ na. Ta udu họ iẹe awọ re ọ ta kpahe ikereakere nọ a fodẹ na evaọ okenọ ọ be kuyo evaọ uwuhrẹ na.

⁴ Ọdhẹduwu gbe Ọkiẹkpemu: Taure ọmọ-uwuhrẹ na o te ti mu omaruẹrẹhọ riẹ evaọ obe nọ o bi wuhrẹ na họ, u re fi obọ họ kẹe nọ ọ tẹ kake kiẹ oria uwuhrẹ na rri tao. Dhesẹ kẹe inọ ọ rẹ sae kake kiẹ oware nọ o bi ti wuhrẹ na ẹkwoma ẹkiẹriwi uzoẹme na, izoẹme-esese, gbe iwoho nọ e rrọ obe na. Ru ei vẹ kẹe inọ taure o te ti ku omaruẹrẹhọ riẹ họ, u re woma re ọ rehọ omoke jọ ru ọkiẹkpemu igogo-eme nọ e rrọ uwuhrẹ na, ọ sae rehọ ẹkpẹti ọkiẹkpemu na ru iruo otẹrọnọ ọjọ ọ rrọ uzoẹme na. Ọkiẹkpemu otiọye na o ti fiobọhọ kẹe kareghẹhọ ovuẹ na.

⁵ Ọmọ-uwuhrẹ na nọ a re wuhrẹ re ọ ruẹrẹ oma kpahe ziezi kẹ uwuhrẹ riẹ u ti fiobọhọ kẹe nọ ọ jẹ kẹ emamọ iyo eva iwuhrẹ ukoko. U ti je fiobọhọ kẹe wo ẹzi uwuhrẹ nọ o te kẹe erere ologbo nọ ọ tẹ maki wuhrẹ obe riẹ na kpobi re no.

Wo Erere no Ividio ọ No Blood—Medicine Meets the Challenge na Ze

Ẹvẹ whọ riẹ kpahe idhere usiwo-imu sa-sa erọ ababọ-azẹ na te? Kọ who wo otoriẹ oghẹrẹ idhere usiwo-imu efa nọ a re ro nwene azẹ-osefihọ-oma na gbe epanọ i re ruiruo? Rri ividio nana, re whọ rehọ enọ obotọ na kiẹ eriariẹ ra evaọ abọ nana riwi.—Muẹrohọ: Fikinọ ughe oma-obẹrọ ekpẹkpẹ jọ e rrọ ividio na, esẹgbini a rẹ rọ areghẹ jiroro sọ emọ esese rai a re rri ividio na hayo jọ a rri rie he.

(1) Fiki ugogo ẹjiroro vẹ Isẹri Jihova e be rọ se azẹ osefihọ-oma, kọ diẹse a rẹ jọ duku ehri-uzi yena evaọ Ebaibol na? (2) Rọ kpahe ẹruọsa usiwo-imu, eme ma gwọlọ? (3) Ugogo udu vẹ ohwo nọ ọ be mọ o wo? (4) Fikieme o jẹ rrọ oware nọ u wo iroro je fo re a siọ azẹ osefihọ-oma? (5) Nọ azẹ o te bi hwẹ kufiẹ gaga, didi eware ivẹ nọ e mae r’oja edọkita i re ru? (6) Didi enwoma e rẹ sai lele azẹ osefihọ-oma? (7) Didi ekwakwa jọ edọkita i wo nọ i re fiobọhọ nọ azẹ o gbe hwẹ bu hrọ họ evaọ etoke oma-obẹrọ? (8) Eme whọ rẹ ta nọ a vuẹ owhẹ kpahe oghẹrẹ usiwo-imu kpobi nọ u re nwene azẹ osefihọ-oma nọ a ta inọ a ti ro siwi owhẹ? (9) Kọ a rẹ sai ru oma-obẹrọ ogaga ababọ azẹ osefihọ-oma? (10) Eme edọkita buobu a rọwo enẹna inọ a re ru kẹ Isẹri Jihova, kọ eme o wọhọ nọ o te jọ ute usiwo-imu kẹ enọ e be mọ kpobi nọ oke o be nyaharo na?

Ẹrọwokugbe usiwo kpobi nọ a dhesẹ evaọ ividio na yọ ẹjiroro omobọ ohwo, onọ a rẹ rehọ eva oruọzewọ ru.—Rri Uwou-Eroro Na orọ June 15, 2004 (ọrọ Oyibo), ẹwẹ. 29-31, Uwou-Eroro Na orọ July 1, 2004, ẹwẹ. 11-13, gbe Uwou-Eroro Na ọrọ October 15, 2000 (ọrọ Oyibo), ẹwẹ. 30-31.